തൃശൂര്‍: പൂത്തോളില്‍ മദ്യം കിട്ടാത്തതിന് എയര്‍ഗണ്‍ ചൂണ്ടി ജീവനക്കാരെ ഭീഷണിപ്പെടുത്തി യുവാക്കള്‍. മദ്യശാല അടച്ചതിനുശേഷം മദ്യം വാങ്ങാനെത്തിയവരാണു പരിഭ്രാന്ത്രി സൃഷ്ടിച്ചത്. സംഭവത്തില്‍ കോഴിക്കോട് പാലക്കാട് സ്വദേശികളായ നാലുപേര്‍ പിടിയിലായി.
ഇന്നലെ രാത്രി ഒന്‍പതുമണിക്കുശേഷമാണു പൂത്തോളില്‍ കണ്‍സ്യൂമര്‍ ഫെഡിലെ മദ്യശാലയിലേക്കു നാലു യുവാക്കള്‍ എത്തിയത്. ഈ സമയം മദ്യശാല അടയ്ക്കാനൊരുങ്ങുകയായിരുന്നു ജീവനക്കാര്‍. മദ്യശാലയുടെ ഷട്ടര്‍ പാതിതാഴ്ത്തിയിരുന്നു. തുടര്‍ന്നു മദ്യം വാങ്ങാന്‍ നാളെ വരാന്‍ ജീവനക്കാര്‍ ആവശ്യപ്പെട്ടു.
എന്നാല്‍, മദ്യം വാങ്ങിയേ പോകു എന്ന നിലപാടിലായിരുന്നു യുവാക്കള്‍. തുടര്‍ന്നു ജീവനക്കാരുമായി വാക്കുതര്‍ക്കമുണ്ടായി. മദ്യം കിട്ടില്ലെന്ന് ഉറപ്പായതോടെ എയര്‍ഗണ്‍ ചൂണ്ടി ജീവനക്കാരെ ഭീഷണിപ്പെടുത്തുകയായിരുന്നു. തൃശൂര്‍ വെസ്റ്റ് പോലീസില്‍, ജീവനക്കാര്‍ വിവരം അറിയിച്ചതോടെ ഇന്‍സ്‌പെക്ടര്‍ അര്‍ഷാദും സംഘവും സ്ഥലത്തെത്തി. എന്നാല്‍ അതിനോടകം തന്നെ യുവാക്കള്‍ സ്ഥലം വിട്ടിരുന്നു.
യുവാക്കളെ കണ്ടാല്‍ തിരിച്ചറിയാമെന്നു മദ്യശാലയിലെ സുരക്ഷാ ജീവനക്കാരന്‍ പറഞ്ഞതോടെ ഇയാളുമായി പോലീസ് വിവിധ ബാറുകളില്‍ പരിശോധന നടത്തി. തുടര്‍ന്നു നാലുപേരെയും കണ്ടെത്തുകയായിരുന്നു. ഇവരെ ചോദ്യംചെയ്തു വരികയാണ്.
