തൃശ്ശൂര്: പാലിയേക്കര ടോള് പ്ലാസയില് വ്യവസായിയുടെ പ്രതിഷേധം. കനത്ത ഗതാഗതക്കുരുക്കിനെ തുടര്ന്ന് ഭാര്യാപിതാവിന്റെ സംസ്കാര ചടങ്ങില് പങ്കെടുക്കാന് പറ്റിയില്ലെന്ന് പറഞ്ഞ് എന്ടിസി മാനേജിങ് ഡയറക്ടര് വര്ഗീസ് ജോസ് ആണ് പ്രതിഷേധവുമായി രംഗത്തെത്തിയത്. മണ്ണുത്തി – ഇടപ്പള്ളി ദേശീയപാത 544-ല് അടിപ്പാത നിര്മാണ പ്രദേശങ്ങളിലാണ് ഗതാഗതക്കുരുക്ക് അനുഭവപ്പെട്ടത്.
കൊടകര പേരാമ്പ്രയില് കഴിഞ്ഞ ദിവസം ഉച്ചയ്ക്ക് 2.30നായിരുന്നു വര്ഗീസ് ജോസിന്റെ ഭാര്യാപിതാവിന്റെ സംസ്കാരച്ചടങ്ങ്. ഇതിനായി നേരത്തെ തന്നെ പുറപ്പെട്ടെങ്കിലും ഗതാഗതക്കുരുക്ക് കാരണം തനിക്ക് പങ്കെടുക്കാന് സാധിച്ചില്ലെന്ന് അദ്ദേഹം പറഞ്ഞു. ഒന്നരമണിക്കൂറോളം വൈകിയാണ് ചടങ്ങിനെത്തിയതെന്നും അദ്ദേഹം പറഞ്ഞു. സംസ്കാര ചടങ്ങില് നിന്ന് തിരികെ വരുംവഴിയാണ് ടോള് പ്ലാസയില് പ്രതിഷേധിച്ചത്.
സംസ്കാര ചടങ്ങില് പങ്കെടുക്കാനാകാത്തതിന്റെ വിഷമം ചൂണ്ടിക്കാട്ടിയ വര്ഗീസ് ജോസ് ‘എന്തിനാണ് ഞാന് ടോള് നല്കുന്നത്’ എന്നും ചോദിച്ചായിരുന്നു പ്രതിഷേധം. ടോള് പ്ലാസക്കാര് സമാധാനിപ്പിക്കാന് ശ്രമിക്കുന്നതും ദൃശ്യങ്ങളില് കാണാം. എന്നാല്, പോലീസ് അറസ്റ്റ് ചെയ്യട്ടെ എന്ന നിലപാടായിരുന്നു അദ്ദേഹം സ്വീകരിച്ചത്. 45 മിനിറ്റോളം പ്രതിഷേധിച്ച ശേഷമാണ് സ്ഥലത്ത് നിന്നു മടങ്ങിയത്.
