മാനിഷാദരേ, പരാക്രമം അപ്പാവികളോടല്ല വേണ്ടൂ!!! സ്കൂളിലെ പാചകത്തൊഴിലാളിയെ കൈയേറ്റംചെയ്തു, അരി തട്ടിമറിച്ചു; ‘ഡിഎഫി’ വനിതാ നേതാവിനെതിരേ കേസ്
കണ്ണൂര്: കേളകം മണത്തണ സ്കൂളില് പഠിപ്പു മുടക്കാനെത്തിയെ എസ്എഫ്ഐ പ്രവര്ത്തകര് പാചകപ്പുരയില് കയറി പാചകക്കാരിയെ കയ്യേറ്റം ചെയ്യാന് ശ്രമിച്ചെന്നും അരി തട്ടിമറിച്ചെന്നും പരാതി. മണത്തണ ജിഎച്ച്എസ്എസ് അധികൃതരുടെ പരാതിയില് ഡിവൈഎഫ്ഐ വനിതാ നേതാവിനെതിരെ പൊലീസ് കേസെടുത്തു. ഡിവൈഎഫ്ഐ പേരാവൂര് ബ്ലോക്ക് ജോയിന്റ് സെക്രട്ടറി അക്ഷയ മനോജിനെതിരെയാണ് കേസെടുത്തത്.
ഉച്ചഭക്ഷണം തയ്യാറാക്കിയാല് ക്ലാസ് തുടരേണ്ടി വരും എന്നു പറഞ്ഞ് പാചകപ്പുരയില് കയറുകയും പാചകക്കാരിയെ കയ്യേറ്റം ചെയ്യാന് ശ്രമിച്ചുവെന്നുമാണ് പരാതി. കഴുകിയ അരി ഇടാന് ശ്രമിക്കുന്നതിനിടെയാണ് അതിക്രമമുണ്ടായതെന്ന് പാചകക്കാരിയായ വസന്ത പറഞ്ഞു. ”പ്രായത്തിന്റെ ബഹുമാനമെങ്കിലും കാണിക്കേണ്ടേ. ഓള്ടെ അമ്മയാകാന് പ്രായമുണ്ട്. ചെലക്കല്ലാന്നാണ് എന്നോട് പറഞ്ഞത്. ഞാന് ഇറങ്ങടീ എന്നു തിരിച്ചു പറഞ്ഞു.” വസന്ത പറഞ്ഞു. തന്റെ കൈ പിടിച്ച് തിരിച്ചുവെന്നും അരി തട്ടിമറിച്ചുവെന്നും വസന്ത ആരോപിച്ചു.
പഠിപ്പുമുടക്കിനെത്തുടര്ന്ന് രാവിലെ തന്നെ പ്ലസ് ടു വിദ്യാര്ഥികളെ വിട്ടിരുന്നു. ഹൈസ്കൂള് വിദ്യാര്ഥികളെ വിട്ടയയ്ക്കാന് സാധിക്കില്ലെന്നറിയിച്ചതോടെയാണ് പ്രശ്നം ഉടലെടുത്തത്. ഭക്ഷണം വയ്ക്കുന്നത് തടഞ്ഞാല് വിദ്യാര്ഥികളെ നേരത്തെ വിടേണ്ടി വരുമെന്നതിനാലാണ് പ്രവര്ത്തകര് പാചകപ്പുരയിലെത്തിയതെന്നാണ് വിവരം.
അതേസമയം, എസ്എഫ്ഐ പ്രഖ്യാപിച്ച പഠിപ്പു മുടക്ക് ജില്ലയില് ഭാഗികമായിരുന്നു. കണ്ണൂര് നഗരത്തിലെ മിക്ക സ്കൂളുകളിലും ക്ലാസ് മുടങ്ങിയപ്പോള് മലയോര മേഖലയെ സമരം സാരമായി ബാധിച്ചില്ല. കണ്ണൂര് ഹെഡ് പോസ്റ്റ് ഓഫിസിലേക്ക് എസ്എഫ്ഐ പ്രവര്ത്തകര് നടത്തിയ മാര്ച്ചില് സംഘര്ഷമുണ്ടായി. സമരക്കാര് പോസ്റ്റ് ഓഫിസിനുള്ളിലേക്ക് ഇടിച്ചു കയറാന് ശ്രമിച്ചതോടെ പൊലീസുമായി ഉന്തും തള്ളും നടന്നു.
ചക്കരക്കല് മുണ്ടേരി ജിഎച്ച്എസ് സ്കൂളില് വിദ്യാര്ഥികളെ വിട്ടയച്ചതുമായി ബന്ധപ്പെട്ട് പ്രിന്സിപ്പലിനെ കെഎസ്യു പ്രവര്ത്തകര് ഉപരോധിച്ചു. കെഎസ്യു വിദ്യാഭ്യാസ ബന്ദ് നടത്തിയപ്പോള് അനുവദിക്കില്ലെന്ന് പറഞ്ഞ പ്രിന്സിപ്പല് എസ്എഫ്ഐ സമരം പ്രഖ്യാപിച്ചപ്പോള് രാവിലെ തന്നെ സ്കൂള് വിട്ടെന്നാരോപിച്ചായിരുന്നു പ്രതിഷേധം.
സംസ്ഥാന ജനറല് സെക്രട്ടറി ഫര്ഹാന് മുണ്ടേരി, ജില്ലാ വൈസ് പ്രസിഡന്റ് ഹരികൃഷ്ണന് എന്നിവരെ പൊലീസെത്തി അറസ്റ്റ് ചെയ്തു നീക്കുകയായിരുന്നു. എസ്എഫ്ഐ പ്രവര്ത്തകര്ക്ക് പ്രിന്സിപ്പലിന്റെ നേതൃത്വത്തില് സ്വീകരണം നല്കുകയായിരുന്നുവെന്നും ഇത് ചോദിക്കാന് എത്തിയപ്പോള് പൊലീസിനെ വിളിച്ചുവരുത്തി തങ്ങളെ അറസ്റ്റ് ചെയ്യിക്കുകയായിരുന്നുവെന്നും കെഎസ്യു പ്രവര്ത്തകര് ആരോപിച്ചു.
