കൊല്ലം: മോഷ്ടിച്ച കാറില്‍ കിടന്നുറങ്ങിയ പ്രതി പിടിയില്‍. മടത്തറയില്‍നിന്നു കാര്‍ മോഷ്ടിച്ച നെടുമങ്ങാട് സ്വദേശി പ്രസിനെ(26)യാണ് പോലീസ് അറസ്റ്റ് ചെയ്തത്. വെള്ളിയാഴ്ച പുലര്‍ച്ചെയാണ് മടത്തറ സ്വദേശിയുടെ വീട്ടില്‍ നിന്ന് പ്രതി കാര്‍ കടത്തിക്കൊണ്ട് പോയത്. പിന്നാലെ ഉടമ ചിതറ പോലീസില്‍ പാരാതി നല്‍കി. പോലീസ് അന്വേഷണത്തില്‍ കാര്‍ നെടുമങ്ങാട് ഭാഗത്ത് ഉള്ളതായി കണ്ടെത്തി.
അന്വേഷണ സംഘമെത്തിയപ്പോള്‍ നെടുമങ്ങാട് ആശുപത്രിയുടെ പാര്‍ക്കിങ്ങില്‍ മോഷ്ടിച്ച കാറിനുള്ളില്‍ പ്രസിന്‍ കിടന്നുറങ്ങുകയായിരുന്നു. തുടര്‍ന്നാണ് പ്രതിയെ അറസ്റ്റ് ചെയ്തത്. കാര്‍ മോഷ്ടിച്ച ദിവസം ശിവന്‍മുക്കിലെ വീട്ടില്‍ നിന്ന് ഇയാള്‍ റബ്ബര്‍ ഷീറ്റുകളും മോഷ്ടിച്ചിരുന്നു. പ്രസിന്‍ സമാന കേസുകളില്‍ പ്രതിയായിട്ടുളളയാളാണെന്ന് പോലീസ് അറിയിച്ചു.
മോഷ്ടിക്കുന്ന കാറുകള്‍ രണ്ടു ദിവസം ഉപയോഗിച്ച ശേഷം വീടുകളില്‍ കൊണ്ട് തിരിച്ചിടുകയോ, പോലീസ് സ്റ്റേഷന് സമീപത്ത് ഉപേക്ഷിക്കുകയോ ആണ് ഇയാളുടെ രീതി. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
