രാജസ്ഥാന്റെയും കൊല്ക്കത്തയുടേയും ഏറ്റുമുട്ടല് ; ചരിത്രമെഴുതിയത് ഓസ്ട്രേലിയക്കാരന് കാമറൂണ്ഗ്രീന് ; ഐപിഎല് താരലേലത്തില് കിട്ടിയത് 25.2 കോടി, ഒരു വിദേശ കളിക്കാരന്റെ മിനി ലേലത്തിലെ പരമാവധി ഫീസ്
ദുബായ്: ഐപിഎല് താരലേലത്തില് ഏറ്റവും ഉയര്ന്ന തുക ലഭിക്കുന്ന വിദേശ കളിക്കാരനായി കാമറൂണ്ഗ്രീന്. ഐപിഎല് 2026 മിനി ലേലത്തില് 25.20 കോടി രൂപയുടെ വമ്പന് വിലയ്ക്ക് ഓസ്ട്രേലിയന് ഓള്റൗണ്ടര് കാമറൂണ് ഗ്രീനിനെ കൊല്ക്കത്ത നൈറ്റ് റൈഡേഴ്സ് ആണ് സ്വന്തമാക്കിയത്. നൈറ്റ് റൈഡേഴ്സും രാജസ്ഥാന് റോയല്സും തമ്മിലായിരുന്നു ഗ്രീനിനായി ലേലത്തില് ആദ്യം ഏറ്റുമുട്ടിയത്.
പിന്നീട് ചെന്നൈ സൂപ്പര് കിംഗ്സും ഈ പോരാട്ടത്തിലേക്ക് കടന്നുവന്നതോടെ ലേലം കൂടുതല് ആവേശകരമായി. ഐപിഎല് 2024 ലേലത്തില് 24.75 കോടി രൂപയ്ക്ക് വാങ്ങിയ പേസര് മിച്ചല് സ്റ്റാര്ക്കിന്റെ റെക്കോര്ഡ് ആണ് ഗ്രീന് മറികടന്നത്. മുംബൈ ഇന്ത്യന്സിനും റോയല് ചലഞ്ചേഴ്സിനും വേണ്ടി കളിച്ചിട്ടുള്ള ഗ്രീന്, ഇതുവരെ ഐപിഎല്ലില് 29 മത്സരങ്ങളില് നിന്ന് 707 റണ്സ് നേടുകയും 16 വിക്കറ്റുകള് വീഴ്ത്തുകയും ചെയ്തിട്ടുണ്ട്.
അതേസമയം വന്തുകയ്ക്ക് ലേലം കൊണ്ടെങ്കിലും ഈ സീസണിലെ അദ്ദേഹത്തിന്റെ ശമ്പളം 18 കോടി രൂപയായിരിക്കും (1.9 ദശലക്ഷം യുഎസ് ഡോളര്). വിദേശ കളിക്കാര് ക്കായുള്ള ലേല നിയമങ്ങള് അനുസരിച്ച്, ബാക്കിയുള്ള തുക ബിസിസിഐയുടെ പ്ലെയര് ഡെവലപ്മെന്റ് പ്രോഗ്രാമിലേക്ക് പോകും.
ഇതിന്റെ കാരണം ഐപിഎല്ലിന്റെ ‘പരമാവധി ഫീസ്’ നിയമമാണ്. ഒരു വിദേശ കളിക്കാര ന്റെ മിനി ലേലത്തിലെ പരമാവധി ഫീസ്, ഏറ്റവും ഉയര്ന്ന നിലനിര്ത്തല് സ്ലാബിലെ തുക യായ 18 കോടി രൂപയോ അല്ലെങ്കില് മുന് മെഗാ ലേലത്തിലെ ഏറ്റവും ഉയര്ന്ന വിലയായ (2025ല് റിഷഭ് പന്തിന്റെ 27 കോടി രൂപ) ഇതില് ഏതാണോ കുറവ്, അതായിരിക്കും എന്ന് ഈ നിയമം പറയുന്നു.
ഐപിഎല് 2026 ലേലത്തിന്റെ ആദ്യ സെറ്റില്, ഡെവോണ് കോണ്വേ, ജേക്ക് ഫ്രേസര്-മക്ഗര്ക്ക്, പൃഥ്വി ഷാ, സര്ഫറാസ് ഖാന് തുടങ്ങിയ കളിക്കാര് വിറ്റുപോയില്ല. അതേസമയം, മില്ലറെ 2 കോടി രൂപയ്ക്ക് ഡല്ഹി ക്യാപിറ്റല്സ് വാങ്ങി. ആഭ്യന്തര ക്രിക്കറ്റില് അടുത്തിടെ മികച്ച പ്രകടനം നടത്തിയിട്ടും പൃഥ്വി ഷാ വിറ്റുപോയില്ല. ചൊവ്വാഴ്ച നടന്ന സയ്യിദ് മുഷ്താഖ് അലി ട്രോഫി മത്സരത്തില് മുംബൈക്ക് വേണ്ടി 22 പന്തില് 73 റണ്സ് നേടിയ സര്ഫറാസിന്റെ കാര്യത്തിലും സമാനമായിരുന്നു ഫലം.
