മലപ്പുറം:മലയാളി തീര്‍ത്ഥാടക സംഘത്തിലെ ഏഴ് പേരെ ഇസ്രായേലില്‍ കാണാതായതായി.സംഭവത്തിൽ യാത്രയൊരുക്കിയ മലപ്പുറത്തെ ട്രാവല്‍ ഏജൻസി മുഖ്യമന്ത്രിക്കും ഡി.ജി.പിക്കും മലപ്പുറം എസ്.പിക്കും പരാതി നല്‍കി.
ജൂലൈ 25ന് പുറപ്പെട്ട യാത്രാസംഘത്തില്‍പെട്ട രണ്ട് സ്ത്രീകള്‍ ഉള്‍പ്പെടെ ഏഴ് പേരാണ് അപ്രത്യക്ഷരായത്. ഇവര്‍ ബോധപൂര്‍വം മുങ്ങിയതാണെന്നും കണ്ടെത്താൻ സര്‍ക്കാര്‍ അടിയന്തരമായി ഇടപെടണമെന്നുമാവശ്യപ്പെട്ടാണ് പരാതി.
മലപ്പുറത്തെ ഗ്രീൻ ഒയാസിസ് ടൂര്‍സ് ആൻഡ് ട്രാവല്‍ സര്‍വീസസ് പ്രൈവറ്റ് ലിമിറ്റഡ് എന്ന സ്ഥാപനമാണ് ജോര്‍ഡൻ, ഇസ്രായേല്‍, ഈജിപ്ത് യാത്ര സംഘടിപ്പിച്ചത്. ജറുസലേമില്‍ ബൈത്തുല്‍ മുഖദ്ദിസ് സന്ദര്‍ശനത്തിനിടെയാണ് ഏഴ് പേരെ കാണാതായത്. തിരുവനന്തപുരം, കൊല്ലം സ്വദേശികളാണ് കാണാതായവര്‍.ഇവരെല്ലാവരും തന്നെ മുസ്ലിം സമുദായക്കാരാണ്.
