ജാതിയുടേയും മതത്തിന്റെയും പേരില് യുവാക്കളെ കൊല്ലുന്നത് അംഗീകരിക്കാനാകില്ല ; ദുരഭിമാന കൊലകള്ക്കെതിരേ തമിഴ്നാട് നിയമനിര്മ്മാണത്തിനൊരുങ്ങുന്നു ; കമ്മീഷനെ നിയമിച്ച് മുഖ്യമന്ത്രി
ചെന്നൈ: തമിഴ്നാട്ടില് ദുരഭിമാനക്കൊലകള് വ്യാപകമാകുന്ന സാഹചര്യത്തില് നിയമനിര്മാണത്തിനായി തമിഴ്നാട് സര്ക്കാര്. ഇക്കാര്യത്തില് പഠനം നടത്താന് പ്രത്യേക കമ്മീഷനെ നിയമിച്ചു. ഇവര് സംസ്ഥാനത്ത് നടന്ന ദുരഭിമാനക്കൊലകളെക്കുറിച്ച് കമ്മീഷന് പഠിക്കും. ഇരകളുടെ കുടുംബങ്ങളെ കാണുകയും സാമൂഹ്യ പ്രവര്ത്തകരുമായും നിയമ വിദഗ്ധരുമായും കൂടിക്കാഴ്ച്ച നടത്തുകയും നിയമനിര്മാണത്തിനായുളള ശുപാര്ശകള് തയ്യാറാക്കുകയും ചെയ്യുന്നു.
ജാതിയുടെയും സമുദായത്തിന്റെയും പേരിലുളള ദുരഭിമാനക്കൊലകള് തടയുന്നതിനായി നിയമം നടപ്പിലാക്കുന്നതിനുളള നടപടികള് ശുപാര്ശ ചെയ്യുന്നതിനായി കമ്മീഷന് രൂപീകരിക്കുകയാണെന്ന് മുഖ്യമന്ത്രി എം കെ സ്റ്റാലിന് പ്രഖ്യാപിച്ചു. വിരമിച്ച ഹൈക്കോടതി ജഡ്ജി കെ എം ബാഷയുടെ നേതൃത്വത്തിലാണ് കമ്മീഷന്. ഭരണഘടനാപരമായ സമത്വത്തിനും വ്യക്തി സ്വാതന്ത്ര്യത്തിനും നേരെയുളള ആക്രമണമാണ് ഇത്തരം കൊലപാതകങ്ങളെന്ന് എം കെ സ്റ്റാലിന് നിയമസഭയില് പറഞ്ഞു.
ഇന്ത്യന് ശിക്ഷാനിയമത്തില് കൊലപാതകവും ആത്മഹത്യാ പ്രേരണാക്കുറ്റങ്ങളും ഉള്പ്പെടുത്തിയിട്ടുണ്ടെങ്കിലും ദുരഭിമാനക്കൊലകള്ക്ക് പ്രത്യേക നിയമം ആവശ്യമാണെന്നും അദ്ദേഹം പറഞ്ഞു. ദുരഭിമാനക്കൊലകള് ഇല്ലാതാക്കുന്നതിനും ജാതി, സമുദായ വ്യത്യാസങ്ങള്ക്കപ്പുറം ഭയമില്ലാതെ വിവാഹം കഴിക്കാനുളള വ്യക്തികളുടെ അവകാശം സംരക്ഷിക്കുന്നതിനുമായി സര്ക്കാര് പ്രത്യേക നിയമനിര്മാണം നടത്തുമെന്നും സ്റ്റാലിന് വ്യക്തമാക്കി. തമിഴ്നാട്ടില് ഇപ്പോഴും നിരന്തരം ദുരഭിമാനക്കൊലകള് നടക്കുന്ന പശ്ചാത്തലത്തിലാണ് പുതിയ നിയമനിര്മാണത്തിനുളള സാധ്യത സര്ക്കാര് തേടിയത്.
പെരിയാറും അംബേദ്കറും ഉയര്ത്തിപ്പിടിച്ച സാമൂഹ്യനീതിയുടെ ആദര്ശങ്ങളോടുളള തമിഴ്നാടിന്റെ പ്രതിബദ്ധതയും അദ്ദേഹം ആവര്ത്തിച്ചു. ‘തമിഴ്നാട് എല്ലാകാലവും ജാതിയുടെ പേരിലുളള അടിച്ചമര്ത്തലിനെതിരെ നിലകൊണ്ടിട്ടുളള സംസ്ഥാനമാണ്. പ്രണയവും വിവാഹവുമെല്ലാം ശിക്ഷിക്കപ്പെടുന്നതല്ല, മറിച്ച് ആഘോഷിക്കപ്പെടുന്ന ഒരു സമൂഹമായി നാം മാറേണ്ടതുണ്ട്’, സ്റ്റാലിന് പറഞ്ഞു. ദുരഭിമാനക്കൊലകള് ആവര്ത്തിക്കാതിരിക്കാന് ബോധവല്ക്കരണ പരിപാടികളുള്പ്പെടെ നടത്തുമെന്നും കൂട്ടിച്ചേര്ത്തു.
