കാസര്കോട്: കാഞ്ഞങ്ങാട് ഷവര്മ കഴിച്ചതിനു പിന്നാലെ ഛര്ദിയുണ്ടായതിനെത്തുടര്ന്ന് പതിനഞ്ചോളം വിദ്യാര്ഥികളെ ആശുപത്രിയില് പ്രവേശിപ്പിച്ചു. പൂച്ചക്കാട് പള്ളിയില് നബിദിനാഘോഷം കാണാനെത്തിയ കുട്ടികള് സമീപത്തെ ബോംബെ ഹോട്ടലില് നിന്നാണ് ഷവര്മ കഴിച്ചത്. തുടര്ന്ന് ഇന്നലെ വൈകിട്ട് അസ്വസ്ഥത തോന്നിയതോടെ ഇവരെ ആശുപത്രിയില് പ്രവേശിപ്പിക്കുകയായിരുന്നു.
പൂച്ചക്കാട് സ്വദേശികളായ റിഫാ ഫാത്തിമ (16), ഫാത്തിമത്ത് സാക്കിയ (13), നഫീസ മെഹ്സ (13), നഫീസത്ത് സുല്ഫ (13) എന്നിവരെ ആശുപത്രിയില് അഡ്മിറ്റ് ചെയ്തു. മറ്റു കുട്ടികള്ക്ക് പ്രാഥമിക ചികിത്സ നല്കി ഇന്നലെ രാത്രി തന്നെ വീട്ടിലേക്ക് വിട്ടിരുന്നു. ഇവര് നിരീക്ഷണത്തിലാണ്. ഷവര്മക്ക് ദിവസങ്ങളുടെ പഴക്കമുള്ളതായി പരാതി ഉയര്ന്നു.
