ഗൂഗിളിന് എവിടുന്നാണ് ഇത്രയും കാര്യങ്ങൾ കിട്ടുന്നത്.. അല്ലെങ്കിൽ നമ്മൾ സെർച്ച്‌ ചെയ്യുമ്പോൾ ഞൊടിയിടയിൽ അതിനുള്ള മറുപടി ലഭിക്കുന്നത്?

ലോകത്തുള്ള വെബ്സൈറ്റുകളിൽ മുഴുവൻ മുകളിൽ പറഞ്ഞ searchbot ഇടയ്ക്കിടെ കയറി നോക്കും.എന്തെങ്കിലും മാറ്റം അല്ലെങ്കിൽ വിവരം പുതിയതായി വരുന്നുണ്ടെങ്കിൽ അത് സെർച്ച്‌ ഇൻഡക്സിൽ കൂട്ടി ചേർക്കും.ഈ സെർച്ച്‌ ഇൻഡക്സ് ഗൂഗിളിന്റെ ഡാറ്റാ സെന്ററുകളിലെ വലിയ ഹാർഡ് ഡിസ്കുകളിൽ സൂക്ഷിച്ചു വെക്കും.ഇങ്ങനെ ഉണ്ടാകുന്ന സെർച്ച്‌ ഇൻഡക്സ് എന്ന് പറഞ്ഞാൽ ഇന്റർനെറ്റിൽ ഉള്ള മൊത്തം വെബ്സൈറ്റുകളുടെ ഒരു ചെറുപതിപ്പായിരിക്കും.നമ്മൾ ഗൂഗിളിൽ എന്തെങ്കിലും സെർച്ച്‌ ചെയ്യുമ്പോൾ ഗൂഗിൾ ഈ സെർച്ച്‌ ഇൻഡക്സിൽ ആണ് തപ്പി നോക്കുന്നത്.എന്നിട്ട് ഏതൊക്കെ വെബ്സൈറ്റുകളിൽ ആണ് നമുക്ക് വേണ്ട വിവരങ്ങൾ ഉള്ളത് എന്ന് നോക്കി അതിലേക്കുള്ള ലിങ്കുകൾ ഒരു പ്രത്യേക ക്രമത്തിൽ,ഏറ്റവും ഉപകാരപ്രദമായെക്കാവുന്നത് ആദ്യം എന്ന രീതിയിൽ റാങ്ക് ചെയ്തു നമുക്ക് കാണിച്ചു തരുന്നു.ഇതാണ് ഓരോ ഗൂഗിൾ സെർച്ചിലും സംഭവിക്കുന്നത്.

 വായിക്കുമ്പോൾ വളരെ എളുപ്പം എന്ന് തോന്നുമെങ്കിലും വളരെയധികം സങ്കീർണമാണ് ഈ പ്രക്രിയ.ഒന്നാമത്തെ കാര്യം കോടിക്കണക്കിനു വെബ്സൈറ്റുകൾ ഉണ്ട് എന്നത് തന്നെ.അവയിലൊക്കെയുള്ള  വിവരങ്ങളുടെ സമുദ്രത്തിൽ നിന്നും നമ്മൾ എന്താണ് ഉദ്ദേശിക്കുന്നത് എന്ന് മനസ്സിലാക്കി മുങ്ങിതപ്പി എടുക്കണം.അതിൽ തന്നെ ഉള്ള നല്ലതും,മോശമായതും (spam -സ്പാം) തമ്മിൽ വേർതിരിക്കണം.എന്നിട്ട് അതിനെ ഒരു അൽഗോരിതം ഉപയോഗിച്ച് ഏറ്റവും നല്ലത് ആദ്യം (page ranking ) എന്ന രീതിയിൽ ക്രമീകരിക്കണം.അതിനുശേഷം നമ്മുടെ മുന്നിലെത്തിക്കണം. ഇതെല്ലാം കൂടെ ഒരു സെക്കൻഡിൽ താഴെ സമയത്തിനുള്ളിൽ നടത്തുകയും വേണം.ഗൂഗിൾ തന്നെ പറയുന്നത് സെർച്ച്‌ റിസൾട്ടിൽ spam കയറി വരുന്നത് ഒഴിവാക്കാനായി ദിവസത്തിൽ 6 തവണയെങ്കിലും പേജ് റാങ്കിങ് അൽഗോരിതം ചെറിയ രീതിയിൽ മാറ്റാറുണ്ട് എന്നാണ്.കോക്കകോളയുടെ റെസിപ്പി എന്ന പോലെ ഒരു സീക്രട്ട് ആണ് ഈ അൽഗോരിതവും.

ഗൂഗിൾ എന്ന കമ്പനി ആദ്യ കാലങ്ങളിൽ ഉപയോഗിച്ചതും വളരെയധികം പ്രസിദ്ധിയാർജിച്ചതുമായ അൽഗരിതം ആണ് പേജ് റാങ്ക്.ഉയർന്ന പേജ് റാങ്ക് ലഭിക്കുന്ന ഒരു വെബ്സൈറ്റ് വളരെ ക്വാളിറ്റിയുള്ള , പ്രാധാന്യമായുള്ള വെബ്സൈറ്റ് ആയി കണക്കാക്കപ്പെടുകയും അവ ഗൂഗിൾ സേർച്ച് റിസൾട്ടുകളുടെ ഏറ്റവും മുകളിൽ തന്നെ പ്രത്യക്ഷപ്പെടുകയും ചെയ്യുന്നു.ഉയർന്ന പേജ് റാങ്കുള്ള വെബ് പേജുകളുമായി ലിങ്ക് ചെയ്തിരിക്കുന്ന, അല്ലെങ്കിൽ ഉയർന്ന പേജ് റാങ്കുള്ള വെബ് പേജുകളിൽ നിന്നും ലിങ്ക് ലഭിക്കുന്ന ഒരു വെബ് സൈറ്റിന് ഉയർന്ന പേജ് റാങ്ക് ലഭിക്കുന്നു.ഒരു വെബ്സൈറ്റ് പേജ് എത്രമാത്രം പ്രാധാന്യം അർഹിക്കുന്നു എന്ന് കണ്ടെത്തുന്നതിന് ഉപയോഗിക്കുന്ന മാർഗ്ഗമാണ് പേജ് റാങ്ക്. ഈ മാർഗ്ഗമനുസരിച്ചു ഒരു വെബ് പേജിന്റെ റാങ്ക് നിശ്ചയിക്കുന്നതിന് രണ്ട് കാര്യങ്ങളാണ് പരിഗണിക്കുന്നത് .

✨മറ്റു വെബ് പേജുകളിൽ നിന്നും വരുന്ന ലിങ്കുകളുടെ എണ്ണം

✨ഇങ്ങനെ വരുന്ന ലിങ്കുകളുടെ ക്വാളിറ്റി

 കൂടുതൽ പ്രധാനപ്പെട്ടതും ,ക്വാളിറ്റി ഉള്ളതുമായ വെബ്‌സൈറ്റുകൾക്ക് മറ്റ് വെബ്സൈറ്റുകളിൽ നിന്നും കൂടുതൽ ലിങ്കുകൾ  ലഭിക്കും എന്ന വിലയിരുത്തലിന്റെ അടിസ്ഥാനത്തിലാണ് പേജ് റാങ്ക് കണക്കാക്കപ്പെടുന്നത് .ഇപ്പോൾ ഗൂഗിൾ ഒരു വെബ് പേജിന്റെ റാങ്ക് നിശ്ചയിക്കുന്നതിനും  അതിനനുസരിച്ച്‌ ഗൂഗിൾ സേർച്ച്  റിസൾട്ടിൽ വെബ് പേജുകൾ ക്രമീകരിക്കുന്നതിനുമുള്ള  ഓർഡർ നിശ്ചയിക്കുന്നതിന് പേജ് റാങ്ക് അൽഗരിതം മാത്രമല്ല ഉപയോഗിക്കുന്നത്.ഏറ്റവും മികച്ച വെബ് പേജുകൾ തിരഞ്ഞെടുക്കുന്നതിന് ഗൂഗിൾ ഉപയോഗിക്കുന്ന ഒരുപാട് സേർച്ച് എൻജിൻ ഒപ്ടിമൈസേഷൻ ( SEO ) മാർഗ്ഗങ്ങളിൽ ഒന്നാണ് പേജ് റാങ്ക്.ഒരു യൂസർ ഗൂഗിളിൽ എന്തെങ്കിലും തിരയുമ്പോൾ ആ തിരയലുമായി ബന്ധപ്പെട്ടു ഏറ്റവും അടുത്ത് നിൽക്കുന്നതും, വളരെയധികം പ്രാധാന്യമുള്ളതും, ഏറ്റവും മികച്ചതുമായ റിസൾട്ടുകൾ നൽകുക എന്നതാണ് ഗൂഗിൾ സെർച്ച് എൻജിന്റെ ഏറ്റവും പ്രാഥമികമായ ലക്‌ഷ്യം.

✨ ബാക്ക് ലിങ്ക് :ഒരു വെബ്‌സൈറ്റിൽ നിന്നും മറ്റൊരു വെബ്സൈറ്റിലേക്കുള്ള  ലിങ്കിനെയാണ് ബാക്ക് ലിങ്ക് എന്ന് വിളിക്കുന്നത് . വെബ്‌സൈറ്റുകളെ റാങ്ക് ചെയ്യുന്നതിനായി ഗൂഗിൾ പോലെയുള്ള വെബ്സൈറ്റുകൾ ബാക്ക് ലിങ്കിനെ ഉപയോഗിക്കുന്നു .ബാക്ക് ലിങ്കുമായി ബന്ധപ്പെട്ട് പൊതുവെ കേൾക്കുന്ന മറ്റ് ചില വാക്കുകൾ കൂടി  നോക്കാം.

⚡ലിങ്ക് ജ്യൂസ് [ Link Juice ]:- ഒരു വെബ്‌പേജ് നിങ്ങളുടെ ഏതെങ്കിലും ലേഖനങ്ങളിലേക്കോ, വെബ്‌സൈറ്റിന്റെ ഹോംപേജിലേക്കോ ലിങ്കുചെയ്യുമ്പോൾ, അതിനെ ലിങ്ക് ജ്യൂസ് എന്ന് പറയുന്നു . ഈ ലിങ്ക് ജ്യൂസ് ലേഖനത്തിന്റെ റാങ്കിംഗിനെ സഹായിക്കുന്നു.കൂടാതെ ഡൊമെയ്ൻ അതോറിറ്റിയും വർദ്ധിപ്പിക്കുന്നു .

⚡നോ-ഫോളോ ലിങ്ക്[ No Follow Link ]:- ഒരു വെബ്‌സൈറ്റ് മറ്റൊരു വെബ്‌സൈറ്റിലേക്ക് ലിങ്കുചെയ്യുമ്പോൾ  ലിങ്കിന് ഫോളോ-ടാഗ് ഇല്ലെങ്കിൽ ആ ലിങ്ക് ലിങ്ക് ജ്യൂസ് കൈമാറില്ല.  നോ ഫോളോ ലിങ്കുകൾ ഉപയോഗപ്രദമല്ല. പൊതുവേ ഒരു വെബ്‌മാസ്റ്റർ‌  വിശ്വസനീയമല്ലാത്ത സൈറ്റിലേക്ക് ലിങ്കുചെയ്യുമ്പോൾ‌ നോ ഫോളോ ടാഗ് ഉപയോഗിക്കുന്നു.

⚡ഡു-ഫോളോ ലിങ്ക്[ Do Follow Link  ]:- നിങ്ങൾ ഒരു ബ്ലോഗിൽ അല്ലെങ്കിൽ സൈറ്റിൽ ചേർക്കുന്ന എല്ലാ ലിങ്കുകളും ഡീഫോൾട് ആയി  ഡു ഫോളോ ലിങ്കുകളാണ് .

⚡കുറഞ്ഞ നിലവാരമുള്ള ലിങ്കുകൾ‌[ Low Quality Links ]:- ഓട്ടോമേറ്റഡ് സൈറ്റുകൾ‌, സ്പാം സൈറ്റുകൾ‌ അല്ലെങ്കിൽ‌ അശ്ലീല സൈറ്റുകൾ‌ എന്നിവയിൽ‌ നിന്നുമുള്ള ലിങ്കുകളാണ് ഗുണനിലവാരമില്ലാത്ത ലിങ്കുകൾ‌. അത്തരം ലിങ്കുകൾ നല്ലതിനേക്കാൾ കൂടുതൽ ദോഷം ചെയ്യും.

⚡ആന്തരിക ലിങ്കുകൾ[  Internal Links ]:- ഒരേ ഡൊമെയ്‌നിനുള്ളിൽ തന്നെ ഒരു പേജിൽ നിന്ന് മറ്റൊന്നിലേക്ക് പോകുന്ന ലിങ്കുകളെ ആന്തരിക ലിങ്കുകൾ എന്ന് വിളിക്കുന്നു. ഈ പ്രക്രിയയെ ആന്തരിക ലിങ്കിംഗ് അല്ലെങ്കിൽ ഇന്റർലിങ്കിംഗ് എന്ന് വിളിക്കുന്നു.

⚡ആങ്കർ ടെക്സ്റ്റ്[ Anchor Test ]:- ഹൈപ്പർലിങ്കുകൾക്കായി ഉപയോഗിക്കുന്ന വാചകത്തെ ആങ്കർ ടെക്സ്റ്റ് എന്ന് വിളിക്കുന്നു. പ്രത്യേക കീവേഡുകൾക്കായി നിങ്ങൾ റാങ്ക് ചെയ്യാൻ ശ്രമിക്കുമ്പോൾ ആങ്കർ ടെക്സ്റ്റ് ബാക്ക്‌ലിങ്കുകൾ മികച്ച രീതിയിൽ പ്രവർത്തിക്കുന്നു.

✨ബൗൺസ് റേറ്റ് :

ഒരു വെബ്സൈറ്റിന്റെ ഒരു പേജ് മാത്രം സന്ദർശിച്ചതിന് ശേഷം ഉടനേ തന്നെ പുറത്തേക്ക് പോവുന്ന സന്ദർശകരുടെ ശതമാനത്തിനെയാണ് ബൗൺസ് റേറ്റ് എന്ന് വിളിക്കുന്നത് . താഴ്ന്ന ബൗൺസ് റേറ്റ് നിങ്ങളുടെ വെബ്സൈറ്റ് വളരെ നല്ലതാണ്  എന്നതിന്റെയും , ഉയർന്ന ബൗൺസ് റേറ്റ് നിങ്ങളുടെ വെബ്സൈറ്റിന് എന്തൊക്കെയോ കുഴപ്പങ്ങളുണ്ട് എന്നതിന്റെയും സൂചനയാണ് .

✨സേർച്ച് എൻജിൻ ഒപ്ടിമൈസേഷൻ:ഒരു സേർച്ച്  എഞ്ചിൻ നൽകുന്ന സേർച്ച് റിസൾട്ടുകളിൽ  ഒരു  സൈറ്റ് ഏറ്റവും മുകളിൽ തന്നെ അല്ലെങ്കിൽ ആദ്യം തന്നെ  കാണപ്പെടുന്നുവെന്ന് ഉറപ്പുവരുത്തിക്കൊണ്ട് ഒരു പ്രത്യേക വെബ്‌സൈറ്റിലേക്കുള്ള സന്ദർശകരുടെ എണ്ണം പരമാവധി വർദ്ധിപ്പിക്കുന്ന പ്രക്രിയ ആണ് സേർച്ച് എൻജിൻ ഒപ്ടിമൈസേഷൻ,