കൊല്ലം: ഓണ്‍ലൈന്‍ ഭക്ഷണവിതരണത്തിന്റെ മറവില്‍ മദ്യക്കച്ചവടം നടത്തിയിരുന്ന യുവാവ് പിടിയില്‍. കിഴക്കേക്കര ജയരംഗം വീട്ടില്‍ അരുള്‍രാജാ(29)ണ് എക്സൈസ് സംഘത്തിന്റെ പിടിയിലായത്. 80 കുപ്പികളിലായി സൂക്ഷിച്ചിരുന്ന 40 ലിറ്റര്‍ വിദേശമദ്യവും കണ്ടെടുത്തു.
ഓണ്‍ലൈന്‍ ഭക്ഷണവിതരണ കമ്പനിയില്‍ ഡെലിവറി ബോയിയായി ജോലിചെയ്യുന്ന അരുള്‍രാജ് ആവശ്യക്കാര്‍ക്ക് മദ്യവും എത്തിച്ചിരുന്നു. ഭക്ഷണമെന്ന വ്യാജേനയാണ് വീടുകളില്‍ മദ്യം എത്തിക്കുന്നത്.
നാളുകളായി കൊട്ടാരക്കര എക്സൈസ് ഷാഡോ സംഘത്തിന്റെ നിരീക്ഷണത്തിലായിരുന്നു അരുള്‍രാജ്. ഇയാളുടെ ഫോണില്‍നിന്നാണ് മദ്യം സൂക്ഷിച്ചിരുന്ന സ്ഥലങ്ങളുടെ വിവരങ്ങള്‍ ലഭിച്ചത്. അരുള്‍രാജിനെ കോടതിയില്‍ ഹാജരാക്കി റിമാന്‍ഡ് ചെയ്തു.
