കാസര്‍ഗോഡ്: സ്റ്റോപ്പ് അനുവദിച്ചതിനെതുടര്‍ന്ന് ചെറുവത്തൂരില്‍ ആദ്യമായി നിര്‍ത്തുന്ന പരശുറാം എക്സ്പ്രസിനെ സ്വീകരിക്കാനെത്തിയ ബിജെപി നേതാക്കളെയും പ്രവര്‍ത്തകരെയും വളഞ്ഞിട്ട് തല്ലിയാതായി പരാതി. ജനാവലിയുടെ ബാനറിന്റെ മറവില്‍ ഒരുകൂട്ടം സിപിഎമ്മുകാര്‍ കയേറ്റം ചെയ്തുവെന്നാണ് ബിജെപി ആരോപണം. സംഭവം അപലപനീയമെന്ന് ബിജെപി തൃക്കരിപ്പൂര്‍ മണ്ഡലം കമ്മിറ്റി പത്രക്കുറിപ്പില്‍ അറിയിച്ചു.
ട്രെയിനിനെ സ്വീകരിക്കുന്നതിനിടയില്‍ നരേന്ദ്രമോദി സര്‍ക്കാരിന് അഭിവാദ്യമര്‍പ്പിച്ച് മുദ്രാവാക്യം വിളിച്ച നേതാക്കളായ തൃക്കരിപ്പൂര്‍ മണ്ഡലം പ്രസിഡന്റ് ടി.വി ഷിബിന്‍, ജനറല്‍ സെക്രട്ടറിമാരായ പി രാജീവന്‍, കെ.ടി.വി മോഹനന്‍, വൈസ് പ്രസിഡന്റ് പി.വി വിജയന്‍, സംസ്ഥാന കൗണ്‍സില്‍ അംഗം എം ഭാസ്‌ക്കരന്‍, ടി കുഞ്ഞിരാമന്‍, എ.കെ ചന്ദ്രന്‍ എന്നിവര്‍ക്കുനേരെയാണ് ഒരുസംഘം അക്രമം നടത്തിയത്. ഇവര്‍ ഉയര്‍ത്തിയ ബാനറും പാര്‍ട്ടി പതാകകളും ബലമായി പിടിച്ചെടുത്തു നശിപ്പിച്ചതായും പരാതിയുണ്ട്.
35 വര്‍ഷക്കാലം കാസര്‍ഗോട് മണ്ഡലത്തെ പ്രതിനിധീകരിച്ച സിപിഎമ്മിന്റെ എംപിമാര്‍ക്ക് സാധിക്കാത്തത് നരേന്ദ്രമോദി സര്‍ക്കാര്‍ യാഥാര്‍ഥ്യമാക്കിയപ്പോള്‍ അത് തങ്ങളുടെ സമരംകൊണ്ട് നേടിയെടുത്തതെന്ന് വരുത്തിതീര്‍ക്കാനുള്ള ശ്രമമാണ് സ്ഥലം എംഎല്‍എയുടെയും ബ്ലോക്ക് പഞ്ചായത്ത് പ്രസിഡന്റിന്റെയും നേതൃത്വത്തില്‍ നടത്തുന്നതെന്നും പത്രക്കുറിപ്പില്‍ പറയുന്നു.
