കോഴിക്കോട്: മൂന്നുമാസത്തെ കാത്തിരിപ്പ്‌, ഒടുവിൽ മൂന്നര മണിക്കൂർ കൊണ്ട് താമരശേരി ചുരം കടന്നു കൂറ്റൻ ട്രെയിലറുകൾ. ഇത്ര വേഗം ചുരം കയറാൻ കഴിയുമായിരുന്നെങ്കിൽ മൂന്നു മാസം വാഹനങ്ങൾ എന്തിനു തടഞ്ഞിട്ടെന്ന ചോദ്യം ബാക്കി! ദൗത്യം പൂർത്തിയായതോടെ ചുരത്തിലെ ഗതാഗത നിയന്ത്രണവും നീക്കി.
രാത്രി പതിനൊന്നു മണിയോടെ തുടങ്ങിയ യാത്ര പുലർച്ച രണ്ടോടെയാണ് 9 കൊടും വളവുകൾ താണ്ടിയത്. ഇടയ്ക്ക് ഏഴാം വളവിൽ എത്തിയപ്പോൾ വയനാടു ഭാഗത്തുനിന്നു വന്ന ആംബുലൻസിനു കടന്നുപോകാൻ കുറച്ചുനേരം യാത്ര നിർത്തിവച്ചു. യാത്രയ്ക്കായി യുദ്ധസമാനമായ ഒരുക്കങ്ങളാണ് ചുരത്തിന്റെ രണ്ടു ഭാഗത്തും ഒരുക്കിയിരുന്നത്. ഡ്രൈവർമാർ അടക്കം 14 ജീവനക്കാർ ചേർന്നാണ് ട്രെയ്‌ലറുകൾ കൊണ്ടു പോയത്. ഏറ്റവും മുന്നിലായി വെളിച്ച സംവിധാനങ്ങൾ പിടിപ്പിച്ച വാഹനവും പൈലറ്റ് വാഹനവും അതിനു പിന്നിൽ ട്രെയ്‌ലറുകളും എന്ന രീതിയിലായിരുന്നു യാത്ര.
