ആകാശം ഭരിച്ചാല് യുദ്ധം ജയിക്കുമോ? വിയറ്റ്നാമിലും ഇറാഖിലും കൊസോവോയിലും തുടങ്ങിവച്ചത് ഇതേ വീരവാദം; തോറ്റമ്പിയത് ചരിത്രം! സാങ്കേതിക വിദ്യയെന്ന മിഥ്യാ ധാരണ; 105 വര്ഷം പഴക്കമുള്ള യുദ്ധമുറ; ഹിറ്റ്ലര് മുതല് ഹെഗ്സെത്ത് വരെ; ‘ദി കമാന്ഡ് ഓഫ് ദി എയര്’ പറയുന്നത്
സദ്ദാം ഹുസൈനെ വീഴ്ത്താന് വ്യോമാക്രമണം പരാജയപ്പെട്ടപ്പോള്, ഭരണം വേഗത്തില് വീഴുമെന്ന് താന് വ്യക്തിപരമായി വാഗ്ദാനം ചെയ്തിട്ടില്ലെന്നായിരുന്നു റംസ്ഫെല്ഡ് പറഞ്ഞത്. 'ആരെങ്കിലും അങ്ങനെ വിശ്വസിക്കാന് ഇടയുള്ള എന്തെങ്കിലും പറഞ്ഞിട്ടുണ്ടാകുമോ? ഞാന് അങ്ങനെ കരുതുന്നു'- എന്നായിരുന്നു പ്രതികരണം! കിലുക്കം സിനിമയില് ലോട്ടറിയടിച്ച ഇന്നസെന്റിനെ വായനക്കാര്ക്ക് ഓര്മ വന്നിട്ടുണ്ടാകണം!
ന്യൂയോര്ക്ക്: ഡൊണാള്ഡ് ട്രംപിന്റെ ഇറാന് സൈനിക തന്ത്രത്തിന്റെയും അദ്ദേഹത്തിന്റെ പ്രതിരോധ സെക്രട്ടറി പീറ്റ് ഹെഗ്സെത്തിന്റെ ആക്രമണാത്മകമായ പ്രസംഗങ്ങളുടെയും വേരുകള് തേടുക എന്നതിനര്ത്ഥം 105 വര്ഷം പുറകോട്ട് നോക്കുക എന്നാണ്. ഫാസിസ്റ്റ് യുഗത്തിന് തുടക്കമിട്ടുകൊണ്ട് ബെനിറ്റോ മുസ്സോളിനിയും അദ്ദേഹത്തിന്റെ ‘ബ്ലാക്ക് ഷര്ട്ടുകളും’ റോമിലേക്ക് മാര്ച്ച് ചെയ്യുന്നതിന് ഒരു വര്ഷം മുമ്പ്, അതായത് 1921-ല്, ജിയുലിയോ ഡൗഹെറ്റ് എന്ന ഇറ്റാലിയന് ജനറല് ‘ദ കമാന്ഡ് ഓഫ് ദി എയര്’ (The Command of the Air) പ്രസിദ്ധീകരിച്ചു. പുസ്തകം യുദ്ധമുറയില് വിപ്ലവം തന്നെ നിര്ദ്ദേശിച്ചു.
ഭാവിയിലെ വിജയം എന്നത് ഒന്നാം ലോകമഹായുദ്ധത്തിലെ മടുപ്പിക്കുന്ന കിടങ്ങുകളിലെ പോരാട്ടത്തിലൂടെയാകില്ലെന്ന് അദ്ദേഹം പറഞ്ഞു. പകരം, അത് വലിയ തോതിലുള്ള വ്യോമാക്രമണങ്ങളിലൂടെയായിരിക്കും. ‘പോരാളികളെ മാത്രമല്ല, സാധാരണക്കാരെയും സിവിലിയന് അടിസ്ഥാന സൗകര്യങ്ങളെയും ലോജിസ്റ്റിക്സിനെയും ലക്ഷ്യം വയ്ക്കണം. കിടങ്ങ് തകര്ക്കുന്നതിനേക്കാള് വളരെ പ്രധാനമാണ് റെയില്വേ സ്റ്റേഷന്, ബേക്കറി, യുദ്ധ പ്ലാന്റ് എന്നിവ നശിപ്പിക്കുകയോ വിതരണ നിരകള്ക്കോ നീങ്ങുന്ന ട്രെയിനുകള്ക്കോ നേരെ വെടിയുതിര്ക്കുകയോ ചെയ്യുക എന്നത്’
‘ഒരു വര്ഗത്തെ തന്നെ തുടച്ചുനീക്കണമെന്നുണ്ടെങ്കില് പറക്കുന്ന പക്ഷികളെ മാത്രം വെടിവെച്ചിട്ടാല് പോരാ. ഏറ്റവും ഫലപ്രദമായ മാര്ഗം അവയുടെ മുട്ടകളും കൂടുകളും വ്യവസ്ഥാപിതമായി നശിപ്പിക്കുക എന്നതാകും’ എന്നും ക്രൂരമായ ഉപമയോടെ എഴുതി.
‘സാധാരണക്കാരുടെ മനോവീര്യം തകര്ക്കുക’ എന്നതിന് ഊന്നല് നല്കിയ ഡൗഹെറ്റിന്റെ സിദ്ധാന്തങ്ങശളാണു ഹിറ്റ്ലറെ വ്യോമശക്തി വിന്യസിക്കാന് പ്രചോദിപ്പിച്ചത്. ഗെര്ണിക്കയിലെ ആക്രമണവും ലണ്ടനിലെ നിരന്തരമായ ബോംബാക്രമണവും ഇതിന് ഉദാഹരണങ്ങളാണ്.
സാങ്കേതികവിദ്യയില് താല്പര്യമുള്ള അമേരിക്കന് വ്യോമ തന്ത്രജ്ഞരായ ജനറല് കര്ട്ടിസ് ലെമേയെയും ഇത് ആകര്ഷിച്ചു. ഡസന് കണക്കിന് ജാപ്പനീസ് നഗരങ്ങളിലെ ബോംബാക്രമണത്തിനും ജപ്പാനിലെ ജലപാതകളില് മൈനുകള് വിരിച്ച ‘ഓപ്പറേഷന് സ്റ്റാര്വേഷനും’ ഹിരോഷിമയിലെയും നാഗസാക്കിയിലെയും ആണവാക്രമണങ്ങള്ക്കും മേല്നോട്ടം വഹിച്ചത് ഇദ്ദേഹമായിരുന്നു. പിന്നീട് ഇദ്ദേഹം യുഎസ് വ്യോമസേനയുടെ സ്ട്രാറ്റജിക് എയര് കമാന്ഡ് നയിച്ചു.
അമേരിക്കയും വ്യോമാക്രമണവും
ഡൗഹെറ്റ് എഴുതിയ പുസ്തകത്തെക്കുറിച്ച് യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് കേട്ടിട്ടുണ്ടോ എന്ന് വ്യക്തമല്ല, എന്നാല് ഇറാനെതിരെ ട്രംപ് നടത്തുന്ന ‘എപിക് ഫ്യൂറി’യെ (Epic Fury) കുറിച്ചുള്ള സെക്രട്ടറിയുടെ ആവേശകരമായ പ്രസംഗങ്ങളില് ഈ ഇറ്റാലിയന് ഓഫീസറുടെ ചിന്തകളുടെ ഇഴകള് നെയ്തിരിക്കുന്നത് കാണാം.
പുതിയ തരത്തിലുള്ള അമേരിക്കന് തന്ത്രമാണെന്ന ഹെഗ്സെത്തിന്റെ അവകാശവാദങ്ങള്ക്കും ‘ഭീരുക്കളായ പഴയ രാഷ്ട്രീയ-സൈനിക നേതാക്കള്ക്കുള്ള’ മറുപടികള്ക്കും ഇടയിലും, അദ്ദേഹത്തിന്റെ ‘ചരിത്രത്തിലെ ഏറ്റവും മാരകവും കൃത്യവുമായ വ്യോമപ്രചാരണം’ എന്ന വാഗ്ദാനം പുതിയൊരു തന്ത്രത്തേക്കാള് ഉപരി പഴയ കാര്യത്തിന്റെ പുനരുപയോഗം മാത്രമായാണ് കാണപ്പെടുന്നത്.
1991-ല് ഇറാഖിന് നേരെയുള്ള ‘ഡെസേര്ട്ട് സ്റ്റോം’ ആക്രമണങ്ങളിലും 1999-ല് സെര്ബിയയ്ക്കെതിരായ വ്യോമയുദ്ധത്തിലും 2003-ലെ ‘ഓപ്പറേഷന് ഇറാഖി ഫ്രീഡ’ത്തിലും വ്യക്തമായ മാതൃകയുണ്ട്. സാങ്കേതികവിദ്യയിലെ മുന്നേറ്റങ്ങളും വര്ദ്ധിച്ചുവരുന്ന വ്യോമശക്തിയും യുദ്ധമുറയെ വിപ്ലവകരമായി മാറ്റാന് തങ്ങളെ അനുവദിച്ചുവെന്ന് സൈനിക നേതാക്കള് വീണ്ടും വീണ്ടും വിശ്വസിക്കുന്നു.
‘ഏറ്റവും കുറഞ്ഞ സമയത്തിനുള്ളില് ഏറ്റവും വലിയ നാശനഷ്ടങ്ങള് വരുത്താന്’ ആകാശത്തുനിന്ന് ബോംബുകള് വര്ഷിക്കുന്നതിലായിരുന്നു ഡൗഹെറ്റിന്റെ ശ്രദ്ധ. ഹെഗ്സെത്തിന്റെ ബ്രീഫിംഗുകളിലും ഇതേ വിഷയം മുഴങ്ങുന്നുണ്ട്. ‘അളവിന് അതിന്റേതായ ഒരു ഗുണമുണ്ട്. ‘വാസ്തവത്തില്, ഇന്ന് അമേരിക്ക ഇതുവരെ നടത്തിയതില് വെച്ച് ഏറ്റവും കൂടുതല് ആക്രമണങ്ങള് നടത്തിയ ദിവസമായിരിക്കും… സോര്ട്ടികളുടെ എണ്ണവും ബോംബര് വിമാനങ്ങളുടെ വിന്യാസവും ഏറ്റവും ഉയര്ന്ന നിലയിലാണ്’- അദ്ദേഹം പറഞ്ഞു.
പിന്നെ സിവിലിയന് അടിസ്ഥാന സൗകര്യങ്ങള് ബോംബിടുന്നതിലായിരുന്നു ഡൗഹെറ്റിന്റെ ശ്രദ്ധ. ജനങ്ങള് തങ്ങളുടെ നേതാക്കള്ക്കെതിരെ കലാപം നടത്താന് ഇത് കാരണമാകുമെന്ന് അദ്ദേഹം കരുതി. ‘ഭീതിക്കും കഷ്ടപ്പാടുകള്ക്കും അറുതി വരുത്താന്, സ്വയം സംരക്ഷണാര്ത്ഥം ജനങ്ങള് തന്നെ എഴുന്നേറ്റ് യുദ്ധം അവസാനിപ്പിക്കാന് ആവശ്യപ്പെടുന്ന സമയം ഉടന് വരും’- അദ്ദേഹം എഴുതി.
ഹെഗ്സെത്തും സാധാരണക്കാരുടെ മനോവീര്യം തകര്ക്കുന്നതിനെക്കുറിച്ച് പറയുന്നുണ്ട്. എങ്കിലും അദ്ദേഹം സാധാരണക്കാരെ നേരിട്ട് ആക്രമിക്കാന് പ്രേരിപ്പിച്ചിട്ടില്ല. ‘ഞങ്ങള് യോദ്ധാക്കളാണ്, ശത്രുവിനെ കൊല്ലാനും അവരുടെ ഇച്ഛാശക്തി തകര്ക്കാനും പരിശീലിപ്പിക്കപ്പെട്ടവര്. ഇറാനിയന് ജനത ഈ അവിശ്വസനീയമായ അവസരം പ്രയോജനപ്പെടുത്തുമെന്ന് ഞങ്ങള് പ്രതീക്ഷിക്കുന്നു. പ്രസിഡന്റ് ട്രംപ് വ്യക്തമാക്കിയതുപോലെ, ഇപ്പോള് നിങ്ങളുടെ സമയമാണ്’- ഹെഗ്സെത്ത് പറഞ്ഞു.
ഹെഗ്സെത്തും അദ്ദേഹത്തിന് മുമ്പുള്ളവരും തമ്മിലുള്ള ഒരു വ്യത്യാസം അവര് കുറച്ചുകൂടി മര്യാദയോടെയാണ് സംസാരിച്ചിരുന്നത് എന്നതാണ്. സെന്റര് ഫോര് ഡിഫന്സ് ഇന്ഫര്മേഷന് നടത്തിയിരുന്ന വിന്സ്ലോ വീലര് പറയുന്നു. ഇത് ഉള്ളടക്കത്തേക്കാള് ഉപരി ശൈലിയിലുള്ള മാറ്റമാണെന്ന് അദ്ദേഹം പറഞ്ഞു.
‘മനുഷ്യസ്വഭാവം മാറില്ലെന്ന് അവര് മനസിലാക്കുന്നില്ല. സാങ്കേതികവിദ്യ കൂടുതല് സങ്കീര്ണമാകുന്നു. തങ്ങള് കൂടുതല് കൃത്യതയുള്ളവരാണെന്ന് അവര് കണ്ടെത്തുന്നു. പക്ഷേ അത് മനുഷ്യസ്വഭാവത്തെ മാറ്റുന്നില്ല’- വീലര് പറഞ്ഞു. മറ്റൊരു വിധത്തില് പറഞ്ഞാല്, ഭൂമിയിലുള്ള ആളുകള് പ്രവചനാതീതമായ രീതിയില് പ്രതികരിക്കുന്നു. ബോംബാക്രമണം പലപ്പോഴും പ്രതിരോധവും ഐക്യവും വളര്ത്തുകയാണ് ചെയ്യുന്നത്. ‘ബ്രിട്ടീഷുകാര്ക്ക് നേരെയുള്ള ജര്മ്മന് ആക്രമണങ്ങളെക്കുറിച്ച് ചിന്തിക്കുക, അത് ബ്രിട്ടീഷുകാരുടെ നിശ്ചയദാര്ഢ്യത്തെ ദുര്ബലപ്പെടുത്തിയോ? ഇല്ല. അത് ജനങ്ങളെ ഒന്നിപ്പിക്കാന് കാരണമായി. കീഴടങ്ങല് അചിന്തനീയമായിരുന്നു’- അദ്ദേഹം പറഞ്ഞു.
സാങ്കേതികവിദ്യയെ തോല്പ്പിക്കാന് വടക്കന് വിയറ്റ്നാമീസ് മൂത്രം
വിയറ്റ്നാം യുദ്ധസമയത്ത് ആകാശത്തു നിന്നുള്ള സമ്പൂര്ണ നിയന്ത്രണത്തെക്കുറിച്ചുള്ള മിഥ്യാധാരണകള് പ്രകടമായിരുന്നു. വടക്കന് വിയറ്റ്നാമീസ് സൈന്യത്തിന് ആയുധങ്ങളും ഉപകരണങ്ങളും എത്തിക്കാന് ഉപയോഗിച്ചിരുന്ന കാട്ടുപാതയായ ‘ഹോ ചി മിന് ട്രയല്’ അടച്ചുപൂട്ടാന് വ്യോമശക്തിയും സാങ്കേതികവിദ്യയും കൊണ്ട് കഴിയുമെന്ന് അക്കാലത്തെ ആളുകള് കരുതിയതിനെക്കുറിച്ച് ‘കില് ചെയിന്’ (Kill Chain) എന്ന പുസ്തകത്തില് ആന്ഡ്രൂ കോക്ക്ബേണ് വിവരിക്കുന്നുണ്ട്.
അമേരിക്കയുടെ പദ്ധതി ഇതായിരുന്നു: ‘ട്രക്കുകളെയും സൈനികരെയും കണ്ടെത്താന് റിമോട്ട് സെന്സറുകള് ഉപയോഗിക്കുക. ഡിറ്റക്ടറുകള് പ്രവര്ത്തിച്ചു കഴിഞ്ഞാല് ബോംബറുകള്ക്ക് താഴെയുള്ള സൈനികരെ നശിപ്പിക്കാം. വായുവിലെ അമോണിയയുടെ സാന്നിധ്യം തിരിച്ചറിഞ്ഞ് ആളുകളെ കണ്ടെത്താന് ഒരു തരം സെന്സര് ഉപയോഗിച്ചു. വടക്കന് വിയറ്റ്നാമീസ് കുറഞ്ഞ ചിലവിലുള്ള പരിഹാരം കണ്ടെത്തി. മൃഗങ്ങളുടെ മൂത്രം നിറച്ച കുപ്പികള് ഉപയോഗിച്ച് അവര് അമോണിയ സെന്സറുകളെ കബളിപ്പിച്ചു. ഹോ ചി മിന് ട്രയല് ഒരിക്കലും അടച്ചുപൂട്ടാന് കഴിഞ്ഞില്ല.
ഇപ്പോള് ‘എപിക് ഫ്യൂറി’യില് പുറത്തുവിടുന്ന തരം ബ്ലാക്ക് ആന്ഡ് വൈറ്റ് വീഡിയോകള് ആദ്യമായി അവതരിപ്പിച്ചത് 1991-ലെ ഡെസേര്ട്ട് സ്റ്റോം യുദ്ധത്തിലായിരുന്നു. കുവൈറ്റിനെ ഇറാഖില്നിന്ന് മോചിപ്പിക്കാനുള്ള ശ്രമമായിരുന്നു അത്. ‘ആദ്യമായി, നാട്ടിലെ ജനങ്ങള്ക്ക് വ്യോമസേനയുടെ കൃത്യതയും മാരകശേഷിയും പ്രൊഫഷണല് കാര്യക്ഷമതയോടെ കാണാനും ആസ്വദിക്കാനും കഴിഞ്ഞു’- എന്ന് കോക്ക്ബേണ് എഴുതി.
യുദ്ധത്തിന്റെ പ്രാരംഭ ദിവസങ്ങളില് അമേരിക്കന് മാധ്യമങ്ങള് വലിയ ആവേശത്തിലായിരുന്നു. ‘ചരിത്രപരമായ കൃത്യതയോടും പ്രഹരശേഷിയോടും കൂടി അമേരിക്കയും സഖ്യകക്ഷികളും ബുധനാഴ്ച ഇറാഖില് മരണവും നാശവും വിതച്ചു’ എന്നാണ് യുഎസ് ടുഡേ (USA Today) എഴുതിയത്.
യുദ്ധത്തിലെ ആദ്യ ബോംബ് വര്ഷിച്ച എഫ്-117എ സ്റ്റെല്ത്ത് അറ്റാക്ക് എയര്ക്രാഫ്റ്റ് ആയിരുന്നു അന്നത്തെ സാങ്കേതിക താരം. പെന്റഗണ് സന്തോഷത്തോടെ വീഡിയോകള് പങ്കുവച്ചു. എന്നാല് ആ വ്യോമയുദ്ധത്തെക്കുറിച്ചുള്ള അവകാശവാദങ്ങള് ഭാഗികമായ സത്യങ്ങള് മാത്രമായിരുന്നു. 1996-ലെ ഒരു ജിഎഒ പഠനം കണ്ടെത്തിയത്, സ്റ്റെല്ത്ത് എഫ്-117എ വിമാനങ്ങളുടെ ബോംബാക്രമണത്തിന്റെ 80% വിജയ നിരക്ക് ഊതിപ്പെരുപ്പിച്ചതായിരുന്നു എന്നാണ്. യഥാര്ത്ഥ നിരക്ക് 41% നും 60% നും ഇടയിലായിരുന്നു. ലക്ഷ്യങ്ങളെക്കുറിച്ചുള്ള അവകാശവാദങ്ങളും പെരുപ്പിച്ചു കാണിച്ചവയായിരുന്നു. ‘ലേസര് നിയന്ത്രിത ബോംബുകള് ഉപയോഗിച്ച് ഒരു ലക്ഷ്യത്തിന് ഒരു ബോംബ് എന്ന ശേഷിയെക്കുറിച്ച് പ്രതിരോധ വകുപ്പും കരാറുകാരും ഉന്നയിച്ച അവകാശവാദം യുദ്ധത്തില് തെളിയിക്കപ്പെട്ടില്ല. ശരാശരി, വിജയകരമായി നശിപ്പിച്ച ഓരോ ലക്ഷ്യത്തിനും 11 ടണ് ഗൈഡഡ് ബോംബുകളും 44 ടണ് അണ്ഗൈഡഡ് ബോംബുകളും ഉപയോഗിച്ചിട്ടുണ്ട്’- ജിഎഒ റിപ്പോര്ട്ട് ചെയ്തു.
ഒടുവില്, 43 ദിവസങ്ങള്ക്ക് ശേഷം സദ്ദാം ഹുസൈന് കുവൈറ്റില്നിന്ന് പിന്മാറി. എന്നാല് സദ്ദാം ഹുസൈന് ഇറാഖില് തന്നെ അധികാരത്തില് തുടര്ന്നു, അദ്ദേഹത്തിന്റെ ഭരണം തകരാതെ നിന്നു.
1999 മാര്ച്ചില് അടുത്ത വലിയ വ്യോമയുദ്ധം നടന്നു: കൊസോവോയിലെ സെര്ബ് യുദ്ധക്കുറ്റങ്ങള് അവസാനിപ്പിക്കാനുള്ള ‘ഓപ്പറേഷന് അലൈഡ് ഫോഴ്സ്’. ഈ യുദ്ധത്തിനും സ്വന്തം ആയുധ താരങ്ങളുണ്ടായിരുന്നു. അത്യാധുനികമായ ബി2 ബോംബറുകള് വിന്യസിക്കപ്പെട്ടു. ‘വ്യോമസേനയ്ക്കുള്ളില് വലിയ ആഹ്ലാദമായിരുന്നു’ എന്നാണ് ലോസ് ഏഞ്ചല്സ് ടൈംസ് റിപ്പോര്ട്ട് ചെയ്തത്. എന്നാല്, ‘ദി ഗാര്ഡിയന്’ റിപ്പോര്ട്ട് ചെയ്തതുപോലെ, ആയിരക്കണക്കിന് സോര്ട്ടികളും പതിനായിരക്കണക്കിന് ബോംബുകളും വര്ഷിച്ചിട്ടും, കൊസോവോയിലെ സെര്ബുകളുടെ 300 ടാങ്കുകളില് 13 എണ്ണം മാത്രമാണ് നാറ്റോയ്ക്ക് നശിപ്പിക്കാന് കഴിഞ്ഞത്.
യുഎസ് വ്യോമശക്തിയുടെ ഏറ്റവും അറിയപ്പെടുന്ന അതിശയോക്തി 2003-ല് ജോര്ജ്ജ് ഡബ്ല്യു ബുഷിന്റെയും പ്രതിരോധ സെക്രട്ടറി ഡൊണാള്ഡ് റംസ്ഫെല്ഡിന്റെയും കീഴില് നടന്ന ‘ഷോക്ക് ആന്ഡ് ഓ’ (Shock and Awe) ബോംബിംഗ് ആയിരിക്കാം. യുദ്ധം തുടങ്ങുമ്പോള് ഉപയോഗിച്ച ഭാഷ പല വിധത്തിലും ഹെഗ്സെത്ത് ഉപയോഗിച്ചതിന് സമാനമായിരുന്നു.
വ്യോമാക്രമണങ്ങള് ‘മുമ്പ് കണ്ടിട്ടില്ലാത്ത വിധത്തിലുള്ള ശക്തിയും വ്യാപ്തിയും ഉള്ളതായിരിക്കും’ എന്ന് റംസ്ഫെല്ഡ് വീമ്പിളക്കി. ഇറാഖിന്റെ നിയന്ത്രണ സംവിധാനങ്ങളെയും സൈനിക അടിസ്ഥാന സൗകര്യങ്ങളെയും തകര്ക്കാനും മനോവീര്യം കെടുത്താനും 3,000 കൃത്യതയുള്ള ബോംബുകളുമായി 48 മണിക്കൂര് നീളുന്ന ബോംബിംഗ് ആസൂത്രണം ചെയ്തതായി പെന്റഗണ് റിപ്പോര്ട്ടര്മാരോട് പറഞ്ഞു.
സദ്ദാം ഹുസൈനെ വീഴ്ത്താന് വ്യോമാക്രമണം പരാജയപ്പെട്ടപ്പോള്, ഭരണം വേഗത്തില് വീഴുമെന്ന് താന് വ്യക്തിപരമായി വാഗ്ദാനം ചെയ്തിട്ടില്ലെന്നായിരുന്നു റംസ്ഫെല്ഡ് പറഞ്ഞത്. ‘ആരെങ്കിലും അങ്ങനെ വിശ്വസിക്കാന് ഇടയുള്ള എന്തെങ്കിലും പറഞ്ഞിട്ടുണ്ടാകുമോ? ഞാന് അങ്ങനെ കരുതുന്നു’- എന്നായിരുന്നു പ്രതികരണം! കിലുക്കം സിനിമയില് ലോട്ടറിയടിച്ച ഇന്നസെന്റിനെ വായനക്കാര്ക്ക് ഓര്മ വന്നിട്ടുണ്ടാകണം!
വിയറ്റ്നാമിലും ഇറാഖിലും കൊസോവോയിലും സാങ്കേതികവിദ്യയെയും കൃത്യതയെയും കുറിച്ച് ഉന്നയിച്ച അവകാശവാദങ്ങളൊന്നും യഥാര്ത്ഥത്തില് യുദ്ധം ജയിക്കാന് സഹായിച്ചിട്ടില്ലെന്നു വിമര്ശകര് പറയുന്നു. ഹെഗ്സെത്തും നിലവിലെ സംഘര്ഷത്തിന്റെ മറ്റ് അനുകൂലികളും അമേരിക്കന് ആയുധങ്ങളെയും സാങ്കേതികവിദ്യയെയും കുറിച്ച് വീമ്പിളക്കുന്ന ഏറ്റവും പുതിയ ആളുകള് മാത്രമാണ്.
ഇറാാനെ തോല്പ്പിക്കാന് ആര്ട്ടിഫിഷ്യല് ഇന്റലിജന്സ് സഹായിക്കുന്നു എന്നതാണ് യുഎസ് ആയുധപ്പുരയിലെ ഏറ്റവും പുതിയ അവകാശവാദം. ‘ഞങ്ങള്ക്ക് ധാരാളം സ്വയം നിയന്ത്രിത
സംവിധാനങ്ങളുണ്ട് (autonomous systems). അവയില് സ്മാര്ട്ട് എഐ വശങ്ങള് ഉള്പ്പെടുത്തിയിട്ടുണ്ട്’- ഹെഗ്സെത്ത് പറഞ്ഞു.
എന്നാല് പതിറ്റാണ്ടുകളായി യുഎസ് നേരിടുന്ന വ്യോമാധിപത്യത്തിലെ അതേ പ്രശ്നം ഹെഗ്സെത്ത് ഒടുവില് പരിഹരിച്ചുവെന്ന് ഇതിനര്ത്ഥമുണ്ടോ? എളുപ്പത്തിലുള്ള വിജയം എന്ന മിഥ്യാധാരണ – 100 വര്ഷം പഴക്കമുള്ള അതേ യുദ്ധ സിദ്ധാന്തം – അമേരിക്കയെ ഏറ്റവും പുതിയ കുഴപ്പത്തിലേക്ക് വലിച്ചിഴയ്ക്കും.
#TrumpIranWar, #DonaldTrump, #PeteHegseth, #EpicFury, #USMilitary, #IranConflict, #AirWarfare, #GiulioDouhet, #MilitaryStrategy, #AITech, #PrecisionBombing, #ShockAndAwe, #DefenseNews, #GlobalPolitics, #MiddleEastCrisis, #Pentagon, #WarHistory, #USAirForce, #Geopolitics, #BreakingNews, #WorldWarAnalysis, #Dailyhunt, #DailyhuntNews, #DailyhuntMalayalam, #GoogleNews, #GoogleDiscover, #TrendingNews, #MalayalamNews, #KeralaNews, #PoliticalInsights, #WarStrategies2026, #InternationalRelations
