പാലക്കാട്: ട്രെയിനുകളിലെ സ്ഥിരം മോഷ്ടാവ് ഷൊര്ണൂര് റയില്വെ പോലീസിന്റെ പിടിയില്. തൃശൂര് തൈക്കാട്ടുശ്ശേരി സ്വദേശി വേണുഗോപാലാണ് (53) പിടിയിലായത്. യാത്രക്കാരിയില്നിന്ന് മൊബൈല് ഫോണ് മോഷ്ടിച്ച കേസിലാണ് അറസ്റ്റ്. ഒറ്റയ്ക്ക് യാത്ര ചെയ്യുന്ന സ്ത്രീകളെയും വൃദ്ധരെയുമാണ് വേണുഗോപാല് ലക്ഷ്യമിട്ടിരുന്നത്.
മോഷണമടക്കം 12 ഓളം ക്രിമിനല് കേസുകളില് പ്രതിയാണ് ഇയാള്. ഇപ്പോള് പിടിയിലായത് നെല്ലായ ഹെല്ത്ത് സെന്ററിലെ നഴ്സിന്റെ പരാതിയിലാണ്. കഴിഞ്ഞ മേയ് 29ന് ആണ് കേസിനാസ്പദമായ സംഭവം. നഴ്സ് ഷൊര്ണൂര് റെയില്വേ സ്റ്റേഷനില് ട്രെയിന് ഇറങ്ങുന്ന സമയത്താണ് 20000 രൂപ വിലയുള്ള പുതിയ ഫോണ് ഇയാള് കവര്ന്നത്.
തുടര്ന്ന് ഇവര് ഷൊര്ണൂര് റെയില്വേ പോലീസില് പരാതി നല്കുകയായിരുന്നു. സൈബര് സെല്ലുമായി സഹകരിച്ചു നടത്തിയ അന്വേഷണത്തിലാണ് പ്രതിയുടെ കൂടുതല് വിവരങ്ങള് ലഭിച്ചതും ഇയാളെ പിടികൂടാനായതും. മോഷ്ടിക്കപ്പെട്ട മൊബൈല് ഫോണ് ഇയാളില് നിന്നും പിടിച്ചെടുത്തു. മൊബൈല് ഫോണുകള് വില്പന നടത്താന് ഇടനിലക്കാരുണ്ടെന്നാണ് പോലീസ് വിശദമാക്കുന്നത്. പിടിയിലായാല് ഓരോ ജില്ലയിലും ആവശ്യമെങ്കില് നിയമ സഹായത്തിനും ഇയാള്ക്ക് ആളുകളുണ്ടെന്ന് പോലീസ് വിശദമാക്കുന്നു.
