ഭക്ഷണം കഴിക്കാന് പോയി തിരിച്ചെത്തിയില്ല, മൂന്നാറില് സെക്യൂരിറ്റി ജീവനക്കാരന് മരിച്ച നിലയില്; കൊലപാതകമെന്ന് സംശയം
ഇടുക്കി: മൂന്നാറില് സെക്യൂരിറ്റി ജീവനക്കാരനെ മരിച്ച നിലയില് കണ്ടെത്തി. മൂന്നാര് ചൊക്കനാട് എസ്റ്റേറ്റിലെ സെക്യൂരിറ്റി ജീവനക്കാരനായ കന്നിമല ഫാക്ടറി ഡിവിഷന് സ്വദേശി രാജപാണ്ടിയാണ് മരിച്ചത്. തലയില് ആഴത്തില് മുറിവേറ്റ നിലയിലാണ് മൃതദേഹം കണ്ടെത്തിയത്. സംഭവം കൊലപാതകമാണെന്ന സംശയത്തില് മൂന്നാര് പൊലീസ് അന്വേഷണം തുടങ്ങി.
ജോലിക്കിടെ ഭക്ഷണം പാകം ചെയ്യാന് രാത്രി താമസ സ്ഥലത്തേക്ക് പോയ രാജപാണ്ടി ഏറെ സമയം കഴിഞ്ഞും മടങ്ങിയെത്താത്തതിനെ തുടര്ന്ന് ഡ്യൂട്ടിയിലുണ്ടായിരുന്ന മറ്റുള്ളവര് നടത്തിയ തെരച്ചിലിലാണ് മരിച്ച നിലയില് കണ്ടെത്തിയത്. കെട്ടിടത്തിനുള്ളില് ആയിരുന്നു മൃതദേഹം.
തലയില് ആഴത്തില് മുറിവിന് പുറമെ ഭിത്തിയിലും ചോരക്കറയുള്ളതായും റിപ്പോര്ട്ടുകളുണ്ട്. ഡോഗ് സ്ക്വാഡും വിരലടയാള വിദഗ്ദരും സ്ഥലത്തെത്തി പരിശോധന നടത്തി. മൃതദേഹം പോസ്റ്റ്മോര്ട്ടത്തിന് അയച്ചു.
