രണ്ടു മക്കളെയുമെടുത്തു കിണറ്റില് ചാടി, 6 വയസ്സുകാരന് മരിച്ചതില് അമ്മ അറസ്റ്റില്; ഗാര്ഹിക പീഡനത്തിന് അമ്മായിയമ്മയും
കണ്ണൂര്: പരിയാരത്ത് രണ്ടു മക്കളെയുമെടുത്തു കിണറ്റില് ചാടിയതിനെത്തുടര്ന്ന് 6 വയസ്സുകാരന് മരിച്ച സംഭവത്തില് യുവതിയെയും ഭര്തൃവീട്ടിലെ പീഡനമെന്ന പരാതിയില് ഭര്തൃമാതാവിനെയും പൊലീസ് അറസ്റ്റ് ചെയ്തു. ചെറുതാഴം ശ്രീസ്ഥയിലെ അടുത്തലക്കാരന് ധനേഷിന്റെ ഭാര്യ പി.പി.ധനജയെയും ധനേഷിന്റെ അമ്മ ചെറുതാഴം ശ്രീസ്ഥയിലെ ശ്യാമളയെയുമാണ് (71) പരിയാരം പൊലീസ് അറസ്റ്റ് ചെയ്തത്.
ആറു വയസ്സുള്ള മകന് ധ്യാന്കൃഷ്ണന്റെ മരണത്തിലാണ് അമ്മ ധനജക്കെതിരെ കൊലക്കുറ്റത്തിന് കേസെടുത്തത്. ഭര്ത്താവിന്റെ അമ്മ ശ്യാമള ജീവിക്കാന് അനുവദിക്കാത്തതിനാലാണ് 2 കുട്ടികളുമായി കിണറ്റില് ചാടിയതെന്ന ധനജയുടെ മൊഴിയിലാണ് ശ്യാമളയ്ക്കെതിരെ പൊലീസ് കേസെടുത്തത്.
പരിയാരത്ത് മക്കളുമായി അമ്മയുടെ ആത്മഹത്യാ ശ്രമം; ആറുവയസുകാരന് മരിച്ചു
അപകടത്തില് ഗുരുതരമായി പരുക്കേറ്റ് ആശുപത്രിയില് ചികിത്സയിലായിരുന്ന ധ്യാന് കൃഷ്ണ രണ്ടു ദിവസം മുന്പാണ് മരിച്ചത്. മറ്റൊരു കുട്ടിയായ ദിയയുടെ ആരോഗ്യനില തൃപ്തികരമാണ്. അറസ്റ്റിലായ ധനജയെ റിമാന്ഡ് ചെയ്ത് കണ്ണൂര് വനിതാ ജയിലിലേക്കു മാറ്റി. സംഭവത്തെക്കുറിച്ച് പൊലീസ് അന്വേഷണം നടക്കുകയാണ്.
