അമേരിക്കന് വിമാന വാഹിനി കപ്പലും അനുബന്ധ കപ്പലുകളും പശ്ചിമേഷ്യന് തീരത്ത്; ഇറാനെ ലക്ഷ്യമിട്ടെന്നു സൂചന; യുദ്ധ വിമാനങ്ങളും വ്യോമ പ്രതിരോധ സംവിധാനങ്ങളും തിടുക്കത്തില് നീക്കി പെന്റഗണ്; ഇന്റര്നെറ്റ് നിയന്ത്രണത്തില് തവിടു പൊടിയായി ഇറാനിലെ ബിസിനസ് മേഖല
ന്യൂയോര്ക്ക്: അമേരിക്കയുടെ വിമാനവാഹിനിക്കപ്പലും അനുബന്ധ കപ്പലുകളും പശ്ചിമേഷ്യന് തീരത്തെത്തിയെന്നു റിപ്പോര്ട്ട്. ഡോണള്ഡ് ട്രംപ് മേഖലയില് അമേരിക്കയുടെ സാന്നിധ്യം ഉറപ്പിക്കുന്നതിനോ ഇറാനെ ആക്രമിക്കാനോ ലക്ഷ്യമിട്ടാണ് ഈ നീക്കം നടത്തുന്നതെന്നും സൂചന. കപ്പലുകള് എത്തിയ വിവരം അമേരിക്കന് ഉദ്യോഗസ്ഥര് റോയിട്ടേഴ്സിനോടു സ്ഥിരീകരിച്ചു.
യുഎസ് സൈന്യത്തിന്റെ സെന്ട്രല് കമാന്ഡിന്റെ കീഴിലുള്ള മിഡില് ഈസ്റ്റ് മേഖലയിലേക്ക് വിമാന വാഹിനിക്കപ്പലായ യുഎസ്എസ് എബ്രഹാം ലിങ്കണും നിരവധി ഗൈഡഡ് മിസൈല് ഡിസ്ട്രോയറുകളും പ്രവേശിച്ചതായി ഉദ്യോഗസ്ഥര് വ്യക്തമാക്കി. അമേരിക്കയുടെ ഒരു വലിയ പടക്കപ്പല് നിര — ഇറാന് നേരെ നീങ്ങുന്നുണ്ടെന്നും എന്നാല് അത് ഉപയോഗിക്കേണ്ടി വരില്ലെന്ന് പ്രതീക്ഷിക്കുന്നതായും ട്രംപ് വ്യാഴാഴ്ച പറഞ്ഞിരുന്നു.
ഇറാനിലെ പ്രതിഷേധങ്ങള്ക്കെതിരെയുള്ള അടിച്ചമര്ത്തലുകളെത്തുടര്ന്ന് ഇരുരാജ്യങ്ങളും തമ്മിലുള്ള സംഘര്ഷം വര്ദ്ധിച്ച സാഹചര്യത്തില്, ഈ മാസമാദ്യം ഏഷ്യ-പസഫിക് മേഖലയില് നിന്നാണ് ഈ യുദ്ധക്കപ്പലുകള് പുറപ്പെട്ടത്. പ്രതിഷേധക്കാരെ കൊല്ലുന്നത് ഇറാന് തുടരുകയാണെങ്കില് ഇടപെടുമെന്ന് ട്രംപ് ആവര്ത്തിച്ചു മുന്നറിയിപ്പ് നല്കിയിരുന്നെങ്കിലും, രാജ്യവ്യാപകമായ പ്രക്ഷോഭങ്ങള് ഇപ്പോള് ശമിച്ചിട്ടുണ്ട്. കൊലപാതകങ്ങള് കുറഞ്ഞുവരികയാണെന്നും തടവുകാരെ വധിക്കാനുള്ള പദ്ധതികള് നിലവിലില്ലെന്ന് താന് വിശ്വസിക്കുന്നതായും ട്രംപ് പറഞ്ഞു.
സംഘര്ഷാവസ്ഥ നിലനില്ക്കുമ്പോള് പ്രതിരോധത്തിന്റെ ഭാഗമായി യുഎസ് സൈന്യം മുമ്പും മിഡില് ഈസ്റ്റിലേക്ക് സേനയെ അയച്ചിട്ടുണ്ട്. എന്നാല്, കഴിഞ്ഞ വര്ഷം ജൂണില് ഇറാന്റെ ആണവ പദ്ധതിക്ക് നേരെ നടത്തിയ ആക്രമണങ്ങള്ക്ക് മുന്നോടിയായി വലിയ രീതിയിലുള്ള സൈനിക വിന്യാസം അമേരിക്ക നടത്തിയിരുന്നു.
വിമാനവാഹിനിക്കപ്പലുകള്ക്കും യുദ്ധക്കപ്പലുകള്ക്കും പുറമെ, ഫൈറ്റര് ജെറ്റുകളും വ്യോമ പ്രതിരോധ സംവിധാനങ്ങളും പെന്റഗണ് പശ്ചിമേഷ്യയിലേക്കു മാറ്റുന്നുണ്ട്. തങ്ങളുടെ പോരാട്ട വീര്യം പ്രകടിപ്പിക്കുന്നതിനായി മേഖലയില് സൈനികാഭ്യാസം നടത്തുമെന്ന് കഴിഞ്ഞ വാരാന്ത്യത്തില് യുഎസ് സൈന്യം പ്രഖ്യാപിച്ചിരുന്നു.
അതേസമയം, ഏതൊരു ആക്രമണത്തെയും തങ്ങള്ക്കെതിരെയുള്ള ‘പൂര്ണമായ യുദ്ധമായി’ കണക്കാക്കുമെന്ന് ഒരു മുതിര്ന്ന ഇറാനിയന് ഉദ്യോഗസ്ഥന് കഴിഞ്ഞ ആഴ്ച പറഞ്ഞിരുന്നു.
ഇറാന് നേരെയുള്ള സൈനിക നടപടികള്ക്കായി തങ്ങളുടെ വ്യോമാതിര്ത്തിയോ ടെറിട്ടറിയോ സമുദ്രപരിധിയോ ഉപയോഗിക്കാന് അനുവദിക്കില്ലെന്ന് യുണൈറ്റഡ് അറബ് എമിറേറ്റ്സ് തിങ്കളാഴ്ച വ്യക്തമാക്കി. യുഎഇയുടെ തലസ്ഥാനമായ അബുദാബിക്ക് തെക്ക് സ്ഥിതി ചെയ്യുന്ന അല് ദാഫ്ര എയര്ബേസ് യുഎസ് വ്യോമസേനയുടെ പ്രധാന കേന്ദ്രമാണെന്നിരിക്കെ യുഎഇയുടെ ഈ നിലപാട് ശ്രദ്ധേയമാണ്.
ഇന്റര്നെറ്റില്ല, ബിസിനസുകള് തവിടുപൊടി
കഴിഞ്ഞ കുറച്ചു നാളുകളായി ഇറാനില് തുടരുന്ന ഇന്റര്നെറ്റ് നിരോധനം രാജ്യത്തെ ബിസിനസ് മേഖലയെ തകര്ത്തെന്ന റിപ്പോര്ട്ടും പുറത്തുവന്നു. വലിയ പ്രതിഷേധങ്ങളെ അടിച്ചമര്ത്താന് അധികാരികള് കടുത്ത നടപടികള് സ്വീകരിച്ചതിനെത്തുടര്ന്നാണ് ഇന്റര്നെറ്റ് വിച്ഛേദിച്ചത്. ഇത് നേരത്തെ തന്നെ പ്രതിസന്ധിയിലായിരുന്ന ഇറാന്റെ സമ്പദ്വ്യവസ്ഥയെ കൂടുതല് തളര്ത്തി.
ജനുവരി എട്ടു മുതല് ഇറാന് ഇന്റര്നെറ്റ് തടഞ്ഞിരിക്കുകയാണ്. 1979-ലെ ഇസ്ലാമിക വിപ്ലവത്തിന് ശേഷമുള്ള ഏറ്റവും രക്തരൂക്ഷിതമായ അടിച്ചമര്ത്തലുകള്ക്കാണ് രാജ്യം സാക്ഷ്യം വഹിച്ചത്. ആഗോള ഇന്റര്നെറ്റ് ശൃംഖലയുമായുള്ള ബന്ധം എപ്പോള് പുനഃസ്ഥാപിക്കുമെന്ന കാര്യത്തില് ഇപ്പോഴും അനിശ്ചിതത്വം നിലനില്ക്കുന്നു. യുഎസ് ആസ്ഥാനമായുള്ള മനുഷ്യാവകാശ സംഘടനയായ എച്ച്ആര്എഎന്എയുടെ കണക്കനുസരിച്ച്, സംഘര്ഷങ്ങളില് മരിച്ചവരുടെ എണ്ണം 5,848 ആയി ഉയര്ന്നു (ഇതില് 209 സുരക്ഷാ ഉദ്യോഗസ്ഥരും ഉള്പ്പെടുന്നു). എന്നാല് ഔദ്യോഗിക കണക്കുകള് പ്രകാരം മരണസംഖ്യ 3,117 ആണ്.
പുറംലോകവുമായുള്ള ബന്ധം വിച്ഛേദിക്കപ്പെട്ടു ഇറാന്റെ ആഭ്യന്തര ശൃംഖല വഴി ഗവണ്മെന്റ് വെബ്സൈറ്റുകള്, സ്കൂള് ഇന്ട്രാനെറ്റുകള് തുടങ്ങിയവയിലേക്ക് പരിമിതമായ പ്രവേശനം അനുവദിച്ചിട്ടുണ്ടെങ്കിലും, ആഗോള ഇന്റര്നെറ്റ് ഇനിയും പുനഃസ്ഥാപിച്ചിട്ടില്ല. പല ബിസിനസ്സുകളും പ്രവര്ത്തനങ്ങള്ക്കായി ആഗോള ഇന്റര്നെറ്റിനെയാണ് ആശ്രയിക്കുന്നത്.
ഡിജിറ്റല് സമ്പദ്വ്യവസ്ഥയില് 10 ദശലക്ഷം ആളുകള് ജോലി ചെയ്യുന്നുണ്ടെന്നും ഇന്റര്നെറ്റ് നിരോധനം അവരെ ബാധിക്കുമെന്നും കമ്മ്യൂണിക്കേഷന്സ് മന്ത്രി സത്താര് ഹാഷിമി ഉള്പ്പെടെയുള്ളവര് ആശങ്ക പ്രകടിപ്പിച്ചു. ‘സാമ്പത്തിക മേഖലയിലുള്ളവര് കടുത്ത ദേഷ്യത്തിലാണ്. വ്യാപാരികള്ക്ക് പുറംലോകവുമായി ആശയവിനിമയം നടത്താന് എത്രയും വേഗം പരിഹാരം കാണണം,’ ഇറാന്-റഷ്യ ജോയിന്റ് ചേംബര് ഓഫ് കൊമേഴ്സിലെ ജലീല് ജലാലിഫര് പറഞ്ഞു.
അധികൃതരുടെ നിലപാട് ആഴ്ചകള് നീണ്ട പ്രതിഷേധങ്ങള്ക്ക് ശേഷം തെരുവുകളില് സമാധാനം തിരിച്ചെത്തിയെങ്കിലും, ഡിജിറ്റല് ഐസൊലേഷന് എപ്പോള് അവസാനിക്കുമെന്ന കാര്യത്തില് വ്യക്തതയില്ലാത്തത് ബിസിനസ് ഉടമകളെ നിരാശരാക്കുന്നു. ഇന്റര്നെറ്റ് പൂര്ണമായി പുനഃസ്ഥാപിക്കാന് സുരക്ഷാ ഏജന്സികള് നിര്ദ്ദേശം നല്കിയെന്ന വാര്ത്തകള് അധികൃതര് നിഷേധിച്ചു.
ചില ജനപ്രതിനിധികള് ഈ നിയന്ത്രണങ്ങളെ പിന്തുണയ്ക്കുന്നുണ്ട്. ‘ലോകത്തെ നിയന്ത്രിക്കാന് അമേരിക്ക ഉപയോഗിക്കുന്ന ആയുധമാണ് ഇന്റര്നെറ്റ്,’ എന്നാണ് ഒരു നിയമസഭാംഗമായ അബുല്ഫസല് സഹ്രാവന്ത് പറഞ്ഞത്. പ്രതിഷേധ സമയത്ത് ‘കലാപകാരികളും’ വിദേശ ശക്തികളും തമ്മില് ആശയവിനിമയം നടത്താന് ഇന്റര്നെറ്റ് സഹായിച്ചു എന്നാണ് സുരക്ഷാ ഏജന്സികളുടെ വാദം.
