അമുക്കുരം അഥവാ അശ്വഗന്ധ ആരോഗ്യത്തിനും സൗന്ദര്യത്തിനും ഒരുപോലെ ഗുണകരം 

അമുക്കുരം അഥവാ അശ്വഗന്ധ അതിന്റെ ആരോഗ്യ ഗുണങ്ങൾ കൊണ്ട് പേരുകേട്ട ഒരു സസ്യമാണ്. പല രോഗങ്ങളും ചികിത്സിച്ച് ഭേദമാക്കുന്നതിനും മാനസികാരോഗ്യം മെച്ചപ്പെടുത്തുന്നതിനുമൊക്കെ അമുക്കുരം പണ്ടുമുതലേ ആയുർവേദത്തിൽ ഉപയോഗിച്ച് പോരുന്നു.ഈ സസ്യം നമ്മുടെ ശരീരത്തിനായുള്ള പല ഗുണങ്ങൾ കൊണ്ട് നിറഞ്ഞിരിക്കുന്നു.

ചർമ്മം: പ്രകൃതിദത്തമായ ചർമ്മ എണ്ണകൾ ഉത്പാദിപ്പിക്കാൻ അമുക്കുരം സഹായിക്കുന്നു. ചർമ്മത്തെ സമ്പുഷ്ടമാക്കുന്ന സംയുക്തങ്ങളായ ഹയാലുറോണൻ (ജലാംശം), എലാസ്റ്റിൻ (സൗമ്യത), കൊളാജൻ (ബലം) എന്നിവയുടെ ഉത്പാദനത്തിനും ഇത് സഹായകമാണ്. അമുക്കുരം പൊടിച്ചത്, തേനിലോ പാലിലോ കലർത്തി ഒരു ടോണറായി ചർമ്മത്തിൽ ഉപയോഗിക്കാം.

മുടി: ആയുർവേദ ഷാംപൂകളിൽ ഉപയോഗിക്കുന്ന പ്രധാന ചേരുവകളിലൊന്നാണ് അശ്വഗന്ധ അഥവാ അമുക്കുരം. ശിരോചർമ്മത്തെ ഉത്തേജിപ്പിക്കുന്നതിനും രക്തചംക്രമണം മെച്ചപ്പെടുത്തുന്നതിനും താരൻ പ്രതിരോധിക്കുന്നതിനും ഇത് ഉത്തമമാണ്. ഇത് മെലാനിൻ ഉൽപാദനവും മെച്ചപ്പെടുത്തുന്നു.  മുടിക്ക് സ്വാഭാവിക നിറം നൽകുന്ന പിഗ്മെന്റ് ആണ് മെലാനിൻ. അതുപോലെ, മുടി നരയ്ക്കുന്നത് മന്ദഗതിയിലാക്കുകയും അവയ്ക്ക് ആരോഗ്യകരമായ തിളക്കം നൽകുകയും ചെയ്യുന്നതും അമുക്കുരത്തിന്റെ ഗുണങ്ങളിൽ ഉൾപ്പെടുന്നു.

സമ്മർദ്ദം ലഘൂകരിക്കാനും മാനസികാവസ്ഥയും ഊർജ്ജ നിലയും ഉയർത്താനും ഏകാഗ്രത മെച്ചപ്പെടുത്താനും ഉത്തമമായ ആയുർവേദ ഔഷധ സസ്യമാണ് അമുക്കുരം. സമ്മർദ്ദത്തിൽ നിന്നും ആശ്വാസമേകുന്ന നിരവധി ഗുണങ്ങളുണ്ട് ഇവയ്ക്ക്. ഇത് നന്നായി ഉറങ്ങാൻ സഹായിക്കുകയും മനസ്സിനെ ആരോഗ്യകരമായി നിലനിർത്തുകയും രക്തത്തിലെ അമിതമായ കോർട്ടിസോൾ മൂലമുണ്ടാകുന്ന ഹോർമോൺ അസന്തുലിതാവസ്ഥ ഒഴിവാക്കുകയും ചെയ്യുന്നു.നിങ്ങളുടെ സമ്മർദ്ദ നില നിയന്ത്രിക്കുന്നത് വഴി വാർദ്ധക്യത്തിന്റെ ലക്ഷണങ്ങൾ പ്രതിരോധിക്കുവാനും ഇത് സഹായിക്കും.

അമുക്കുരം, ഭക്ഷണത്തിൽ ഉൾപ്പെടുത്തുമ്പോൾ അത് രക്തത്തിലെ പഞ്ചസാരയുടെ അളവ് കുറയ്ക്കാൻ സഹായിക്കും. ഇൻസുലിൻ ഉത്പാദനം വർദ്ധിപ്പിക്കുകയും ഇൻസുലിൻ സംവേദനക്ഷമത മെച്ചപ്പെടുത്തുകയും ചെയ്യുന്ന ഈ ഔഷധ സസ്യം ആരോഗ്യമുള്ള ആളുകൾക്കും പ്രമേഹമുള്ളവർക്കും ഒരുപോലെ ഗുണകരമായി പ്രവർത്തിക്കുമെന്ന് തെളിയിച്ചിട്ടുണ്ട്. രക്തത്തിലെ പഞ്ചസാരയുടെ അളവ് നിയന്ത്രിക്കുന്നത് ശരീരഭാരത്തിലെ വർദ്ധനവ്, അണുബാധ, കുറഞ്ഞ ഊർജ്ജ നില എന്നിവ പോലുള്ള പല ആരോഗ്യ പ്രശ്നങ്ങളെയും അകറ്റി നിർത്താൻ സഹായിക്കും.

ഇന്നത്തെ ചെറുപ്പക്കാരായ ജോലിക്കാരുടെ ഏറ്റവും സാധാരണമായ പരാതികളിലൊന്നാണ് ഉത്കണ്ഠ. ഈ പ്രശ്നം നിങ്ങളുടെ ജീവിതശൈലിയെ തന്നെ പരോക്ഷമായി ബാധിക്കുന്നു, നിങ്ങളുടെ ജോലി, ചെയ്ത് തീർക്കേണ്ട സമയപരിധി പാലിക്കൽ, ജോലിചെയ്യൽ എന്നിവ പോലുള്ള ദൈനംദിന പ്രവർത്തനങ്ങൾ പൂർത്തിയാക്കാനുള്ള പ്രചോദനം, നിങ്ങളുടെ സ്വകാര്യ ജീവിതം കൈകാര്യം ചെയ്യുന്നതിലുള്ള കഴിവ് എന്നിവയെ ചിലപ്പോൾ ഇത് നേരിട്ട് ബാധിച്ചേക്കാം. സമ്മർദ്ദത്തിലേക്കുള്ള വഴി തടയാനും ഉത്കണ്ഠാ രോഗങ്ങളുള്ളവരിൽ രോഗലക്ഷണങ്ങൾ കുറയ്ക്കാനും അമുക്കുരത്തിന് കഴിയുമെന്ന് വിശ്വസിക്കപ്പെടുന്നു. ഉറക്കമില്ലായ്മ ഒഴിവാക്കുന്നതിനും ഇത് സഹായിക്കുന്നു – ഇത് ക്ഷീണം, അലസത തുടങ്ങിയ പ്രശ്നങ്ങൾ അകറ്റുന്നതിനും നേരിട്ട് കാരണമാകുന്നു.

വ്യായാമത്തിന്റെ ശാരീരിക നേട്ടങ്ങൾ ത്വരിതപ്പെടുത്തുന്നതിന് അനുബന്ധങ്ങൾ അഥവാ സപ്ലിമെന്റുകൾ ഉപയോഗിക്കുന്നത് ജിം പ്രേമികൾക്കിടയിൽ പുതിയ പ്രവണതയാണ്. ശരീരഘടന മെച്ചപ്പെടുത്തുന്നതിനും നിങ്ങളുടെ ശരീരശക്തി വർദ്ധിപ്പിക്കുന്നതിനും ഉപയോഗിക്കുന്ന അനുബന്ധങ്ങളിലൊന്നാണ് അശ്വഗന്ധ അഥവാ അമുക്കുരം. ശരീരത്തിലെ കൊഴുപ്പ് ശതമാനം നിയന്ത്രിക്കാനും ഇത് സഹായിക്കുന്നു, ഒപ്പം നിങ്ങളുടെ ശാരീരികക്ഷമത ലക്ഷ്യങ്ങളെ കൂടുതൽ ആരോഗ്യകരമായ രീതിയിൽ എത്തിക്കാൻ ഇത് ഉപകരിക്കുന്നു.

പുരാതന ആയുർവേദ വൈദ്യശാസ്ത്രം പ്രയോജനപ്പെടുത്തിയ അമുക്കുരത്തിന്റെ ഒരു പ്രധാന ഗുണം, വിവിധ രോഗങ്ങൾക്ക് ചികിത്സിക്കാനുള്ള ഇവയുടെ കഴിവായിരുന്നു. ശരീരത്തിലെ വീക്കം കുറയ്ക്കുന്നതിനും പ്രതിരോധശേഷി വർദ്ധിപ്പിക്കുന്നതിനും അണുബാധകൾക്കെതിരെ പോരാടുന്നതിനും ഈ സസ്യം ഫലപ്രദമാണെന്ന് അറിയപ്പെടുന്നു. ശരീരത്തിലെ ഏതെങ്കിലും തരത്തിലുള്ള വീക്കം ഒഴിവാക്കാൻ 250 മില്ലിഗ്രാം അമുക്കുരത്തിന്റെ സത്ത്  ദിവസേന കഴിക്കുന്നത് നല്ലതാണ്.

ഹൃദയാരോഗ്യത്തിന് കൊളസ്ട്രോൾ, ട്രൈഗ്ലിസറൈഡുകൾ എന്നിവ ആരോഗ്യകരമായ അളവിൽ നിലനിർത്തേണ്ടത് നിർണായകമാണ്. ഉയർന്ന കൊളസ്ട്രോൾ രക്തധമനികൾക്ക് തടസ്സം സൃഷ്ടിക്കുന്നതുമായി നേരിട്ട് ബന്ധപ്പെട്ടിരിക്കുന്നു, അതിനാൽ ഇത് നല്ല ഭക്ഷണത്തിലൂടെ കൈകാര്യം ചെയ്യേണ്ടത് അത്യാവശ്യമാണ്. ട്രൈഗ്ലിസറൈഡുകളെ സംബന്ധിച്ചിടത്തോളം, രക്തധമനികളുടെ കാഠിന്യം, ധമനിയുടെ മതിലുകൾ കട്ടിയാക്കൽ എന്നിവയുമായി അവ ബന്ധപ്പെട്ടിരിക്കുന്നു – ഇത് ഹൃദയസംബന്ധമായ പ്രശ്നങ്ങൾ വർദ്ധിപ്പിക്കുവാൻ ഇടയാക്കും. ഈ കൊഴുപ്പിന്റെ അളവ് ഗണ്യമായി കുറയ്ക്കുന്നതിന് അമുക്കുരം ഏറെ ഫലപ്രദമായ ഒറ്റമൂലിയാണ്.

പുരാതന വൈദ്യശാസ്ത്രത്തിൽ മസ്തിഷ്ക സംബന്ധമായ പരിക്കുകൾക്കുള്ള ചികിത്സയായി അശ്വഗന്ധ അഥവാ അമുക്കുരം ഉപയോഗിച്ചിരുന്നു. വാർദ്ധക്യത്തിന്റെ പ്രത്യാഘാതങ്ങൾ അകറ്റുന്നതിലൂടെയും ആന്റിഓക്‌സിഡന്റ് പ്രവർത്തനം പ്രോത്സാഹിപ്പിക്കുന്നതിലൂടെയും നാഡീകോശങ്ങൾ പഴയപടിയാക്കുന്നതിലൂടെയും, ഇവ തലച്ചോറിന്റെ പ്രവർത്തനം മെച്ചപ്പെടുത്തുന്നതിനുള്ള ഒരു അമൃതമായി കണക്കാക്കപ്പെടുന്നു. നിങ്ങളുടെ തലച്ചോറിലെ ഓക്സിഡേറ്റീവ് സമ്മർദ്ദം കുറയ്ക്കുന്നതിനും ഓർമ്മശക്തി വർദ്ധിപ്പിക്കുന്നതിനും പ്രകടനം മികച്ചതാക്കുന്നതിനും ശ്രദ്ധ വർദ്ധിപ്പിക്കുന്നതിനും ഇത് ഉത്തമമാണെന്ന് അറിയപ്പെടുന്നു.

അശ്വഗന്ധ അഥവാ അമുക്കുരം താരതമ്യേന സുരക്ഷിതമെന്ന് കരുതുന്ന ഒരു ഔഷധസസ്യമാണെങ്കിലും, ഇത് ചെറിയ പാർശ്വഫലങ്ങൾക്കും കാരണമായേക്കാം.അതിനാൽ ഒരു ആരോഗ്യവിദഗ്ധന്റെ നിർദ്ദേശപ്രകാരം മാത്രം ഇത് കഴിക്കുന്നതാണ് ഉത്തമം.