കൊച്ചി:ഐ എം വിജയന്‍ ഇല്ലാതെ കേരളത്തിന് എന്ത് ഫുട്ബോള്‍ ആഘോഷം! അക്ഷരാര്‍ഥത്തില്‍ കേരള ബ്ലാസ്റ്റേഴ്‌സ്- ബെംഗളൂരു എഫ്‌സി മത്സരത്തില്‍ ഗ്യാലറിയിലെ ശ്രദ്ധാകേന്ദ്രം കേരളത്തിന്‍റെ ഫുട്ബോള്‍ ഇതിഹാസമായിരുന്നു.
വിജയനൊപ്പം മറ്റൊരാളും ഗ്യാലറിയെ പുളകം കൊള്ളിച്ചു, അത് ചലച്ചിത്ര താരവും ബ്ലാസ്റ്റേഴ്‌സിന്‍റെ കടുത്ത ആരാധകനുമായ പെപ്പെ എന്ന ആന്‍റണി വര്‍ഗീസായിരുന്നു.
കലൂര്‍ സ്റ്റേഡിയത്തില്‍ ബ്ലാസ്റ്റേഴ്‌സിന്‍റെ ഗോളാരവങ്ങള്‍ക്കൊപ്പം പക്കാ ലോക്കല്‍ ആരാധകനായി പെപ്പെ ഗ്യാലറയില്‍ നിറഞ്ഞാടി. ഐ എം വിജയനെ കൂട്ടുപിടിച്ചായിരുന്നു മഞ്ഞപ്പടയുടെ ജേഴ്‌സി വീശി പെപെയുടെ ആഘോഷം.
സ്റ്റേഡിയത്തിലെത്തിയ ആരാധകര്‍ക്ക് പുറമെ ഇന്‍സ്റ്റഗ്രാമില്‍ ബ്ലാസ്റ്റേഴ്‌സിന്‍റേയും പെപ്പെയുടേയും ആരാധകര്‍ക്കും ആഘോഷത്തല്ലുമാലയായി ആന്‍റണി വര്‍ഗീസിന്‍റെ ആഘോഷം.
മത്സരത്തിൽ കൊച്ചിയിലെ മഞ്ഞക്കടലിനെ സാക്ഷിയാക്കി ബെംഗളൂരുവിനെ ഒന്നിനെതിരെ രണ്ട് ഗോളുകൾക്കാണ് മഞ്ഞപ്പട തോല്‍പിച്ചത്.
