ഗര്‍ഭിണിയായതും പ്രസവം കഴിഞ്ഞതും രഹസ്യമായി സൂക്ഷിച്ചതിന്റെ കാരണം വെളിപ്പെടുത്തി ശ്രീയ ശരണ്‍
ഗര്‍ഭകാലം ആഘോഷമാക്കുന്നവരാണ് പൊതുവെ സെലിബ്രിറ്റികള്‍. ‘പ്രെഗ്‌നന്‍സി’ ടെസ്റ്റ് ചെയ്ത റിസള്‍ട്ട് മുതല്‍, ആദ്യ സ്‌കാനിങും, പ്രസവകാലത്തെ ആഗ്രഹങ്ങളും, പ്രസവകാലത്തെ ഡാന്‍സും എന്നിങ്ങനെ തുടങ്ങി ലേബര്‍ റൂമില്‍ പോകുന്നത് വരെയുള്ള കാര്യങ്ങള്‍ യൂട്യൂബിലൂടെയും ഇന്‍സ്റ്റഗ്രാമിലൂടെയും പങ്കുവയ്ക്കും. എന്നാല്‍, അതില്‍ നിന്നും തീര്‍ത്തും വ്യത്യസ്തയായിരുന്നു ശ്രീയ ശരണ്‍. മകള്‍ ജനിച്ച് ഏതാനും മാസങ്ങള്‍ കഴിഞ്ഞതിന് ശേഷമാണ് താരം അക്കാര്യം പുറത്ത് വിട്ടത്. ഗര്‍ഭിണിയായിരിക്കുമ്പോള്‍ ഉള്ള ഒരു ചിത്രം പോലും പങ്കുവച്ചിരുന്നില്ല. അതിന്റെ കാരണം വെളിപ്പെടുത്തി എത്തിയിരിക്കുകയാണ് ഇപ്പോള്‍ നടി.
എനിക്ക് ഒരുപാട് പേടികള്‍ ഉണ്ടായിരുന്നു. അത് കാരണമാണ് പ്രത്യേകിച്ചും ചിത്രങ്ങള്‍ ഒന്നും പങ്കുവയ്ക്കാതിരുന്നത് എന്ന് ശ്രിയ പറയുന്നു. ”എന്റെ പ്രെഗ്‌നന്‍സി ടൈമിലെ ചിത്രങ്ങള്‍ പങ്കുവയ്ക്കാത്തതിന്റെയും ഒരു കാര്യങ്ങളും തുറന്ന് പറയാത്തതിന്റെയും പ്രധാന കാരണം, ആ സമയം എനിക്ക് പരമാവധി ആസ്വദിക്കണമായിരുന്നു. എന്റേതായ കുറേ സമയങ്ങള്‍ വേണം, ഓരോ ഘട്ടവും ആസ്വദിക്കണം അത് കാരണമാണ് പുറത്ത് പറയാതിരുന്നത്.
പിന്നെ മകളെ പ്രസവിച്ച് ആറ് മാസത്തോളം ഞാന്‍ ഒരുപാട് വണ്ണം വച്ചിരുന്നു. ആ സമയത്ത് ഫോട്ടോ പങ്കുവച്ച് ആളുകള്‍ എന്നെ കുറിച്ച് എന്ത് പറയുന്നു എന്നതാലോചിച്ച് വിഷമിച്ചിരിക്കാന്‍ പറ്റില്ല. പൂര്‍ണമായും എനിക്ക് എന്റെ കുഞ്ഞിലേക്ക് ശ്രദ്ധ കേന്ദ്രീകരിക്കണം. മറ്റൊരു ശക്തമായ കാരണം അതായിരുന്നു”- ശ്രീയ പറഞ്ഞു.
മറ്റൊരു കാരണം, താന്‍ ഗര്‍ഭിണിയാണ്, പ്രസവിച്ചു, വണ്ണം വച്ചു എന്നൊക്കെ കേള്‍ക്കുമ്പോള്‍ സിനിമകളിലേക്കുള്ള ഓഫര്‍ കുറയും. കാലങ്ങള്‍ കഴിഞ്ഞ് മാത്രമേ ഒരു അവസരം വരികയുള്ളൂ. ഇതൊരു ദൃശ്യമാധ്യമമാണ്, അതുകൊണ്ട് തന്നെ ജനങ്ങള്‍ നമ്മളെ കാണാന്‍ ആഗ്രഹിയ്ക്കുന്ന രീതി തീര്‍ത്തും വ്യത്യസ്തമായിരിയ്ക്കും. അതിന് വേണ്ടി എനിക്ക് തയ്യാറെടുപ്പുകള്‍ നടത്തേണ്ടതുണ്ടായിരുന്നു.
”എന്റെ പ്രഗ്‌നന്‍സിയെ കുറിച്ച് പുറത്ത് പറയാത്തത് കൊണ്ട് തന്നെ ആ സമയത്തും ഞാന്‍ വര്‍ക്ക് ചെയ്യുന്നുണ്ടായിരുന്നു. സ്‌ക്രിപ്റ്റുകള്‍ വായിക്കുന്നുണ്ടായിരുന്നു. കുഞ്ഞിന് ഒരു ഒന്‍പത് മാസം ഒക്കെ ആവുമ്പോഴേക്കും പ്രസവാനന്തരം ഉള്ള എന്റെ ശരീര വണ്ണം എല്ലാം കുറഞ്ഞു. അത്രയും സമ്മര്‍ദ്ദം എന്നിലുണ്ടായിരുന്നു” -ശ്രീയ വ്യക്തമാക്കി.
ദൃശ്യം 2 ന്റെ ഹിന്ദി റീമേക്കില്‍ അജയ് ദേവ്ഗണിനൊപ്പമാണ് ശ്രീയ എത്തിയത്. കല്യാണ ശേഷമോ, പ്രസവ ശേഷമോ ഒന്നും തന്നെ കരിയറില്‍ നിന്നും ശ്രിയ നീണ്ട ഇടവേള എടുത്തിട്ടില്ല. അതേസമയം, സിനിമകള്‍ തെരഞ്ഞെടുക്കുന്ന കാര്യത്തില്‍ വളരെ അധികം സെലക്ടീവ് ആണ് താരം
