തിരുവനന്തപുരം: ഉത്തർപ്രദേശ് സന്ദര്ശനത്തിനിടെ മുഖ്യമന്ത്രി യോഗി ആദിത്യനാഥിന്റെ കാല്തൊട്ടു വന്ദിച്ച രജനികാന്തിനെ പരിഹസിച്ച് വിദ്യാഭ്യാസ മന്ത്രി വി.ശിവന്കുട്ടി.
”കുനിയുന്നതും നിവരുന്നതും ആരോഗ്യത്തിന് നല്ലതാണ്… എന്നാല് ഇങ്ങിനെ കുനിഞ്ഞാല് ഒടിഞ്ഞു പോകും..!” എന്നാണ് ശിവന്കുട്ടി ഫേസ്ബുക്കില് കുറിച്ചത്.
പോസ്റ്റിനൊപ്പം #hukum #jailer എന്നീ ഹാഷ്ടാഗുകളും കൊടുത്തിട്ടുണ്ട്. യോഗിയുടെ കാലില് തൊട്ടുവണങ്ങുന്ന രജനീകാന്തിന്റെ വീഡിയോ വലിയ ചര്ച്ചകള്ക്കാണ് വഴിവച്ചത്.ഇതിന് പിന്നാലെയായിരുന്നു മന്ത്രിയുടെ പരിഹാസം.
തന്റെ പുതിയ ചിത്രമായ ജയിലര് ലഖ്നോവില് പ്രദര്ശിപ്പിക്കുന്നതുമായി ബന്ധപ്പെട്ടാണ് രജനീകാന്ത് എത്തിയത്. യോഗി ആദിത്യനാഥിന്റെ ഔദ്യോഗിക വസതി സന്ദര്ശിച്ച ശേഷം അദ്ദേഹത്തിന്റെ കാല് തൊട്ടുവണങ്ങുകയായിരുന്നു. യോഗി ആദിത്യനാഥുമായി ചേര്ന്നു സിനിമ കാണാൻ ആഗ്രഹുമുണ്ട് എന്നും സിനിമയുടെ വലിയ വിജയം ദൈവത്തിന്റെ അനുഗ്രഹമായി കാണുന്നു എന്നും ലക്നൗവിലക്ക് തിരിക്കും മുൻപ് രജനികാന്ത് പറഞ്ഞിരുന്നു.
എന്നാല് ജയിലര് സ്ക്രീനിങ്ങില് മുഖ്യമന്ത്രി പങ്കെടുത്തില്ല. അദ്ദേഹത്തിന്റെ ഡെപ്യൂട്ടി കേശവ് പ്രസാദ് മൗര്യയാണ് സിനിമ കാണാൻ എത്തിയത്.
