മുംബൈ: സ്വകാര്യ ചിത്രങ്ങള്‍ പരസ്യപ്പെടുത്തുമെന്ന് ഭീഷണിപ്പെടുത്തി മുന്‍ കാമുകിയില്‍ നിന്നു യുവാവ് 17 ലക്ഷം രൂപ തട്ടിയെടുത്തു. പ്രതി അക്ഷയ് സിങ്ങിനെതിരെയും ഇയാളുടെ രണ്ടു ബന്ധുക്കള്‍ക്കെതിരെയും പൊലീസ് കേസെടുത്തു. 32 വയസുകാരിയായ യുവതിയുടെ ഭര്‍ത്താവിനെ സ്വകാര്യ ചിത്രങ്ങള്‍ കാട്ടുമെന്ന് ഭീഷണിപ്പെടുത്തിയാണ് പണം ആവശ്യപ്പെട്ടത്.
10 വര്‍ഷം മുന്‍പ് വിവാഹിതയായ യുവതി രണ്ടു വര്‍ഷത്തോളം അക്ഷയുമായി രഹസ്യബന്ധം പുലര്‍ത്തിയിരുന്നു. പിന്നീട് ഇരുവരും അകന്നതോടെ സ്വകാര്യ ചിത്രങ്ങള്‍ ഉപയോഗിച്ച് അക്ഷയ് ഭീഷണി തുടങ്ങി. മാസതോറും ഇയാള്‍ക്ക് പതിനായിരം രൂപ ചെലവിനായി നല്‍കാറുണ്ടായിരുന്നെന്ന് യുവതി പറഞ്ഞു. കൊടുക്കാന്‍ പണമില്ലാതായപ്പോള്‍, തന്റെ ആഭരണങ്ങള്‍ പണയം വയ്ക്കാനും അക്ഷയുടെ ബന്ധുവായ സുനിത എന്ന സ്ത്രീയില്‍നിന്നുള്‍പ്പെടെ കടം വാങ്ങാനും തുടങ്ങി. സുനിതയില്‍നിന്നു മൂന്നു ലക്ഷം രൂപ കടം വാങ്ങി. അഞ്ച് ലക്ഷം രൂപയ്ക്ക് തന്റെ കൈവശമുണ്ടായിരുന്ന ആഭരണങ്ങളും പണയം വച്ചു.
സുനിതയില്‍ നിന്ന് വാങ്ങിയ പണം തിരികെ നല്‍കിയെങ്കിലും വീണ്ടു പണം നല്‍കണമെന്ന് അവര്‍ ആവശ്യപ്പെടുകയായിരുന്നുവെന്ന് യുവതി പരാതിയില്‍ പറയുന്നു. അക്ഷയും സുനിതയും ചേര്‍ന്ന് വ്യാഴാഴ്ച തന്നെ അവരുടെ വീട്ടിലേക്കു കൊണ്ടുപോയി. അവിടെ പൂട്ടിയിട്ട് ക്രൂരമായി മര്‍ദിച്ചെന്നും താന്‍ അവര്‍ക്ക് 10 ലക്ഷം രൂപ നല്‍കാനുണ്ടെന്ന പറയുന്ന വീഡിയോ നിര്‍ബന്ധിച്ച് ചിത്രീകരിച്ചതായും യുവതി പറയുന്നു. ഭീഷണിയും ശല്യവും തുടര്‍ന്നതിനാല്‍ ഭര്‍ത്താവിനേയും ഏതാനും അടുത്ത ബന്ധുക്കളെയും അറിയിക്കുകയും പൊലീസിനെ സമീപിക്കുകയുമായിരുന്നു.
