രണ്ടുമാസം മുമ്പേ തയാറെടുപ്പ്; സിസിടിവി കേടുവരുത്തി; സാമ്പത്തിക തര്ക്കവും മറ്റു സൗഹൃദങ്ങളെ ചോദ്യം ചെയ്തതും കൊലയിലേക്ക് നയിച്ചെന്നു മൊഴി; വിഷം കഴിച്ച അന്സിലിന്റെ ശ്വാസകോശമടക്കം വെന്തെരിഞ്ഞു; അദീന കാക്കനാട് വനിതാ ജയിലില്
കോതമംഗലം: കോതമംഗലത്ത് പെണ്സുഹൃത്ത് വിഷം നല്കിയ അന്സിലിന്റെ ശ്വാസകോശത്തിനടക്കം പൊള്ളലേറ്റുവെന്ന് പോസ്റ്റുമോര്ട്ടം റിപ്പോര്ട്ട്. കരളും വൃക്കയുമടക്കമുള്ള ആന്തരികാവയവങ്ങള് തകരാറിലായി. ഇതാണ് മരണകാരണമെന്നാണ് റിപ്പോര്ട്ടിലുള്ളത്. പ്രതി കൃത്യമായ ആസൂത്രണത്തോടെയാണ് കൃത്യം നടപ്പാക്കിയത്. അന്സിലിനെ വീട്ടിലേക്ക് വിളിച്ചുവരുത്തുംമുന്പ് അദീന വീട്ടിലെ സിസിടിവിയടക്കം കേടുവരുത്തി. തെളിവ് നശിപ്പിക്കുകയായിരുന്നു ലക്ഷ്യം
രണ്ടുമാസം മുന്പേ തയ്യാറെടുപ്പുകള് തുടങ്ങിയെന്നാണ് അദീന പൊലീസിന് നല്കിയിരിക്കുന്ന മൊഴി. തുടര്ച്ചയായ ചോദ്യംചെയ്യലിനൊടുവിലാണ് സാമ്പത്തിക തര്ക്കമാണ് കൊലപാതകത്തിന് പിന്നിലെന്ന് അദീന സമ്മതിച്ചത്. അന്സില് മര്ദിച്ചെന്നുകാട്ടി നേരത്തെ അദീന പൊലീസില് പരാതി നല്കിയിരുന്നു. പിന്നീട് അന്സില് പണം വാഗ്ദാനം ചെയ്തതിന് ശേഷമാണ് കേസില് നിന്നും പിന്മാറിയത്. എന്നാല് വാഗ്ദാനം ചെയ്ത പണം അന്സില് നല്കിയില്ല. ഇതുമായി ബന്ധപ്പെട്ട തര്ക്കമാണ് കൊലയില് കലാശിച്ചത്.
കളനാശിനി നല്കി അന്സിലിനെ കൊല്ലാനുള്ള കാരണമെന്തെന്ന് ആദ്യഘട്ടത്തില് വെളിപ്പെടുത്താന് അദീന തയ്യാറായിരുന്നില്ല. മറ്റ് സൗഹൃദങ്ങളെ ചൊല്ലി അന്സില് വഴക്കിട്ടുവെന്നും ഇതിന് പിന്നാലെയാണ് കളനാശിനി നല്കി അന്സിലിനെ കൊലപ്പെടുത്തിയത് എന്നുമായിരുന്നു പ്രാഥമിക വിവരം. കൃത്യം നടത്താന് അദീനയ്ക്ക് മറ്റാരുടെയെങ്കിലും സഹായം ലഭിച്ചിട്ടുണ്ടോ എന്ന വിവരമടക്കം അന്വേഷണസംഘം പരിശോധിക്കുന്നുണ്ട്. നിലവില് റിമാന്ഡിലുള്ള അദീന കാക്കനാട് വനിതാ ജയിലിലാണുള്ളത്.
അദീന അന്സിലിനെ കൂടാതെ മറ്റൊരാളുമായി അടുപ്പത്തിലായി എന്നും അയാള്ക്കൊപ്പം ജീവിക്കാനാണ് കൊല നടത്തിയതെന്നും സൂചനകളുണ്ട്. ഇയാള് നിലവില് ഒരു കേസില്പെട്ട് ജയിലിലാണ്. ഉടന് തന്നെ പുറത്തിറങ്ങും. അതിനിടെ അന്സില് ഈ ബന്ധത്തിന് തടസമാകാതിരിക്കാന് കൂടിയാണ് കൊലയെന്നാണ് വിവരങ്ങള്.
ഒറ്റപ്പെട്ട സ്ഥലത്തുള്ള വീട്ടില് തനിച്ചാണ് അദീനയുടെ താമസം. അന്സില് പതിവായി ഇവിടേയ്ക്ക് എത്താറുണ്ടായിരുന്നുവെന്നാണ് വിവരം. ഇക്കഴിഞ്ഞ 29-ാം തീയതി അദീന അന്സിലിനെ വീട്ടിലേക്ക് വിളിച്ചുവരുത്തി. ഇവിടെവച്ചാണ് പ്രതി കൃത്യം നടപ്പാക്കിയത്. 29ാം തീയതി അദീനയ്ക്കൊപ്പം ചെലവഴിച്ച് പിറ്റേദിവസമാണ് അന്സില് തിരികെ പോയത്. ആദീനയുടെ വീട്ടില് നിന്നിറങ്ങിയപ്പോള് മുതല് അന്സിലിന് ശാരീരിക ബുദ്ധിമുട്ടുകളുണ്ടായി. പെട്ടെന്നു തന്നെ ഇക്കാര്യം വീട്ടിലും പൊലീസിലും വിളിച്ചറിയിച്ചു.
ബന്ധുവും പൊലീസും എത്തിയാണ് അന്സിലിനെ കൊച്ചിയിലെ സ്വകാര്യ ആശുപത്രിയിലെത്തിച്ചത്. ആംബുലന്സില് വച്ച് ‘അവള് എന്നെ ചതിച്ചു’ എന്ന് അന്സില് പറഞ്ഞതായി ബന്ധുക്കള് അവകാശപ്പെടുന്നു. 500 മില്ലി ലിറ്റര് വിഷം കുടിപ്പിച്ചെന്നും അന്സില് പറഞ്ഞതായി ബന്ധു മാധ്യമങ്ങളോട് പറഞ്ഞു. അദീന മറ്റുള്ളവരുമായി അടുക്കുന്നത് അന്സിലിന് പ്രശ്നമുണ്ടായിരുന്നു. ഇതാണ് പ്രശ്നങ്ങള്ക്ക് തുടക്കമായതെന്നാണ് കരുതുന്നത്. അദീനയുടെ വീട്ടില് പൊലീസ് പരിശോധന നടത്തുകയും, കീടനാശിനി വെച്ചിരുന്ന കുപ്പി കണ്ടെത്തുകയും ചെയ്തു. ചേലാടുള്ള ഒരു കടയില് നിന്നാണ് കളനാശിനി വാങ്ങിയതെന്ന വിവരം ലഭിച്ചിട്ടുണ്ട്.
പോസ്റ്റുമോര്ട്ടത്തില് അന്സിലിന്റെ മരണം കളനാശിനി ഉള്ളില്ച്ചെന്നാണെന്ന് സ്ഥിരീകരിച്ചു. ആന്തരികാവയവങ്ങള്ക്ക് പൊള്ളലേറ്റതായും റിപ്പോര്ട്ടിലുണ്ട്. പാറശാല ഷാരോണ് വധവുമായി ഏറെ സാമ്യങ്ങളുള്ള കേസാണിതെന്നാണ് സൂചനകള്. ഗ്രീഷ്മ ഷാരോണിനെ കൊലപ്പെടുത്താന് തിരഞ്ഞെടുത്തതിന് സമാനമാണ് അദീനയും സ്വീകരിച്ച മാര്ഗങ്ങള്. കളനാശിനി എന്തില് കലക്കിയാണ് അദീന അന്സിലിന് നല്കിയതെന്ന കാര്യത്തില് വ്യക്തത വന്നിട്ടില്ല. ഇതിനിടെ അന്സലിന്റെ ഉമ്മയെ അദീന വിഡിയോ കോള് വിളിച്ചിരുന്നുവെന്ന നിര്ണായക വിവരവും പുറത്തുവന്നു. അന്സില് അവശനിലയില് കിടക്കുന്നത് കാണിച്ച് ‘വിഷം കഴിച്ച് കിടപ്പുണ്ട് എടുത്തോണ്ട് പോയ്ക്കോ’ എന്ന് അദീന പറഞ്ഞുവെന്നാണ് കുടുംബം പറയുന്നത്. കേസില് വിശദമായ അന്വേഷണം നടക്കുകയാണ്.
