ഹാങ്ചൗ: 2023 ഏഷ്യൻ ഗെയിംസിൽ ഇന്ത്യൻ ഫുട്ബോൾ ടീമിന് വിജയം. ബംഗ്ലാദേശിനെ എതിരില്ലാത്ത ഒരു ഗോളിനാണ് ഇന്ത്യ കീഴടക്കിയത്. പെനാൽറ്റിയിലൂടെ സൂപ്പർ താരം സുനിൽ ഛേത്രിയാണ് ഇന്ത്യയുടെ വിജയഗോൾ നേടിയത്.
ഗ്രൂപ്പ് എയിൽ നടന്ന മത്സരത്തിൽ ഇന്ത്യയും ബംഗ്ലാദേശും ഒപ്പത്തിനൊപ്പം നിൽക്കുന്ന പോരാട്ടമാണ് കാഴ്ചവെച്ചത്. ആക്രമിച്ചുകളിക്കുന്നതിൽ ഇന്ത്യ മുന്നിട്ടുനിന്നെങ്കിലും ഗോൾ മാത്രം അകന്നുനിന്നു. ഗോൾരഹിതമായിരുന്നു ആദ്യ പകുതി. രണ്ടാം പകുതിയിലാണ് ഗോൾ പിറന്നത്.
മത്സരത്തിന്റെ 83-ാം മിനിറ്റിൽ ബംഗ്ലാദേശ് ടീം നായകൻ റഹ്മത് ഇന്ത്യൻ താരം ബ്രൈസ് മിറാൻഡയെ വീഴ്ത്തിയതിനെത്തുടർന്ന് ഇന്ത്യയ്ക്ക് അനുകൂലമായി റഫറി പെനാൽറ്റി വിധിച്ചു. കിക്കെടുത്ത ഛേത്രിയ്ക്ക് പിഴച്ചില്ല. ഈ വിജയത്തിലൂടെ ഇന്ത്യ പ്രീ ക്വാർട്ടർ പ്രതീക്ഷ നിലനിർത്തി. അടുത്ത മത്സരത്തിൽ മ്യാൻമാറാണ് ഇന്ത്യയുടെ എതിരാളി. സെപ്റ്റംബർ 24 നാണ് മത്സരം.
ആദ്യ മത്സരത്തിൽ ചൈനയ്ക്കെതിരേ ഇന്ത്യ 5-1 ന് പരാജയപ്പെട്ടിരുന്നു
