രാജാക്കന്മാര് വേണ്ട!; ഇറാന് യുദ്ധം; കുടിയേറ്റക്കാരുടെ നാടുകടത്തല്: അമേരിക്കയില് തെരുവിലിറങ്ങിയത് പതിനായിരങ്ങള്; ഓരോ ഘട്ടത്തിലും എത്തുന്നവരുടെ എണ്ണത്തില് വന് വര്ധന; സാധാരണക്കാര് മുതല് ഹോളിവുഡ് അഭിനേതാക്കള്വരെ
ലോസ് ആഞ്ചലസ്/വാഷിംഗ്ടണ്/ന്യൂയോര്ക്ക്: യുഎസ് പ്രസിഡന്റ് ഡൊണാള്ഡ് ട്രംപിന്റെ ആക്രമണാത്മകമായ നാടുകടത്തല് ശ്രമങ്ങളെയും ഇറാനിലെ യുദ്ധത്തെയും മറ്റ് നയങ്ങളെയും അപലപിച്ച് രാജ്യത്തുടനീളം ജനം തെരുവില്. ‘നോ കിംഗ്സ്’ (No Kings) റാലികളുടെ മൂന്നാം ഘട്ടമെന്ന നിലയിലായിരുന്നു പ്രതിഷേധ പ്രകടനങ്ങള്.
മുന്പത്തെ രണ്ട് രാജ്യവ്യാപക പരിപാടികളിലും ദശലക്ഷക്കണക്കിന് ആളുകള് പങ്കെടുത്തിരുന്നു. ഈ സാഹചര്യത്തില് 50 സംസ്ഥാനങ്ങളില് 3,200 പരിപാടികളാണ് ആസൂത്രണം ചെയ്തത്. ന്യൂയോര്ക്ക്, ഡാളസ്, ഫിലാഡല്ഫിയ, വാഷിംഗ്ടണ് എന്നിവിടങ്ങളില് വമ്പന് റാലികള് നടന്നു. എന്നാല് ‘നോ കിംഗ്സ്’ പരിപാടികളില് മൂന്നില് രണ്ട് ഭാഗവും പ്രധാന നഗരങ്ങള്ക്ക് പുറത്താണ് നടന്നതെന്ന് സംഘാടകര് പറഞ്ഞു. കഴിഞ്ഞ ജൂണിലെ ആദ്യ ഘട്ടത്തെ അപേക്ഷിച്ച് ചെറിയ കമ്മ്യൂണിറ്റികളിലെ പങ്കാളിത്തത്തില് 40% വര്ധനയുണ്ടായെന്നും അവര് പറഞ്ഞു.
ട്രംപ് ഭീഷണിയെന്ന് നടന് ഡി നീറോ
അനധികൃത കുടിയേറ്റത്തിനെതിരായ ട്രംപിന്റെ അടിച്ചമര്ത്തല് നടപടികളുടെ കേന്ദ്രബിന്ദുവായ മിനസോട്ടയില്, സെന്റ് പോളിലെ സ്റ്റേറ്റ് ക്യാപിറ്റലിന് പുറത്ത് വമ്പന് റാലിയാണു നടന്നത്. ഈ വര്ഷം മിനിയാപൊളിസില് ഫെഡറല് ഇമിഗ്രേഷന് ഓഫീസര്മാരുടെ വെടിയേറ്റു മരിച്ച യുഎസ് പൗരന്മാരായ റെനി ഗുഡ്, അലക്സ് പ്രെറ്റി എന്നിവരുടെ ചിത്രങ്ങള് പതിച്ച പോസ്റ്ററുകള് പലരും കൈയിലേന്തി.
ട്രംപിനോടും അദ്ദേഹത്തിന്റെ നയങ്ങളോടുമുള്ള നിങ്ങളുടെ പ്രതിരോധം അമേരിക്കയുടെ എല്ലാ നന്മകളുടെയും ‘ഹൃദയവും ആത്മാവുമാണെ’ന്ന് 2024-ലെ ഡെമോക്രാറ്റിക് വൈസ് പ്രസിഡന്റ് സ്ഥാനാര്ത്ഥിയായിരുന്ന മിനസോട്ട ഗവര്ണര് ടിം വാള്സ് ജനക്കൂട്ടത്തെ അഭിസംബോധന ചെയ്തു പറഞ്ഞു. ‘അവര് നമ്മളെ തീവ്രവാദികള് എന്ന് വിളിക്കുന്നു. തീര്ച്ചയായും നമ്മള് തീവ്രമായി മാറിയിരിക്കുന്നു – അനുകമ്പയാല് തീവ്രവാദികളായി, മര്യാദയാല് തീവ്രവാദികളായി, നിയമപരമായ നടപടിക്രമങ്ങളാല് തീവ്രവാദികളായി, ജനാധിപത്യത്താല് തീവ്രവാദികളായി. ഏകാധിപത്യത്തെ എതിര്ക്കാന് നമ്മളാല് കഴിയുന്നതെല്ലാം ചെയ്യാന് നമ്മള് സജ്ജരായിരിക്കുന്നു’- അദ്ദേഹം പറഞ്ഞു.
ട്രംപിന്റെ കടുത്ത വിമര്ശകനും 2016-ലും 2020-ലും ഡെമോക്രാറ്റിക് പ്രസിഡന്റ് സ്ഥാനാര്ത്ഥിത്വം തേടിയ വ്യക്തിയുമായ വെര്മോണ്ടില് നിന്നുള്ള യുഎസ് സെനറ്റര് ബെര്ണി സാന്ഡേഴ്സും മിനസോട്ടയിലെ പരിപാടിയില് സംസാരിച്ചു. ‘ഈ രാജ്യം സ്വേച്ഛാധിപത്യത്തിലേക്കോ പ്രഭുഭരണത്തിലേക്കോ കൂപ്പുകുത്താന് ഞങ്ങള് അനുവദിക്കില്ലെ’ന്നു സാന്ഡേഴ്സ് പറഞ്ഞു. സംഗീതജ്ഞന് ബ്രൂസ് സ്പ്രിംഗ്സ്റ്റീന് തന്റെ ‘സ്ട്രീറ്റ്സ് ഓഫ് മിനിയാപൊളിസ്’ എന്ന ഗാനം ആലപിച്ചു.
ന്യൂയോര്ക്കില്, പതിനായിരക്കണക്കിന് ആളുകള് പങ്കെടുത്ത റാലി മിഡ്ടൗണ് മാന്ഹട്ടനില് 10 ബ്ലോക്കുകളിലധികം നീളത്തില് വ്യാപിച്ചു. ട്രംപിനെപ്പോലെ മറ്റൊരു പ്രസിഡന്റും ‘നമ്മുടെ സ്വാതന്ത്ര്യത്തിനും സുരക്ഷയ്ക്കും ഇത്രയധികം അസ്തിത്വ ഭീഷണി ഉയര്ത്തിയിട്ടില്ല’ എന്ന് സംഘാടകരില് ഒരാളായ നടന് റോബര്ട്ട് ഡി നീറോ പറഞ്ഞു. അമേരിക്കന് വിപ്ലവത്തില് പോരാടിയ തന്റെ പൂര്വികരുടെ അതേ വീര്യത്തോടെയാണ് താനും മറ്റ് റാലിയില് പങ്കെടുത്തവരും പ്രവര്ത്തിക്കുന്നതെന്ന് 54 കാരിയായ ഹോളി ബെമിസ് പറഞ്ഞു. ‘രാജാക്കന്മാരെ വേണ്ടെന്ന് വയ്ക്കാനും സ്വാതന്ത്ര്യത്തിനു വേണ്ടിയുമാണ് ഞങ്ങള് പോരാടിയത്. ഞങ്ങള് അത് വീണ്ടും ചെയ്യുന്നു’- അവര് പറഞ്ഞു.
ഡാളസില് നടന്ന പരിപാടിയില് ആയിരക്കണക്കിന് ആളുകള് പങ്കെടുത്തു. അവിടെ നോ കിംഗ്സ് പ്രതിഷേധക്കാരും, മുന് പ്രൗഡ് ബോയ്സ് നേതാവ് എന്റിക് ടാരിയോയുടെ നേതൃത്വത്തിലുള്ള പ്രത്യാക്രമണ ഗ്രൂപ്പുകളും തമ്മില് ഏറ്റുമുട്ടലുണ്ടായി. തെരുവുകള് തടഞ്ഞതിനെത്തുടര്ന്ന് ചെറിയ തോതിലുള്ള സംഘര്ഷങ്ങള് ഉണ്ടായി. ഡാളസ് പോലീസ് പിന്നീട് നിരവധി അറസ്റ്റുകള് നടത്തി.
മിഡ്ടേം ഇലക്ഷന് മുന്നോടിയായുള്ള മാര്ച്ച്
ഫെഡറല് കെട്ടിടം വളഞ്ഞ 1,000 പ്രതിഷേധക്കാര്ക്കിടയില്നിന്ന് ഫെഡറല് നിയമപാലകരെ ആക്രമിച്ചതിന് രണ്ട് പേരെ അറസ്റ്റ് ചെയ്തതായി യുഎസ് ആഭ്യന്തര സുരക്ഷാ വകുപ്പ് ശനിയാഴ്ച അറിയിച്ചു. റോയ്ബാല് ഫെഡറല് ബില്ഡിംഗിലുണ്ടായ സംഭവത്തില് രണ്ട് ഉദ്യോഗസ്ഥര്ക്ക് സിമന്റ് കട്ടകള് കൊണ്ട് ഏറുകൊണ്ടതായും അവര്ക്ക് ചികിത്സ നല്കുന്നതായും അറിയിപ്പില് പറയുന്നു.
ഫെഡറല് ജയിലിന് സമീപമുള്ള പ്രദേശത്ത് നിന്ന് പിരിഞ്ഞുപോകാത്തതിന് നിരവധി പ്രതിഷേധക്കാരെ അറസ്റ്റ് ചെയ്തതായി ലോസ് ആഞ്ചലസ് പോലീസ് സോഷ്യല് മീഡിയയില് കുറിച്ചു. വേലിക്ക് മുകളിലൂടെ ചിലര് സാധനങ്ങള് എറിഞ്ഞതിനെത്തുടര്ന്ന് ഫെഡറല് അധികൃതര് ജനക്കൂട്ടത്തിന് നേരെ കണ്ണീര് വാതകം പ്രയോഗിച്ചു.
യുഎസ് കോണ്ഗ്രസിന്റെ ഘടന നിര്ണ്ണയിക്കുന്ന നവംബറിലെ മിഡ്ടേം തിരഞ്ഞെടുപ്പിലേക്ക് അടുക്കുമ്പോള്, ഐഡഹോ, വ്യോമിംഗ്, മോണ്ടാന, യൂട്ടാ തുടങ്ങിയ റിപ്പബ്ലിക്കന് സ്വാധീനമുള്ള സംസ്ഥാനങ്ങളില് പോലും ട്രംപ് വിരുദ്ധ പരിപാടികള് സംഘടിപ്പിക്കുന്നതിനും രജിസ്റ്റര് ചെയ്യുന്നതിനും ആളുകളുടെ എണ്ണത്തില് വലിയ വര്ദ്ധനവുണ്ടായതായി സംഘാടകര് പറയുന്നു.
ദേശീയ തിരഞ്ഞെടുപ്പുകളില് നിര്ണായകമാകുന്ന പ്രാന്തപ്രദേശങ്ങളില് താല്പ്പര്യം ‘വലിയ തോതില്’ വര്ധിക്കുന്നുണ്ടെന്ന് ‘ഇന്ഡിവിസിബിള്’ (Indivisible) എന്ന സംഘടനയുടെ സഹസ്ഥാപകയായ ലിയ ഗ്രീന്ബെര്ഗ് പറഞ്ഞു. കഴിഞ്ഞ വര്ഷം ‘നോ കിംഗ്സ്’ പ്രസ്ഥാനം ആരംഭിച്ചതും ശനിയാഴ്ചത്തെ പരിപാടികള്ക്ക് നേതൃത്വം നല്കിയതും ഈ ഗ്രൂപ്പാണ്. പെന്സില്വേനിയയിലെ ബക്സ്, ഡെലവെയര് കൗണ്ടികള്, ജോര്ജിയയിലെ ഈസ്റ്റ് കോബ്, ഫോര്സിത്ത്, അരിസോണയിലെ സ്കോട്ട്സ്ഡേല്, ചാന്ഡലര് എന്നിവിടങ്ങളെ അവര് ഉദാഹരണമായി ചൂണ്ടിക്കാട്ടി.
കഴിഞ്ഞ വര്ഷം ജൂണ് 14-ന് ട്രംപിന്റെ ജന്മദിനത്തില് നടന്ന ആദ്യത്തെ നോ കിംഗ്സ് പരിപാടിയില് രാജ്യത്തുടനീളം ഏകദേശം 2,100 സ്ഥലങ്ങളിലായി 4 മുതല് 6 ദശലക്ഷം വരെ ആളുകള് പങ്കെടുത്തിരുന്നു. ഒക്ടോബറില് നടന്ന രണ്ടാം ഘട്ടത്തില് 2,700-ലധികം നഗരങ്ങളിലായി 7 ദശലക്ഷത്തോളം പേര് പങ്കെടുത്തതായി പ്രമുഖ ഡാറ്റാ ജേണലിസ്റ്റ് ജി. എലിയട്ട് മോറിസ് പ്രസിദ്ധീകരിച്ച വിശകലനത്തില് പറയുന്നു.
ഗവണ്മെന്റ് ഷട്ട്ഡൗണ്, ഫെഡറല് ഇമിഗ്രേഷന് അധികൃതരുടെ കടുത്ത നടപടികള്, പ്രധാന നഗരങ്ങളില് നാഷണല് ഗാര്ഡ് സൈനികരെ വിന്യസിച്ചത് എന്നിവയ്ക്കെതിരായ രോഷമാണ് ഒക്ടോബറിലെ പരിപാടിയെ ശക്തിപ്പെടുത്തിയത്. ഇപ്പോള് നാലാഴ്ച പിന്നിട്ടിരിക്കുന്ന ഇറാന് നേരെയുള്ള അമേരിക്കയുടെയും ഇസ്രായേലിന്റെയും ബോംബാക്രമണത്തിനെതിരായ ആഹ്വാനമായാണ് ശനിയാഴ്ചത്തെ പരിപാടികള് നടന്നതെന്ന് സംഘാടകര് പറഞ്ഞു.
#NoKingsProtest, #DonaldTrump, #USNews, #AntiTrumpProtest, #USPolitics, #MalayalamNews, #WorldNews, #TimWalz, #BernieSanders, #RobertDeNiro, #USA, #ProtestNews, #ImmigrationPolicy, #IranWar, #HumanRights, #InternationalNews, #GlobalProtest, #MidtermElections2026, #KeralaNews, #DailyhuntMalayalam, #TrendingNews, #അമേരിക്ക, #ഡൊണാൾഡ്ട്രംപ്, #വാർത്തകൾ, #പ്രതിഷേധം, #ലോകവാർത്തകൾ, #മലയാളംവാർത്തകൾ #NoKings, #MassProtest, #DemocraticResistance, #StreetProtest, #FreedomRally, #NoDictatorship, #SaveDemocracy #DeportationDrive, #IranConflict, #USForeignPolicy, #ImmigrationRights, #AntiWar, #HumanRightsViolation
