പ്രമേഹം നമുക്കറിയാം ജീവിതശൈലീരോഗങ്ങളുടെ ഗണത്തിലാണ് പെടുത്തപ്പെട്ടിട്ടുള്ളത്. എന്നാൽ മുൻകാലങ്ങളിൽ നിന്ന് വ്യത്യസ്തമായി പ്രമേഹരോഗത്തിൻറെ പ്രാധാന്യം ഇന്ന് ഏവരും മനസിലാക്കുന്നുണ്ട്. പ്രമേഹം സൃഷ്ടിക്കുന്ന ആനുബന്ധ ആരോഗ്യപ്രശ്നങ്ങൾ അവ ജീവന് നേരെ പോലും ഉയർത്തുന്ന വെല്ലുവിളികളെല്ലാം ഇന്ന് മിക്കവർക്കും അറിയാം. പ്രമേഹം വന്നുകഴിഞ്ഞാൽ ഭൂരിഭാഗം കേസിലും അത് പിന്നീട് ഭേദപ്പെടുത്താൻ സാധിക്കില്ല. നിയന്ത്രിച്ച് മുന്നോട്ട് പോവുക എന്ന വഴി മാത്രമേ മുന്നിലുണ്ടാകൂ. അതുകൊണ്ട് തന്നെ പ്രമേഹം പിടിപെടാതിരിക്കാൻ നേരത്തെ ശ്രദ്ധിക്കുന്നത് ഉചിതമാണ്.
പാരമ്പര്യമായി പ്രമേഹമുണ്ടാകാം. എന്നാൽ ഇതിനെക്കാളെല്ലാം ഭക്ഷണം അടക്കമുള്ള ശീലങ്ങളാണ് അധികപേരെയും പ്രമേഹത്തിലേക്ക് എത്തിക്കുന്നത്. ഇത്തരത്തിൽ പ്രമേഹത്തിലെത്താതിരിക്കാൻ നിങ്ങൾക്ക് ചെയ്യാവുന്ന ആറ് കാര്യങ്ങളെ കുറിച്ചാണിനി പങ്കുവയ്ക്കുന്നത്.
- രക്തത്തിലെ ഗ്ലൂക്കോസ് നില ഉയർത്തുന്നതിന് കാർബോഹൈഡ്രേറ്റ് വലിയ രീതിയിൽ കാരണമാകാറുണ്ട്. അതുകൊണ്ട് തന്നെ കാർബോഹൈഡ്രേറ്റ് ആദ്യം മുതലേ നിയന്ത്രിക്കുന്നതാണ് നല്ലത്. നമ്മൾ നിത്യവും കഴിക്കുന്ന ചോറ്, ഗോതമ്പ് ഭക്ഷണങ്ങൾ എന്നിവയടക്കം പല ഭക്ഷണങ്ങളിലും കാർബോഹൈഡ്രേറ്റ് കാര്യമായി അടങ്ങിയിരിക്കുന്നു.
- മൈദ, പഞ്ചസാര, സെറിൽ, ശർക്കര, ചില പഴങ്ങൾ എന്നിങ്ങനെ കാർബ് അടങ്ങിയ ഭക്ഷണങ്ങൾ നിരവധിയാണ്. ഇവയെല്ലാം തന്നെ തിരിച്ചറിഞ്ഞ് ദിവസവും നിയന്ത്രണവിധേയമായി കഴിക്കാൻ സാധിക്കണം. പഞ്ചസാര, തേൻ, ശർക്കര എന്നിവയെല്ലാം നല്ലതോതിൽ കുറയ്ക്കുക. ഒരു ദിവസത്തിൽ തന്നെ ധാരാളം ഫ്രൂട്ട്സ് കഴിക്കുന്നതും ഒഴിവാക്കുക. നിങ്ങൾ കായികമായി എത്ര അധ്വാനിക്കുന്നുണ്ട് എന്നതുകൂടി ഇക്കാര്യങ്ങളിൽ പരിഗണിക്കണം.
- മാനസികസമ്മർദ്ദം അഥവാ സ്ട്രെസും പ്രമേഹത്തിലേക്ക് ക്രമേണ ഒരു വ്യക്തിയെ നയിക്കാം. സ്ട്രെസ് ഉണ്ടാകുമ്പോൾ സ്ട്രെസ് ഹോർമോണായ കോർട്ടിസോൾ കൂടുതൽ ഉത്പാദിപ്പിക്കപ്പെടുന്നു. ഇത് കോശങ്ങളെ കൂടുതൽ ഗ്ലൂക്കോസ് പുറത്തുവിടുന്നതിലേക്ക് നയിക്കുന്നു. സ്ട്രെസ് കൈകാര്യം ചെയ്യുന്നതിനാണിത്. എന്നാലിത് മൂലം രക്തത്തിൽ ഗ്ലൂക്കോസ് നില കൂടുകയും പാൻക്രിയാസ് കൂടതൽ ഇൻസുലിൻ ഉത്പാദിപ്പിക്കുകയും ചെയ്യുന്നു. ഇങ്ങനെയാണ് സ്ട്രെസ് ക്രമേണ പ്രമേഹത്തിലേക്ക് നയിക്കുന്നത്. ഇതിനാൽ തന്നെ സ്ട്രെസ് നിയന്ത്രിച്ചുപോകാൻ എപ്പോഴും ശ്രദ്ധിക്കുക. അത് വീട്ടിൽ നിന്നുള്ളതോ ചുറ്റുപാടുകളിൽ നിന്നുള്ളതോ ജോലിസ്ഥലത്ത് നിന്നുള്ളതോ വൈകാരികമായതോ- ഏതാണെങ്കിലും.
- ഉറക്കമില്ലായ്മയും പ്രമേഹത്തിന് കാരണമാകാമെന്ന് വിവിധ പഠനങ്ങൾ പറയുന്നു. ദിവസവും അഞ്ച് മണിക്കൂറോ അതിന് താഴെയോ ഉറങ്ങുന്നവരിലാണെങ്കിൽ പ്രമേഹത്തിനുള്ള സാധ്യത കൂടുതലാണെന്നാണ് പഠനങ്ങൾ പറയുന്നത്. 7-8 മണിക്കൂർ വരെ മുതിർന്ന ഒരാൾ ഉറങ്ങേണ്ടതുണ്ടെന്നാണ് പഠനങ്ങൾ ചൂണ്ടിക്കാട്ടുന്നത്. ഉറക്കമില്ലായ്മ വിശപ്പ് വർധിപ്പിക്കുയും ഇതുവഴി വണ്ണം കൂട്ടുകയും ചെയ്യാം. സ്ട്രെസും അധികരിക്കാം. ഇവയെല്ലാം പ്രമേഹത്തിന് അനുകൂലമായ അന്തരീക്ഷമുണ്ടാക്കുന്നു. അതിനാൽ ദിവസവും ആരോഗ്യകരമായി ഉറങ്ങാൻ ശ്രദ്ധിക്കുക.
- നല്ല രീതിയിലുള്ള കൊഴുപ്പ് അടങ്ങിയ ഭക്ഷണങ്ങൾ ഡയറ്റിലുൾപ്പെടുത്തുക. നെയ്, വെളിച്ചെണ്ണ, അവക്കാഡോ, ഒലിവ്, നട്ടസ്, സീഡ്സ് എന്നിവയെല്ലാം ഇതിനുദാഹരണമാണ്. മിതമായ അളവിൽ ഇവ കഴിക്കുന്നത് പ്രമേഹത്തെ ഒരു പരിധി വരെ പ്രതിരോധിക്കും.
- നാം എന്ത് കഴിക്കുന്നു എന്നത് മാത്രമല്ല, എങ്ങനെ കഴിക്കുന്നു എന്നതും ചിലപ്പോൾ ആരോഗ്യകാര്യങ്ങളെ നിർണയിക്കുമത്രേ. പ്രമേഹത്തിൻറെ കാര്യവും അങ്ങനെ തന്നെ. അതിനാൽ കഴിക്കുമ്പോൾ ഒരു ക്രമം പാലിക്കാം. ആദ്യം കാർബ് അടങ്ങാത്ത പച്ചക്കറികൾ (പച്ച, ഓറഞ്ച്, മഞ്ഞ, ചുവപ്പ് നിറത്തിലുള്ളവ) കഴിക്കാം. ഇനി പ്രോട്ടീൻ കഴിക്കാം. ഇതിൽ പയർ, മുട്ട, ചിക്കൻ, ഇറച്ചി, സ്പ്രൗട്ട്സ്, നട്ട്സ്, നെയ് തുടങ്ങിയവയെല്ലാം വരും. ഇതിന് ശേഷം മാത്രം കാർബ് അടങ്ങിയ ഭക്ഷണത്തിലേക്ക് കടക്കാം. ഇത് ചോറോ ചപ്പാത്തിയോ എന്തുമാകാം. ഏത് ഭക്ഷണമായാലും അത് മിതമായ അളവിൽ മാത്രം കഴിച്ച് ശീലിക്കുക. ഇതും ഏറെ പ്രധാനമാണ്.
- കായികാധ്വാനം ഒട്ടുമില്ലാതിരിക്കുന്നതും ക്രമേണ പ്രമേഹത്തിന് കാരണമാകാം. അതിനാൽ പ്രായത്തിനും ആരോഗ്യാവസ്ഥയ്ക്കും അനുസരിച്ച കായികാധ്വാനം അല്ലെങ്കിൽ വ്യായാമം ചെയ്യാൻ ഏവരും ശ്രദ്ധിക്കുക.
