അവകാശ വാദങ്ങള്ക്കപ്പുറം ഇന്ത്യയുടെ ഭൂപടം നല്കുന്ന സന്ദേശമെന്ത്? മുന് നിലപാടില് നിന്നുള്ള മാറ്റമെന്നും നയതന്ത്ര നേട്ടമെന്നും വിദഗ്ധര്; യുദ്ധത്തിനു ശേഷം കശ്മീര് വിഷയം വീണ്ടും ചര്ച്ചയിലേക്ക്
ന്യൂയോര്ക്ക്: ആവേശത്തിനപ്പുറം ഇന്ത്യയുടെ ഭൂപടം പുറത്തുവിട്ടതിലൂടെ അമേരിക്കയുടെ മുന് നിലപാടില്നിന്നുള്ള മാറ്റമെന്നു നയതന്ത്ര വിദഗ്ധര്. ശനിയാഴ്ച ന്യൂഡല്ഹിയും വാഷിംഗ്ടണും ഇടക്കാല വ്യാപാര കരാറിന്റെ ചട്ടക്കൂട് പ്രഖ്യാപിച്ചപ്പോഴാണു ട്രംപ് ഭരണകൂടം ഇന്ത്യയുടെ ഭൂപടവും പ്രസിദ്ധീകരിച്ചത്. ഇതു സോഷ്യല് മീഡിയയില് വലിയ ചര്ച്ചയാവുകയും ചെയ്തു. വ്യാപാര കരാറിന്റെ വിശദാംശങ്ങള് പുറത്തുവിടുന്നതിനിടയില്, യുഎസ് ട്രേഡ് റെപ്രസെന്റേറ്റീവ് ഓഫീസ് പുറത്തിറക്കിയ ഭൂപടത്തില് പാക് അധീന കശ്മീര് (POK) ഉള്പ്പെടെയുള്ള ജമ്മു കശ്മീര് മുഴുവനായും ഇന്ത്യയുടെ ഭാഗമായാണ് കാണിച്ചിരിക്കുന്നത്. കൂടാതെ, ചൈന അവകാശവാദം ഉന്നയിക്കുന്ന അക്സായ് ചിന്നും ഈ ഭൂപടത്തില് ഇന്ത്യയുടെ ഭാഗമായി ഉള്പ്പെടുത്തിയിട്ടുണ്ട്.
ഇന്ത്യയുടെ പ്രാദേശിക പരമാധികാരത്തിന് യുഎസ് അംഗീകാരം ആവശ്യമാണെന്നല്ല ഇതിനര്ത്ഥം. കശ്മീര് രാജ്യത്തിന്റെ അവിഭാജ്യ ഘടകമാണെന്ന് ഇന്ത്യ എപ്പോഴും ഉറച്ചുനിന്നിട്ടുണ്ട്. എങ്കിലും, അമേരിക്കയുടെ മുന് നിലപാടുകളില് നിന്നുള്ള ശ്രദ്ധേയമായ മാറ്റമാണിത്. മനഃപൂര്വമാണെങ്കിലും ആകസ്മികമാണെങ്കിലും, പാകിസ്ഥാന് ശക്തമായ ഒരു നയതന്ത്ര സന്ദേശം നല്കിയിരിക്കുന്നു- അമേരിക്കന് നേതൃത്വം ഇന്ത്യയുടെ ഭൂപടവുമായി യോജിച്ചു നില്ക്കുന്നു എന്ന്.
ഭൂപടം പ്രധാനമാകുന്നത് എന്തുകൊണ്ട്?
മുന്കാലങ്ങളില്, യുഎസ് അല്ലെങ്കില് അതിന്റെ സ്റ്റേറ്റ് ഡിപ്പാര്ട്ട്മെന്റ് പുറത്തുവിട്ടിരുന്ന ഭൂപടങ്ങളില് പാകിസ്ഥാന്റെ ആശങ്കകള് കണക്കിലെടുത്ത് പാക് അധീന കശ്മീരിനെ (POK) വ്യക്തമായി വേര്തിരിച്ച് കാണിക്കാറുണ്ടായിരുന്നു. എന്നാല് ട്രംപ് ഭരണകൂടം പുറത്തിറക്കിയ ഏറ്റവും പുതിയ ഭൂപടം പാകിസ്ഥാന്റെ അവകാശവാദങ്ങളെ പൂര്ണമായും തള്ളിക്കളയുന്നു.
ഇന്ത്യയും യുഎസും തമ്മിലുള്ള ബന്ധം പ്രതിസന്ധി ഘട്ടത്തിന് ശേഷം ട്രംപിന് കീഴില് പുനഃക്രമീകരിക്കപ്പെടുന്ന ഈ സമയവും നിര്ണായകമാണ്. വ്യാപാര കരാര് പ്രതിസന്ധികള്ക്കിടയില്, ട്രംപ് ഇന്ത്യക്ക് മേല് 50% താരിഫ് ചുമത്തിയിരുന്നു. യുഎസ് സഖ്യകക്ഷികള്ക്കിടയിലെ ഏറ്റവും ഉയര്ന്ന നിരക്കായിരുന്നു ഇത്. പുതിയ വ്യാപാര കരാറിലൂടെ നികുതി 18 ശതമാനമാക്കി കുറച്ചു. ഏഷ്യന് രാജ്യങ്ങള്ക്കിടയിലെ ഏറ്റവും കുറഞ്ഞ നിരക്കാണിത്.
ജോര്ജ്ജ് ഡബ്ല്യു ബുഷ് ഭരണകൂടം ആരംഭിച്ച് തുടര്ന്നുവന്ന പ്രസിഡന്റുമാരും പിന്തുടര്ന്നിരുന്ന ‘ഡി-ഹൈഫനേഷന്’ (de-hyphenation) നയം മാറ്റി, ഇന്ത്യയെയും പാകിസ്ഥാനെയും വീണ്ടും ഒരേ തട്ടില് കാണാനും (re-hyphenate) ട്രംപ് ശ്രമിച്ചിരുന്നു. ലഡാക്കിന്റെ വടക്കുകിഴക്കന് ഭാഗത്തുള്ള തര്ക്കപ്രദേശമായ അക്സായ് ചിന്നും ഭൂപടത്തില് ഇന്ത്യയുടെ ഭാഗമായി കാണിക്കുന്നുണ്ട്. ഇന്ത്യയുടെ എതിര്പ്പുകള് അവഗണിച്ചുകൊണ്ട് ചൈന ഈ പ്രദേശത്തിന് മേല് എപ്പോഴും അവകാശവാദം ഉന്നയിക്കാറുണ്ട്.
യഥാര്ത്ഥത്തില്, യുഎസ് സ്റ്റേറ്റ് ഡിപ്പാര്ട്ട്മെന്റും മറ്റ് ആഗോള ഏജന്സികളും ഉപയോഗിക്കുന്ന ഭൂപടങ്ങളില് ഇന്ത്യയുടെ അതിര്ത്തികള് – പ്രത്യേകിച്ച് ജമ്മു കശ്മീര്, അരുണാചല് പ്രദേശ് എന്നിവ തെറ്റായി ചിത്രീകരിക്കുന്നതിനെതിരെ വിദേശകാര്യ മന്ത്രാലയം (MEA) നിരന്തരം പ്രതിഷേധിച്ചിട്ടുണ്ട്. യുഎസിന്റെ പുതിയ നീക്കം ഇന്ത്യയുടെ ദീര്ഘകാലമായുള്ള ആശങ്ക പരിഹരിക്കുന്നതാണെന്നും വിലയിരുത്തുന്നു.
ഭൗമരാഷ്ട്രീയ വിദഗ്ധരും പ്രതിരോധ വിശകലന വിദഗ്ധരും യുഎസ് നീക്കത്തെ ഉടനടി പ്രശംസിച്ചു. ഭൂപടത്തിന്റെ കാര്യത്തില് യുഎസിനു മുഴുവന് മാര്ക്കും നല്കുന്നെന്നും അഭിനന്ദിക്കുന്നെന്നും റിട്ട. മേജര് ഗൗരവ് ആര്യ എക്സില് കുറിച്ചു.
ആറ് മാസത്തിനിടയില് പാകിസ്ഥാന് നയതന്ത്രം അതിവേഗത്തിലായിരുന്നു; സൈനിക മേധാവി അസിം മുനീര് മൂന്ന് തവണ യുഎസ് സന്ദര്ശിച്ചു. ജൂണില് വലിയ വാര്ത്തയായ ഉച്ചഭക്ഷണ മീറ്റിംഗ് ഉള്പ്പെടെ രണ്ട് തവണ അദ്ദേഹം ട്രംപുമായി കൂടിക്കാഴ്ച നടത്തി. രാഷ്ട്രീയ നേതൃത്വത്തിന്റെ സാന്നിധ്യമില്ലാതെ ഒരു യുഎസ് പ്രസിഡന്റ് പാകിസ്ഥാന് സൈനിക മേധാവിയെ തനിച്ച് കാണുന്നത് ആദ്യമായായിരുന്നു.
എന്തായാലും, മാര്ച്ച് പകുതിയോടെ ഒപ്പിടാന് സാധ്യതയുള്ള ഈ ഇടക്കാല വ്യാപാര കരാര്, 50% നികുതി മൂലം വലഞ്ഞിരുന്ന ഇന്ത്യന് കയറ്റുമതിക്കാര്ക്ക് വലിയ ആശ്വാസം നല്കുന്നു. കൃഷി, ഡയറി മേഖലകളില് സ്വന്തം നിലപാടുകള് വിട്ടുവീഴ്ച ചെയ്യാതെ തന്നെ സ്റ്റീല്, അലുമിനിയം, ചെമ്പ്, ഫാര്മ, കാറുകള്, കാര് ഭാഗങ്ങള് എന്നിവയില് ഇളവുകള് നേടാന് ഇന്ത്യക്ക് കഴിഞ്ഞു.
ഈ ഭൂപടം യുഎസ് നയത്തില് ഇന്ത്യയോടുള്ള അനുഭാവപൂര്ണ്ണമായ മാറ്റമാണോ എന്ന് കണ്ടറിയേണ്ടതുണ്ട്. ട്രംപുമായി ഒരു വര്ഷം നീണ്ട ഉരസലിന് ശേഷം ഇന്ത്യയെ പ്രീണിപ്പിക്കാനുള്ള തന്ത്രപരമായ നീക്കമാണോ അതോ ഉദ്യോഗസ്ഥരുടെ ഭാഗത്തുനിന്നുണ്ടായ പിഴവാണോ എന്നത് വ്യാഖ്യാനങ്ങള്ക്ക് വിട്ടുനല്കിയിരിക്കുകയാണ്. ഭൂപടം ഇന്ത്യക്ക് വലിയൊരു നയതന്ത്ര നേട്ടം നല്കിയിട്ടുണ്ട് എന്നത് വ്യക്തമാണ്. അത് തന്ത്രപ്രധാനമായ അതിര്ത്തി വിഷയങ്ങളില് ഇന്ത്യയുടെ അവകാശവാദങ്ങളെ കൂടുതല് ശക്തമാക്കുന്നു.
While releasing the trade deal details, the US trade representative’s office released a map of India showing the entire Jammu and Kashmir, including Pakistan-occupied Kashmir (POK), as part of the country. Here’s why it is important and marks a departure.
