കണ്ണൂര്‍: കോര്‍പറേഷന്‍പരിധിയില്‍ ദളിത് വിദ്യാര്‍ത്ഥികള്‍ ക്ഷേത്രത്തില്‍ കയറി അശുദ്ധമാക്കിയെന്നു ആരോപിച്ചു ആള്‍ക്കൂട്ടം വിചാരണയ്ക്കിരയാക്കുകയും മര്‍ദ്ദിച്ചതായും പരാതി. പ്രായപൂര്‍ത്തിയാകാത്ത ദളിത് വിദ്യാര്‍ത്ഥിനിക്കും സഹോദരനും നേരെ എളയാവൂരില്‍ ക്ഷേത്രത്തില്‍ കയറിയതിന് ആള്‍ക്കൂട്ട വിചാരണയും അക്രമവും നടന്ന സംഭവത്തില്‍ പോലീസ് കേസ് അട്ടിമറിക്കുകയാണെന്ന് കേരള സ്റ്റേറ്റ് പട്ടിക ജനസമാജം (കെ.പി.ജി. എസ്) ഭാരവാഹികള്‍ കണ്ണൂര്‍ പ്രസ് ക്ളബില്‍ വാര്‍ത്താസമ്മേളനത്തില്‍ ആരോപിച്ചു.
ഈക്കഴിഞ്ഞ വിഷുദിവസം ഉച്ചയ്ക്ക് പന്ത്രണ്ടരയോടെയാണ് എളയാവൂര്‍ കൂടത്ത് താഴെ ആരൂഡം ദേവിക്ഷേത്രത്തിനടുത്തുവെച്ചു പ്ളസ്ടൂ വിദ്യാര്‍ത്ഥിനിയും സഹോദരനും ആള്‍ക്കൂട്ട വിചാരണയ്ക്കും അക്രമത്തിനും ഇരയായത്. ദളിത് വിഭാഗത്തില്‍പ്പെട്ട ഇവര്‍ ക്ഷേത്രത്തില്‍ കയറിയെന്നു ആരോപിച്ചായിരുന്നു പ്രദേശവാസികള്‍ ഇവര്‍ക്കു നേരെ തിരിഞ്ഞത്. പട്ടികജാതിക്കാരായ ഇവര്‍ ക്ഷേത്രത്തില്‍ കയറി അശുദ്ധമാക്കിയെന്നു ആരോപിച്ചു ഇരുവരെയും മര്‍ദ്ദിച്ചുവെന്നാണ് പരാതി. സ്ത്രീകള്‍ ഉള്‍പ്പെടെയുളള അന്‍പതോളം പേരാണ് ആള്‍ക്കൂട്ട വിചാരണ നടത്തിയത്. ഇതില്‍ എട്ടുപേര്‍ കുട്ടികളെ മര്‍ദ്ദിക്കുകയുംരണ്ടരമണിക്കൂറോളം ബന്ദികളാക്കുകയും ചെയ്തു. പോലീസെത്തിയാണ് ഇവരെ മോചിപ്പിച്ചത്.
ഇതിനിടെയില്‍ കുട്ടികളുടെ പരിചയക്കാരായ രണ്ടു യുവാക്കളായ ഷറഫുദ്ദീന്‍, വിവേക് എന്നിവര്‍ ബൈക്കില്‍ സ്ഥലത്തെത്തുകയും ആള്‍ക്കൂട്ട വിചാരണയ്ക്കെതിരെ പ്രതികരിക്കുകയും ചെയ്തു. ഇതിനിടെയില്‍ ഇവര്‍ ഉറുമി ഉപയോഗിച്ചതിനാല്‍ രണ്ടു പേര്‍ക്ക് പരുക്കേറ്റു. സംഭവത്തില്‍ പോലീസ് ഷറഫുദ്ദീനെയും വിവേകിനെയും ആയുധം ഉപയോഗിച്ചു അക്രമിച്ചതിന് അറസ്റ്റു ചെയ്യുകയും റിമാന്‍ഡ് ചെയ്യുകയും ചെയ്തു. കുട്ടികളെ അക്രമിച്ച എട്ടു പേരെ അറസ്റ്റു ചെയ്തുവെങ്കിലും കണ്ണൂര്‍ ടൗണ്‍ സി. ഐ ഇവര്‍ക്കെതിരെ രാഷ്ട്രീയ സമ്മര്‍ദ്ദം കാരണം നിസാരവകുപ്പുകള്‍ മാത്രമേ ചുമത്തിയിട്ടുളളുവെന്ന് പട്ടികജനസമാജം ഭാരവാഹി തെക്കന്‍സുനില്‍കുമാര്‍ ആരോപിച്ചു.
പട്ടികജാതി വിഭാഗക്കാരായ കുട്ടികളായതിനാല്‍ പോലീസ് കേസ് അട്ടിമറിക്കുകയായിരുന്നു. സ്റ്റേഷന്‍ ജാമ്യം നല്‍കി പ്രതികളെ വിട്ടയക്കുകയാണ് പോലീസ് ചെയ്തത്. എന്നാല്‍, പിന്നീട് പ്രതികളില്‍ നിന്നും പരാതി വാങ്ങി ആള്‍ക്കൂട്ട വിചാരണയ്ക്കിരയായ കുട്ടികള്‍ക്കെതിരെ നരഹത്യാശ്രമം, ആംസ് ആക്റ്റ് എന്നിവ ചുമത്തി ജയിലില്‍ അടക്കുകയും ചെയ്തുവെന്ന് സുനില്‍ കുമാര്‍ പറഞ്ഞു. ഭരണ, പ്രതിപക്ഷ പാര്‍ട്ടികളിലെ ചില നേതാക്കള്‍ അന്യായമായി ഇടപെട്ടാണ് പട്ടികജാതിക്കാരായ വിദ്യാര്‍ത്ഥികള്‍ക്കു നേരെയുളള അതിക്രമകേസ് അട്ടിമറിച്ചത്.
കുറ്റവാളികള്‍ക്കെതിരേ പോക്സോ, എസ്.സി/എസ്.ടി വകുപ്പു ചുമത്താന്‍ പോലീസ് തയ്യാറാകണം. ഇതിനായി കണ്ണൂര്‍ സിറ്റി പോലീസ് കമ്മിഷണര്‍ക്ക് നിവേദനം നല്‍കിയതായും നേതാക്കള്‍ അറിയിച്ചു.
