അടിമാലി: ഇടുക്കി അടിമാലിയിൽ ബൈക്കിൽ സഞ്ചരിക്കുന്നതിനിടെ വാഹനത്തിൽ ഷാൾ കുരുങ്ങിയുണ്ടായ അപകടത്തിൽ വീട്ടമ്മ മരിച്ചു. ചിത്തിരപുരം മീൻകെട്ട് സ്വദേശിനി മെറ്റിൽഡയാണ് മരിച്ചത്. ഇന്നുച്ചക്ക് ശേഷം മീൻകെട്ട് കെ എസ് ഇ ബി സർക്കിൾ ഓഫീസിലേക്ക് പോകുന്ന റോഡിലാണ് അപകടം നടന്നത്.
മകനൊപ്പം ബൈക്കിൽ സഞ്ചരിക്കവെയാണ് അപകടം ഉണ്ടായത്. അപകടം നടന്നതിന് പിന്നാലെ മെറ്റിൽഡയെ അടിമാലിയിലെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. രണ്ടാംമൈലിന് സമീപം മീൻകെട്ട് ജംഗ്ഷനിൽ ബസിറങ്ങിയ ശേഷം മകനൊപ്പം ബൈക്കിൽ വീട്ടിലേക്ക് പോകവെ അപകടം ഉണ്ടാവുകയായിരുന്നുവെന്നാണ് പ്രദേശവാസികൾ നൽകുന്ന വിവരം.
