വയനാട്: ഹോട്ടലില്‍ കയറിയ കാട്ടുപന്നിയെ കെണിവച്ച് വനംവകുപ്പ് പിടികൂടി. വയനാട് താഴെ കൊളഗപ്പാറയിലെ പെപ്പർ റെസ്റ്റോറന്‍റിലാണ് കാട്ടു പന്നി കയറിയത്.
ഇതോടെ ഹോട്ടലില്‍ ഉണ്ടായിരുന്ന ആളുകളെല്ലാം പരിഭ്രാന്തിയിലായി. ഏറെ നേരത്തെ ശ്രമത്തിനൊടുവിലാണ് കാട്ടുപന്നിയെ പിടികൂടാനായത്.
ഉച്ചയ്ക്കുശേഷമാണ് പെപ്പര്‍ റെസ്റ്റോറന്‍റില്‍ കാട്ടുപന്നി കയറിയത്. ഇതോടെ റെസ്റ്റോറന്‍റില്‍ ഭക്ഷണം കഴിക്കാനെത്തിയവരും തൊഴിലാളികളും നാട്ടുകാരും പരിഭ്രാന്തിയിലായി. എല്ലാവരും ഹോട്ടലിന് പുറത്തേക്ക് ഇറങ്ങി. ഉടന്‍ തന്നെ വനംവകുപ്പിനെ വിവരം അറിയിക്കുകയും ചെയ്തു.
ഇതിനിടയിൽ റസ്റ്റോറന്‍റിലെ ഫര്‍ണിച്ചറുകള്‍ ഉള്‍പ്പെടെ കാട്ടുപന്നി നശിപ്പിക്കുകയും ചെയ്തു.സുല്‍ത്താന്‍ ബത്തേരിയില്‍നിന്ന് വനംവകുപ്പ് ഉദ്യോഗസ്ഥരെത്തി കഴുത്തില്‍ കെണി കുടുക്കിയശേഷം വലയിലാക്കിയാണ് കാട്ടുപന്നിയെ പിടികൂടിയത്.പിന്നീട് ഇതിനെ വനത്തില്‍ തുറന്നു വിട്ടു.
