കൊച്ചി: മാലിന്യങ്ങളുമായി ബ്രഹ്‌മപുരത്തേക്ക് പോയ കൊച്ചി കോര്‍പറേഷന്‍ ലോറി തടഞ്ഞു. തൃക്കാക്കര നഗരസഭാ അധ്യക്ഷ അജിത തങ്കപ്പന്റെ നേതൃത്വത്തില്‍ ചെമ്പുമുക്കിലാണ് ലോറി തടഞ്ഞത്. പൊക്കോടതി ഉത്തരവ് ലംഘിച്ചാണ് മാലിന്യം കൊണ്ടു പോകുന്നതെന്ന് ആരോപിച്ചായിരുന്നു പ്രതിഷേധം.
ജനങ്ങളുടെ ആശങ്കപരിഹരിക്കാനാണ് ലോറികള്‍ തടഞ്ഞുള്ള അനിശ്ചിതകാല സമരമെന്നു തൃക്കാക്കര നഗരസഭാ അധ്യക്ഷ അജിത തങ്കപ്പന്‍ മാധ്യമങ്ങളോട് പറഞ്ഞു. കൊച്ചി കോര്‍പറേഷനെതിരേ പോലീസ് കേസെടുക്കണമെന്നും അജിത ആവശ്യപ്പെട്ടു.
കൊച്ചി കോര്‍പറേഷന്‍ മാലിന്യം കൊണ്ടു പോകുന്നുണ്ടെങ്കില്‍ തൃക്കാക്കര നഗരസഭയുടേയും കൊണ്ടു പോകണം. കൊച്ചി കോര്‍പറേഷന്റെ മാലിന്യം മാത്രം കൊണ്ടുപോകാനാണ് തീരുമാനമെങ്കില്‍ മാലിന്യ വണ്ടി തൃക്കാക്കരയിലൂടെ കടത്തിവിടില്ലെന്നും അജിത തങ്കപ്പന്‍ വ്യക്തമാക്കി.
