ഓടി തോൽക്കരുത് !

കേരളത്തിൽ ട്രെയിൻ തട്ടിയുള്ള മരണം ഏറ്റവും കൂടുതൽ കോഴിക്കോട് – കണ്ണൂർ പാതയിലാണെന്നാണ് റെയിൽവേ സുരക്ഷാ വിഭാഗത്തിന്റെ കണ്ടെത്തൽ.ആളുകൾ അനധികൃതമായി പാളത്തിൽ പ്രവേശിക്കുന്നതാണ് മരണനിരക്ക് കൂടാൻ കാരണമായി ചൂണ്ടിക്കാട്ടുന്നത്.പാലക്കാട് ഡിവിഷനിൽ 600 കിലോമീറ്റർ ദൈർഘ്യമുള്ള റെയിൽവേ ട്രാക്കുകളാണുള്ളത്.ഇതിൽ 90 കിലോമീറ്റർ മാത്രം ദൈർഘ്യം വരുന്ന കോഴിക്കോട് – കണ്ണൂർ റൂട്ടാണ് കഴിഞ്ഞ കുറെ വർഷങ്ങളായി മരണത്തിന്റെ ഹോട്ട് സ്പോട്ടായി മാറിയിരിക്കുന്നത്.

റെയില്‍വേ പാളം മുറിച്ചു കടക്കുന്നതിനിടെ മരിച്ചവരുടെ എണ്ണത്തില്‍ കഴിഞ്ഞ വര്‍ഷങ്ങളെക്കാൾ 2021- ല്‍ വന്‍ വര്‍ധനവാണ് ഉണ്ടായിരിക്കുന്നത്.ഡിസംബർ വരെ പാലക്കാട് ഡിവിഷനില്‍ ട്രെയിന്‍ തട്ടി മരിച്ചവരുടെ എണ്ണം 154 ആയിരുന്നു.ഇതിൽ 104 ഉം കോഴിക്കോട്-കണ്ണൂർ റൂട്ടിലാണ്.യാത്രക്കാര്‍ക്ക് പാളം കടക്കുന്നതിനായി റോഡും ഓവര്‍ ബ്രിജുകളും സ്ഥാപിച്ചിട്ടുണ്ടെങ്കിലും പലരും എളുപ്പവഴിക്ക് പാളം മുറിച്ചുകടക്കുകയാണ് പതിവ്.കൂടാതെ വേലികളും മുന്നറിയിപ്പു ബോര്‍ഡുകളൊക്കെ ഇവിടെ സജീവമാണെങ്കിലും ആളുകള്‍ റെയില്‍വേ പാളം മുറിച്ചാണ് കടക്കുന്നത്.ഇങ്ങനെ റെയില്‍വേയില്‍ അതിക്രമിച്ചു കയറിയാല്‍ 6 മാസം വരെ തടവും 1000 രൂപ പിഴയും ലഭിക്കും.ഇത്തരത്തിലുളള 1561 കേസുകളാണ് കഴിഞ്ഞ വർഷം മാത്രം രജിസ്റ്റര്‍ ചെയ്തിരിക്കുന്നത്.എന്നിട്ടും അപകടങ്ങളുടെയും അതുമൂലമുള്ള മരണനിരക്കും കുറയുന്നില്ലെന്ന് മാത്രം.

പാലക്കാട് ഡിവിഷനില്‍ കൂടുതലും അതിവേഗത്തില്‍ ഉളള ട്രെയിനുകളാണ് കടന്നു പോകുന്നത്.മണിക്കൂറില്‍ 110 വേഗത്തിലാണ് പോത്തനൂര്‍ മുതല്‍ മംഗളൂരു വരെ പ്രധാന പാതയില്‍ ട്രെയിനുകള്‍ ഓടുന്നത്.മുന്‍പ് ട്രെയിനുകള്‍ കടന്നു വരുന്നതറിയിക്കാന്‍ ട്രെയിന്‍ പുറപ്പെടുവിക്കുന്ന ശബ്ദത്തിനു കഴിഞ്ഞിരുന്നു.എന്നാല്‍ വൈദ്യുതീകരണം വന്നതോടെ ഇലക്ട്രിക് എന്‍ജിനുകളുടെ ശബ്ദം കുറവായത് അപകടങ്ങള്‍ കൂടുന്നതിനും ഇടയായിട്ടുണ്ട്.ജനങ്ങളുടെ പൂര്‍ണ്ണപിന്തുണയുണ്ടെങ്കില്‍ മാത്രമേ അപകടങ്ങള്‍ കുറയ്ക്കാന്‍ സാധിക്കുകയുളളുവെന്നെ് റെയില്‍വേ ഡിവിഷനല്‍ മാനേജര്‍ ത്രിലോക് കോത്തിരി പറയുന്നു.