ഒരു രാത്രി ഇരുട്ടി വെളുത്തപ്പോള്‍ സ്വന്തം വീടിരുന്ന സ്ഥലം വെറും മണ്‍കൂനകളായി മാറിയത് നിസഹായതയോടെ നോക്കി നില്‍ക്കേണ്ടി വന്ന കുറേ മനുഷ്യരുടെ മുഖം മനസ്സില്‍ നിന്നും അത്ര പെട്ടെന്ന് മായുന്ന കാഴ്ചയായിരുന്നില്ല. പെട്ടിമുടി ദുരന്തം പ്രീയപ്പെട്ടതെല്ലാം കവര്‍ന്നെടുത്ത 8 കുടുംബങ്ങള്ക്ക് ഈ ഞായറാഴ്ച സര്‍ക്കാര്‍ ഭൂമി നല്‍കും. പട്ടയം മന്ത്രി എം.എം മണി കൈമാറും.
പെട്ടിമുടി ദുരന്തത്തില്‍ നിന്നും രക്ഷപെട്ട എട്ട് കുടുംബങ്ങള്‍ക്കാണ് കുറ്റിയാര്‍വാലിയില്‍ ഭൂമി നല്‍കുന്നത്. കലക്ടറുടെ നിര്‍ദേശ പ്രകാരം തിരഞ്ഞെടുത്ത സംഘമാണ് ഭൂമി നല്‍കാന്‍ അര്‍ഹരായവരുടെ പട്ടിക തയ്യാറാക്കിയത്. ഈ ലിസ്റ്റ് പ്രകാരം മാലയമ്മാള്‍, മുരുകേശ്വരി മുരുകേശന്‍, പി.ദീപന്‍, എന്‍.മുരുകന്‍, പി.ഗണേഷന്‍, സീതാലക്ഷ്മി കണ്ണന്‍, കറുപ്പായി ഷണ്‍മുഖയ്യ, സരസ്വതി രാസയ്യ എന്നിവര്‍ക്കാണ് ഞായറാഴ്ച മന്ത്രി പട്ടയം കൈമാറുക. ഓരോരുത്തര്‍ക്കും 5 സെന്റ് ഭൂമി വീതമാണ് നല്‍കുക.
ഞായറാഴ്ച കുറ്റിയാര്‍വാലിയില്‍ നടക്കുന്ന ചടങ്ങിലാണ് മന്ത്രി പട്ടയവും അനുബന്ധ രേഖകളും കൈമാറുന്നത്. കുറ്റിയാര്‍വാലിയില്‍ നിര്‍മ്മിക്കുന്ന വീടുകളുടെ തറക്കല്ലിടലും അന്നേ ദിവസം തന്നെ നടത്തും. കണ്ണന്‍ ദേവന്‍ കമ്പിനിയാണ് 8 കുടുംബങ്ങള്‍ക്കും വീട് നിര്‍മ്മിച്ചു നല്‍കുന്നത്.
