ഇസ്രയേല് ഗാസയില് നടത്തുന്നത് വംശഹത്യയോ? ഐക്യരാഷ്ട്ര സഭ കണ്ടെത്തല് നടത്തിയത് എങ്ങനെ? ജൂത കൂട്ടക്കൊലയ്ക്കുശേഷം കോടതിയില് തെളിഞ്ഞത് മൂന്നു വംശഹത്യകള് മാത്രം; സമരവുമായി യുഎന് ജീവനക്കാര്; യുഎന് വാദങ്ങള് വിചിത്രമെന്ന് വിമര്ശിച്ച് അമേരിക്കയും
ന്യൂയോര്ക്ക്: ഗാസയില് പലസ്തീനികള്ക്കെതിരെ ഇസ്രയേല് വംശഹത്യ നടത്തിയെന്ന് ഐക്യരാഷ്ട്രസഭയുടെ അന്വേഷണ കമ്മീഷന് റിപ്പോര്ട്ട് പുറത്തുവന്നതിനു പിന്നാലെ വിമര്ശനവുമായി അമേരിക്കയും ഇസ്രയേലും രംഗത്തെത്തി.
അന്താരാഷ്ട്ര നിയമപ്രകാരം ഇസ്രയേല് ഗാസയില് നടത്തുന്നത് വംശഹത്യയാണെന്നും ഇസ്രയേല് നേതാക്കളുടെ പ്രസ്താവനയും സൈന്യത്തിന്റെ നടപടിയും വംശഹത്യയ്ക്കെതിരായ തെളിവാണെന്നുമാണ് യുഎന് അന്വേഷണ കമ്മീഷന്റെ കണ്ടെത്തല്.
‘2023-ല് ഹമാസുമായുളള യുദ്ധം ആരംഭിച്ചതിനുശേഷം ഇസ്രയേല് ഗാസയില് നടത്തുന്നത് വംശഹത്യയാണ്. ഒരു പ്രത്യേക വിഭാഗത്തിലെ ആളുകളെ ലക്ഷ്യംവെച്ച് ആക്രമണം നടത്തുക, ഗുരുതരമായ ശാരീരിക, മാനസിക ഉപദ്രവമേല്പ്പിക്കുക, ജനനം തടയുന്നത് ഉള്പ്പെടെയുളള പ്രവര്ത്തനങ്ങള് നടത്തുക തുടങ്ങിയ ഗാസയില് നടക്കുന്നത് വംശഹത്യയാണ് എന്നതിന് തെളിവാണ്’ എന്നാണ് ഐക്യരാഷ്ട്രസഭ അന്വേഷണ കമ്മീഷന് വ്യക്തമാക്കുന്നത്.
എങ്ങനെയാണ് ഗാസയില് വംശഹത്യ നടത്തുന്നെന്നു യുഎന് കണ്ടെത്തിയത്? കോടതിയില് എത്തിയാല് എങ്ങനെയായിരിക്കും കൈകാര്യം ചെയ്യുക? ജര്മനിയില് ഹിറ്റ്ലറുടെ നേതൃത്വത്തില് ജൂതന്മാര്ക്കുനേരെ നടത്തിയ കൂട്ടക്കൊലയ്ക്കുശേഷം രൂപീകരിച്ച മനുഷ്യാവകാശ നിയമത്തിനു പിന്നാലെ അപൂര്വമായിട്ടു മാത്രാണ് വംശഹത്യ കോടതികളില് തെളിയിക്കപ്പെട്ടിട്ടുള്ളത്. 1948ലെ വംശഹത്യ കണ്വന്ഷന് ‘ഒരു ദേശീയ, വംശീയ-അല്ലെങ്കില് മതപരമായ ഗ്രൂപ്പിനെ പൂര്ണമായോ ഭാഗികമായോ നശിപ്പിക്കുക എന്ന ഉദ്യേശ്യത്തില് ചെയ്യുന്ന കുറ്റകൃത്യങ്ങള്’ എന്നു നിര്വചിക്കുന്നു.
ഠ അഞ്ച് ക്രിമിനല് പ്രവൃത്തികള്
അഞ്ച് ക്രിമിനല് പ്രവൃത്തികള് വംശഹത്യയായി കണക്കാക്കാം: ഗ്രൂപ്പിലെ അംഗങ്ങളെ കൊല്ലുക, അവര്ക്ക് ശാരീരികമോ മാനസികമോ ആയ ഗുരുതര ഉപദ്രവം ഉണ്ടാക്കുക, അവരെ നശിപ്പിക്കാന് ഉദ്ദേശിച്ചുള്ള സാഹചര്യങ്ങള് സൃഷ്ടിക്കുക, ജനനം തടയുക, അല്ലെങ്കില് കുട്ടികളെ മറ്റ് ഗ്രൂപ്പുകളിലേക്ക് നിര്ബന്ധിച്ച് മാറ്റുക.
അന്താരാഷ്ട്ര കോടതികളില്, മൂന്ന് കേസുകള് മാത്രമേ വംശഹത്യയായി കണക്കാക്കപ്പെട്ടിട്ടുള്ളൂ: 1970-കളില് കംബോഡിയന് ഖമര് റൂഷ് ന്യൂനപക്ഷമായ ചാമിനെയും വിയറ്റ്നാമീസിനെയും കൂട്ടക്കൊല ചെയ്തതില് 1.7 ദശലക്ഷം ആളുകള് കൊല്ലപ്പെട്ടു; 1994-ല് റുവാണ്ടയില് ടുട്സികളായ 800,000 പേര് കൊല്ലപ്പെട്ട കൂട്ടക്കൊല; 1995-ല് ബോസ്നിയയില് ഏകദേശം 8,000 മുസ്ലീം പുരുഷന്മാരെയും ആണ്കുട്ടികളെയും കൂട്ടക്കൊല ചെയ്ത സ്രബ്രെനിക്ക കൂട്ടക്കൊല.
ഠ ഇസ്രായേലിലെ കണ്ടെത്തല്
ഇരകള്, സാക്ഷികള്, ഡോക്ടര്മാര് എന്നിവരുമായി 23 മാസത്തെ അഭിമുഖങ്ങള്ക്കും ഓപ്പണ് സോഴ്സ് രേഖകളുടെയും ഉപഗ്രഹ ചിത്രങ്ങളുടെയും വിശകലനത്തിനും ശേഷം, ‘ഇസ്രായേല് അധികൃതര്ക്കും സുരക്ഷാ സേനയ്ക്കും ഗാസ മുനമ്പിലെ പലസ്തീനികളെ പൂര്ണമായോ ഭാഗികമായോ നശിപ്പിക്കുക എന്ന വംശഹത്യ ഉദ്ദേശ്യമുണ്ടായിരുന്നു. ഇപ്പോഴും അങ്ങനെ തന്നെ’യെന്ന നിഗമനത്തിലെത്തി. ‘വംശഹത്യ തടയുന്നതിലെ പരാജയം, വംശഹത്യ നടത്തല്, ഗാസ മുനമ്പിലെ പലസ്തീനികള്ക്കെതിരായ വംശഹത്യയില് ശിക്ഷിക്കുന്നില് പരാജയപ്പെട്ടു എന്നിവയ്ക്ക് ഇസ്രായേല് രാഷ്ട്രമാണ് ഉത്തരവാദിയെന്നും യുഎന് പാനല് കണ്ടെത്തി.
അഞ്ച് വംശഹത്യാ മാനദണ്ഡങ്ങളില് നാലെണ്ണം ഇസ്രായേല് അധികാരികളും ഇസ്രായേലി സുരക്ഷാ സേനയും ചെയ്തിട്ടുണ്ടെന്ന് കമ്മീഷന് പറയുന്നു: ‘കൊലപാതകം, ഗുരുതരമായ ശാരീരികമോ മാനസികമോ ആയ ഉപദ്രവം വരുത്തല്, പലസ്തീനികളെ പൂര്ണമായോ ഭാഗികമായോ നശിപ്പിക്കാന് ലക്ഷ്യമിട്ടുള്ള സാഹചര്യങ്ങള് മനഃപൂര്വം സൃഷ്ടിക്കല്, ജനനങ്ങള് തടയാന് ഉദ്ദേശിച്ചുള്ള നടപടികള് അടിച്ചേല്പ്പിക്കല്’ എന്നിവയാണത്. ജെനോസൈഡ് സ്കോളേഴ്സ് അസോസിയേഷന്, ഹ്യൂമന് റൈറ്റ്സ് ഗ്രൂപ്പ് എന്നിവരും സമാനമായ വിലയിരുത്തലില് എത്തിയിരുന്നു.
ഠ തെളിവുകള് എന്തൊക്കെ?
വ്യാപകമായ കൊലപാതകങ്ങള്, സഹായം തടയല്, നിര്ബന്ധിത കുടിയിറക്കല്, ഫെര്ട്ടിലിറ്റി ക്ലിനിക് ഉള്പ്പെടെയുള്ള ആരോഗ്യ സംരക്ഷണ സൗകര്യങ്ങള് നശിപ്പിക്കല് എന്നിവ തെളിവായി കമ്മീഷന് ഉദ്ധരിക്കുന്നു. ഇസ്രായേല് പ്രധാനമന്ത്രി ബെഞ്ചമിന് നെതന്യാഹുവിന്റെയും മറ്റ് ഉദ്യോഗസ്ഥരുടെയും പ്രസ്താവനകള് ‘വംശഹത്യയുടെ ഉദ്ദേശ്യത്തിന്റെ നേരിട്ടുള്ള തെളിവായി’ കമ്മീഷന് ഉദ്ധരിച്ചു.
2023 നവംബറില് ഇസ്രായേല് സൈനികര്ക്ക് അയച്ച കത്ത് ഹീബ്രു ബൈബിളില് പറയുന്ന ‘സമ്പൂര്ണ ഉന്മൂലനത്തിന്റെ വിശുദ്ധ യുദ്ധം’ എന്ന് ഗാസ ഓപ്പറേഷനുമായി താരതമ്യം ചെയ്തുകൊണ്ട് റിപ്പോര്ട്ടില് ഉള്പ്പെടുന്നു.
2023 ഒക്ടോബറില് ഗാസയുടെ സമ്പൂര്ണ ഉപരോധം പ്രഖ്യാപിക്കുകയും ഇസ്രായേല് ‘മനുഷ്യ മൃഗങ്ങളുമായി’ പോരാടുകയാണെന്ന് പ്രസ്താവിക്കുകയും ചെയ്ത മുന് പ്രതിരോധ മന്ത്രി യോവ് ഗാലന്റിന്റെ അഭിപ്രായങ്ങളും, 2023 ഒക്ടോബര് 14 ന് ‘ഒരു മുഴുവന് രാഷ്ട്രവും’ ഉത്തരവാദിയാണെന്ന് പറഞ്ഞ പ്രസിഡന്റ് ഐസക് ഹെര്സോഗിനെയും റിപ്പോര്ട്ടില് ഉദ്ധരിക്കുന്നു. എന്നാല്, തന്റെ വാക്കുകള് തെറ്റായി വ്യാഖ്യാനിക്കപ്പെട്ടതാണെന്ന് പറഞ്ഞുകൊണ്ട് ഹെര്സോഗ് റിപ്പോര്ട്ടിലെ കണ്ടെത്തലുകളെ അപലപിച്ചു.
ഠ വംശഹത്യ എങ്ങനെ തെളിയിക്കാം?
ഒരു രാജ്യത്തെയും വ്യക്തികളെയും വംശഹത്യയില് കുറ്റക്കാരായി കണ്ടെത്തണമെങ്കില്, അഞ്ച് അടിസ്ഥാന ക്രിമിനല് പ്രവൃത്തികളില് ഒന്നെങ്കിലും നടന്നിട്ടുണ്ടെന്നും ഇരകള് ഒരു പ്രത്യേക ദേശീയ, വംശീയ, വംശീയ അല്ലെങ്കില് മതപരമായ ഗ്രൂപ്പിന്റെ ഭാഗമാണെന്നും ഒരു കോടതി കണ്ടെത്തണം.
യുദ്ധക്കുറ്റകൃത്യങ്ങള്, മനുഷ്യരാശിക്കെതിരായ കുറ്റകൃത്യങ്ങള് തുടങ്ങിയ അന്താരാഷ്ട്ര മാനുഷിക നിയമങ്ങളുടെ മറ്റ് ലംഘനങ്ങളെ അപേക്ഷിച്ച് വംശഹത്യ തെളിയിക്കാന് പ്രയാസമാണ്. അതിന് പ്രത്യേക ഉദ്ദേശ്യത്തിന്റെ തെളിവുകള് ആവശ്യമാണ്.
ഉദ്ദേശ്യം സ്ഥാപിക്കുന്നതിനായി, ഇസ്രായേലി അധികാരികളുടെ പ്രസ്താവനകളും ഗാസയിലെ ഇസ്രായേലി നേതാക്കളുടെയും ഇസ്രായേലി സുരക്ഷാ സേനയുടെയും പെരുമാറ്റരീതിയും വിശകലനം ചെയ്തതായും ‘വംശഹത്യയുടെ ഉദ്ദേശ്യം മാത്രമാണ് അവരുടെ പ്രവര്ത്തനങ്ങളുടെ സ്വഭാവത്തില്നിന്ന് നിഗമനം ചെയ്യാന് കഴിയുന്ന ഏക അനുമാനം എന്ന് കണ്ടെത്തിയതായും’ യുഎന് കമ്മീഷന് പറഞ്ഞു.
ഠ അന്താരാഷ്ട്ര കോടതികള് കേള്ക്കുന്ന കേസുകള്
2023-ല്, രാജ്യങ്ങള് തമ്മിലുള്ള തര്ക്കങ്ങള്ക്കുള്ള പരമോന്നത കോടതിയായ അന്താരാഷ്ട്ര നീതിന്യായ കോടതി (ഐസിജെ)യില് ഇസ്രയേല് വംശഹത്യ ചെയ്യുന്നെന്ന് ആരോപിച്ച് ദക്ഷിണാഫ്രിക്ക കേസ് ഫയല് ചെയ്തു. കേസില് വിധി വരാന് വര്ഷങ്ങളെടുക്കും. അതേസമയം, ഗാസ മുനമ്പില് ഹമാസ് തീവ്രവാദികള്ക്കെതിരെ യുദ്ധം ചെയ്യുന്നതിനിടെ വംശഹത്യ തടയുന്നതിനുള്ള നടപടിയെടുക്കണമെന്നും കേസില് കോടതി ആവശ്യപ്പെട്ടിട്ടുണ്ട്. 1948-ല് യുഎന് ജനറല് അസംബ്ലി അംഗീകരിച്ച ആദ്യത്തെ മനുഷ്യാവകാശ ഉടമ്പടിയായ വംശഹത്യ കണ്വന്ഷന്റെ അധികാരപരിധിയില് ഐസിജെ ഉണ്ട്.
വംശഹത്യ കുറ്റം ചുമത്തി വ്യക്തികളെ പ്രോസിക്യൂട്ട് ചെയ്യാന് കഴിയുന്ന അന്താരാഷ്ട്ര ക്രിമിനല് കോടതി, ഇസ്രായേല് അധിനിവേശ പലസ്തീന് പ്രദേശങ്ങളില് നടന്നതായി ആരോപിക്കപ്പെടുന്ന കുറ്റകൃത്യങ്ങളും പരിശോധിക്കുന്നുണ്ട്. കൂടാതെ ഗാസ സംഘര്ഷത്തില് യുദ്ധക്കുറ്റങ്ങളും മനുഷ്യരാശിക്കെതിരായ കുറ്റകൃത്യങ്ങളും ആരോപിച്ച് കഴിഞ്ഞ വര്ഷം നവംബറില് നെതന്യാഹുവിനും ഗാലന്റിനും വേണ്ടി അറസ്റ്റ് വാറണ്ട് പുറപ്പെടുവിച്ചിരുന്നു. എന്നാല് പ്രോസിക്യൂട്ടര്മാര് അന്ന് വംശഹത്യ കുറ്റത്തിന് വാറന്റ് ആവശ്യപ്പെട്ടിരുന്നില്ല.
ഠ ഇസ്രയേല് പറയുന്നത്
ജനീവയിലെ ഐക്യരാഷ്ട്രസഭയിലെ ഇസ്രായേലിന്റെ അംബാസഡര് ഡാനിയേല് മെറോണ് ഈ റിപ്പോര്ട്ടിനെ ‘അപമാനകരം’ എന്നാണു വിശേഷിപ്പിച്ചത്. ഇസ്രായേലിനെതിരെ ഒരു രാഷ്ട്രീയ അജന്ഡ കമ്മീഷന് ഉണ്ടെന്നു അദ്ദേഹം പറഞ്ഞു. റിപ്പോര്ട്ടുമായി സഹകരിക്കില്ലെന്നും മെറോണ് വ്യക്തമാക്കിയിട്ടുണ്ട്. അന്താരാഷ്ട്ര നിയമത്തോട് പ്രതിജ്ഞാബദ്ധമാണെന്നും ഗാസയിലെ സാധാരണ ജനങ്ങള്ക്ക് ദോഷം കുറയ്ക്കാന് ശ്രമിക്കുന്നുണ്ടെന്നുമാണ് ഇസ്രയേലിന്റെ നിലപാട്. 2023 ഒക്ടോബര് ഏഴിന് 1,200 പേര് കൊല്ലപ്പെടുകയും 251 പേരെ ബന്ദികളാക്കുകയും ചെയ്ത ഹമാസ് ആക്രമണത്തെത്തുടര്ന്ന്, സ്വയം പ്രതിരോധത്തിനുള്ള അവകാശം ചൂണ്ടിക്കാട്ടി ഐസിജെയില് വംശഹത്യ ആരോപണങ്ങള് ഇസ്രായേല് സര്ക്കാര് നിരസിച്ചിട്ടുമുണ്ട്.
ഠ റിപ്പോര്ട്ടിനെതിരേ പരാതി
അമേരിക്കയും ഇസ്രയേലും റിപ്പോര്ട്ടിനെതിരേ ഐക്യരാഷ്ട്ര സഭയിലെ ഉന്നത ഉദ്യോഗസ്ഥാര്ക്കു പരാതി നല്കിയിട്ടുണ്ട്. അതേസമയം ഗാസയില് കൊല്ലപ്പെട്ട സഹപ്രവര്ത്തകര്ക്കു നീതി ആവശ്യപ്പെട്ട് ഐക്യരാഷ്ട്ര സഭയിലെ ജീവനക്കാരും ആസ്ഥാനത്തിനു പുറത്തു പ്രതിഷേധം സംഘടിപ്പിച്ചു.
