ദുൽഖർ സൽമാൻ അഭിനയിക്കുന്ന ആദ്യ വെബ് സിരീസ് ആണ് ഗൺസ് ആൻഡ് ഗുലാബ്‍സ്. ഹിന്ദിയിൽ ഉള്ള ഈ സിരീസ് പ്രമുഖ ബോളിവുഡ് സംവിധായകരായ രാജും ഡികെയും ചേർന്നാണ് ഒരുക്കിയിരിക്കുന്നത്. കോമഡി ക്രൈം ത്രില്ലർ വിഭാഗത്തിൽ പെടുന്ന സിരീസ് സ്ട്രീമിംഗ് ആരംഭിച്ചു. പ്രമുഖ ഒടിടി പ്ലാറ്റ്ഫോം ആയ നെറ്റ്ഫ്ളിക്സിലൂടെ സിരീസ് കാണാം.
Saara zamaana ab hoga Gulaabgunj ke romance, comedy aur action ka deewana
Guns & Gulaabs is now streaming pic.twitter.com/fD39QzcYbg— Netflix India (@NetflixIndia) August 18, 2023
രാജ്‍കുമാർ റാവുവാണ് മറ്റൊരു കേന്ദ്ര കഥാപാത്രത്തെ അവതരിപ്പിക്കുന്നത്. ആദർശ് ഗൌരവ്, ഗുൽഷൻ ദേവയ്യ, സതീഷ് കൌശിക്, വിപിൻ ശർമ്മ, ശ്രേയ ധന്വന്തരി, ടി ജെ ഭാനു എന്നിവരാണ് മറ്റു കഥാപാത്രങ്ങളെ അവതരിപ്പിക്കുന്നത്. തൊണ്ണൂറുകൾ പശ്ചാത്തലമാക്കുന്ന സിരീസിൻറെ കഥ ഒരുക്കിയിരിക്കുന്നത് രാജ് ആൻഡ് ഡികെയോടൊപ്പം സുമൻ കുമാർ കൂടി ചേർന്നാണ്. സീതാ മേനോനും രാജ് ആൻഡ് ഡികെയും ചേർന്നാണ് തിരക്കഥ രചിച്ചിരിക്കുന്നത്. പങ്കജ് കുമാർ ആണ് ഛായാഗ്രഹണം. നെറ്റ്ഫ്ലിക്സുമായി ചേർന്ന് ഡി 2 ആർ ഫിലിംസ് ആണ് നിർമ്മാണം. നേരത്തെ പുറത്തെത്തിയ ചിത്രത്തിൻറെ പബ്ലിസിറ്റി മെറ്റീരിയലുകൾക്കൊക്കെ വലിയ പ്രേക്ഷകശ്രദ്ധ കിട്ടിയിരുന്നു.
ബോളിവുഡിൽ ദുൽഖർ അവസാനം അഭിനയിച്ച ചിത്രം കഴിഞ്ഞ വർഷമാണ് എത്തിയത്. ചുപ്പ് എന്ന് പേരിട്ടിരുന്ന ചിത്രം സൈക്കോളജിക്കൽ ത്രില്ലർ വിഭാഗത്തിൽ പെടുന്ന ഒന്നാണ്. സണ്ണി ഡിയോൾ ആണ് മറ്റൊരു കഥാപാത്രത്തെ അവതരിപ്പിച്ചത്. ആർ ബൽകി ആയിരുന്നു ചിത്രത്തിൻറെ രചനയും സംവിധാനവും. ദുൽഖറിൻറെ മൂന്നാമത്തെ ബോളിവുഡ് ചിത്രമായിരുന്നു അത്. അതേസമയം അദ്ദേഹത്തിൻറെ അടുത്ത തിയറ്റർ റിലീസ് മലയാളത്തിലാണ്. അഭിലാഷ് ജോഷിയുടെ സംവിധാന അരങ്ങേറ്റമായ കിംഗ് ഓഫ് കൊത്തയാണ് ചിത്രം. ഓണം റിലീസ് ആയി തിയറ്ററുകളിൽ എത്തും.
