‘വയോധികന്റെ നിവേദനം കൈപ്പറ്റാതിരുന്നത് കൈപ്പിഴ; ചങ്കുറപ്പ് ഭരത്ചന്ദ്രനുണ്ടെങ്കില് അത് സുരേഷ് ഗോപിക്കും ഉണ്ട്’
തൃശൂര്: വയോധികന്റെ നിവേദനം കൈപ്പറ്റാതിരുന്നത് കൈപ്പിഴയാണെന്നും അത് ഉയര്ത്തിക്കാട്ടി കൂടുതല് വിവാദമുണ്ടാക്കാനാണ് ചിലര് ശ്രമിക്കുന്നതെന്നും കേന്ദ്ര സഹമന്ത്രി സുരേഷ് ഗോപി. ഇന്ന് കൊടുങ്ങല്ലൂരില് നടന്ന കലുങ്ക് ചര്ച്ചയിലാണ് വിവാദവുമായി ബന്ധപ്പെട്ട് സുരേഷ് ഗോപി മറുപടി നല്കിയത്. കൂടുതല് വേലായുധന്മാരെ തനിക്ക് കാണിച്ചുതരാന് സാധിക്കുമെന്നും വീടില്ലാത്തവരുടെ പട്ടിക ഉടന് പുറത്തുവിടുമെന്നും കലുങ്ക് ചര്ച്ചക്കിടെ സുരേഷ് ഗോപി വ്യക്തമാക്കി. കലുങ്ക് ചര്ച്ചയുടെ പൊലിമ കെടുത്താനാണ് ചിലര് ശ്രമിക്കുന്നതെന്നും സുരേഷ് ഗോപി ആരോപിച്ചു.
”ചില കൈപ്പിഴകള് ചൂണ്ടിക്കാട്ടി ഈ തീഗോളം കെടുത്താമെന്ന് ഒരുത്തനും വിചാരിക്കണ്ട. നടക്കില്ല. അതിനുള്ള ചങ്കുറപ്പ് ഭരത്ചന്ദ്രനുണ്ടെങ്കില് അത് സുരേഷ് ഗോപിക്കും ഉണ്ട്. വേലായുധന് ചേട്ടന് വീട് കിട്ടിയതില് സന്തോഷം. നല്ലകാര്യം. ഇനിയും ഞാന് വേലായുധന് ചേട്ടന്മാരെ അങ്ങോട്ട് അയക്കും. പാര്ട്ടി തയാറെടുത്ത് ഇരുന്നോളൂ. ആര്ജവവും ചങ്കൂറ്റവും കാണിക്കണം. ഞാന് ഒരു ലിസ്റ്റ് അങ്ങോട്ട് പുറത്തുവിടും. 14 ജില്ലയിലേക്കും ഞാന് പോകും” സുരേഷ് ഗോപി പറഞ്ഞു.
പുള്ള് സ്വദേശി കൊച്ചുവേലായുധന്റെ വീടിനായുള്ള അപേക്ഷ സുരേഷ് ഗോപി കയ്യില് വാങ്ങാതിരുന്നത് വലിയ വിവാദമായിരുന്നു. സുരേഷ് ഗോപി മടക്കി അയച്ച കൊച്ചുവേലായുധന് പിന്നീട് സിപിഎം വീട് പണിതു നല്കുമെന്ന് ഉറപ്പുനല്കി. സിപിഎം തൃശൂര് ജില്ലാ സെക്രട്ടറി കെ.വി.അബ്ദുല് ഖാദറാണ് കൊച്ചുവേലായുധന്റെ വീട്ടിലെത്തി ഇക്കാര്യം ഉറപ്പ് നല്കിയത്. ഇതോടെയാണ് സിപിഎമ്മിന് സുരേഷ് ഗോപി ഇന്നത്തെ ചര്ച്ചയില് മറുപടി നല്കിയത്. വീടുപണി എംപി ചെയ്യുന്നതല്ലെന്നും പഞ്ചായത്തിലാണ് അപേക്ഷ നല്കേണ്ടതെന്നും പറഞ്ഞാണ് വേലായുധന്റെ നിവേദനം സുരേഷ് ഗോപി നിരസിച്ചത്.
