മലപ്പുറം: ബൈക്കിലെത്തിയ യുവതിയും യുവാവും ദേശീയപാതയോരത്തെ കെട്ടിടത്തിനു മുന്നില്‍ ബൈക്ക് ഉപേക്ഷിച്ച് കടന്നു. ഞായര്‍ രാത്രി പത്തുമണിയോടെയാണ് സംഭവം. രാത്രിയില്‍ സഞ്ചരിച്ച ബൈക്ക് ദേശീയ പാതയില്‍ ഉപേക്ഷിച്ച് ഇവര്‍ മുങ്ങുകയായിരുന്നു. കുറ്റിപ്പുറം ഹൈവേ ജംഗ്ഷനില്‍ നിന്ന് പഴയ ബൈപ്പാസ് റോഡിലേക്ക് പ്രവേശിക്കുന്ന സ്ഥലത്താണ് ഹോണ്ട പള്‍സര്‍ ബൈക്ക് ഉപേക്ഷിച്ച് കടന്നത്.
ഇവര്‍ റോഡരികില്‍ നിര്‍ത്തിയിട്ട ബസിന്റെ സമീപത്ത് ബൈക്ക് നിര്‍ത്തി ഇറങ്ങിപ്പോകുന്നത് പുറത്തു വന്ന സിസി ടിവി ദൃശ്യങ്ങളില്‍ വ്യക്തമാണ്. ഇവര്‍ സഞ്ചരിച്ച ബൈക്കില്‍ മുന്നിലും പിന്നിലും നമ്പര്‍ പ്ലേറ്റ് ബോര്‍ഡുകള്‍ ഇല്ലാത്തത് ദുരൂഹതയര്‍ത്തുന്നുണ്ട്. അതേസമയം കഴിഞ്ഞ ദിവസം രാവിലെ കോഴിക്കോട്-രജിസ്ട്രേഷനുള്ള ബുള്ളറ്റില്‍ മറ്റൊരു യുവാവും യുവതിയും എത്തി ബൈക്ക് കടത്തികൊണ്ടുപോകാന്‍ ശ്രമിച്ചത് സമീപത്തെ ചിലര്‍ ഇടപെട്ട് തടഞ്ഞിരുന്നു.
നാട്ടുകാര്‍ വിവരമറിയച്ചതിനെ തുടര്‍ന്ന് കുറ്റിപ്പുറം പോലീസ് സ്ഥലത്തെത്തി പരിശോധന നടത്തി. സംഭവത്തില്‍ ദുരൂഹതയുള്ളതായി നാട്ടുകാര്‍ പറഞ്ഞു. ഇത് മോഷ്ടിച്ച ബൈക്കാണോയെന്നും അതോടെ ബൈക്ക് കടത്തിക്കൊണ്ടുപോകാന്‍ വന്നവര്‍ ഇവരുമായി ബന്ധമുള്ളവരാണോയെന്ന കാര്യത്തിലും വ്യക്തത വന്നിട്ടില്ല. സംഭവത്തില്‍ അന്വേഷണം ആരംഭിച്ചതായി പോലീസ് പറഞ്ഞു.
