മുംബൈ: റിലയന്‍സ് ഗ്രൂപ്പ് ചെയര്‍മാന്‍ അനില്‍ അംബാനി ലോകത്തെ ആറാമത്തെ സമ്പന്നനായ ഫ്രോഡ് എന്ന് രാജ്യത്തെ ഏറ്റവും വലിയ പൊതുമേഖലാ ബാങ്കായ എസ്ബിഐ റിപ്പോര്‍ട്ട്. റിലയന്‍സ് ഗ്രൂപ്പിന്റെ ടെലികോം വിഭാഗമായ റിലയന്‍സ് കമ്മ്യൂണിക്കേഷന്‍സിന് അനുവദിച്ച ലോണുമായി ബന്ധപ്പെട്ടാണ് നടപടി. ഇത് നിലവിലെ സാഹചര്യത്തില്‍ അനില്‍ അംബാനിക്കും, റിലയന്‍സ് ഗ്രൂപ്പ് ഓഹരികള്‍ കൈവശം വച്ചിരിക്കുന്ന നിക്ഷേപകര്‍ക്കും തലവേദനയെന്നു വിദഗ്ധര്‍.
റിലയന്‍സ് കമ്മ്യൂണിക്കേഷന്‍സിന്റെ (ആര്‍കോം) വായ്പാ അക്കൗണ്ടിനെ എസ്ബിഐയില്‍ ‘വഞ്ചക’ വിഭാഗത്തില്‍ പെടുത്തുന്നതിനാണു തീരുമാനം. കൂടാതെ കമ്പനിയുടെ മുന്‍ ഡയറക്ടറായ അനില്‍ അംബാനിയെ റിസര്‍വ് ബാങ്ക് ഓഫ് ഇന്ത്യ (ആര്‍ബിഐ)ക്ക് റിപ്പോര്‍ട്ട് ചെയ്യുമെന്നും റിപ്പോര്‍ട്ടുകള്‍ വ്യക്തമാക്കുന്നു.
ഫ്രോഡ് ഐഡന്റിഫിക്കേഷന്‍ കമ്മിറ്റിയുടെ ഈ ‘എക്സ്-പാര്‍ട്ടെ ഓര്‍ഡറില്‍’ അനില്‍ അംബാനി ഞെട്ടല്‍ പ്രകടിപ്പിച്ചു. ബാങ്ക് തന്നെ വ്യക്തിപരമായി കേട്ടിട്ടില്ലെന്ന് അദ്ദേഹം പറയുന്നു. ഫോറന്‍സിക് ഓഡിറ്റ് റിപ്പോര്‍ട്ടിന്റെയും അതിന്റെ അനുബന്ധങ്ങളുടെയും പൂര്‍ണ പകര്‍പ്പുകള്‍ ഉള്‍പ്പെടെയുള്ള പ്രസക്തമായ രേഖകള്‍ നല്‍കുന്നതില്‍ എസ്ബിഐ പരാജയപ്പെട്ടെന്നും അനില്‍ പറഞ്ഞു. സംഭവങ്ങള്‍ നടന്ന സമയത്ത് താന്‍ കമ്പനിയുടെ ഒരു നോണ്‍-എക്സിക്യൂട്ടീവ് ഡയറക്ടറായിരുന്നുവെന്നും, ആര്‍കോമിന്റെ ദൈനംദിന പ്രവര്‍ത്തനങ്ങളില്‍ ഉത്തരവാദിയായിരുന്നില്ലെന്നും അദ്ദേഹം വ്യക്തമാക്കുന്നു. മറ്റ് നോണ്‍-എക്സിക്യൂട്ടീവ്, സ്വതന്ത്ര ഡയറക്ടര്‍മാര്‍ക്കെതിരെ മുമ്പ് നല്‍കിയ സമാന നോട്ടീസുകള്‍ പിന്‍വലിച്ചതായും അദ്ദേഹത്തിന്റെ അഭിഭാഷകന്‍ ചൂണ്ടികാണിക്കുന്നു.
ഠ മറ്റു വാദങ്ങള്‍
അനില്‍ അംബവനിയുടെ വാദം കേള്‍ക്കാതെയുള്ള എസ്ബിഐയുടെ ഉത്തരവ് സുപ്രീം കോടതി, ബോംബെ ഹൈക്കോടതി വിധികളെയും, ആര്‍ബിഐ മാനദണ്ഡങ്ങളെയും ലംഘിക്കുന്നുവെന്നാണ് റിലയന്‍സിന്റെ പക്ഷം. അതുകൊണ്ട് തന്നെ തട്ടിപ്പ് വര്‍ഗീകരണം പിന്‍വലിക്കണമെന്നും വ്യക്തിപരമായ വാദം കേള്‍ക്കാനുള്ള അവസരം നല്‍കണമെന്നും അനില്‍ അംബാനിയുടെ അഭിഭാഷകന്‍ എസ്ബിഐയോട് ആവശ്യപ്പെട്ടു.
ഠ എസ്ബിഐ ആരോപണങ്ങള്‍
ആര്‍കോമിനും, അതിന്റെ അനുബന്ധ സ്ഥാപനങ്ങള്‍ക്കും നല്‍കിയ 31,580 കോടി വായ്പയില്‍ കൃത്രിമത്വമാണ് എസ്ബിഐ ആരോപിക്കുന്നത്. ഫോറന്‍സിക് ഓഡിറ്റ് കണ്ടെത്തലുകളുടെ അടിസ്ഥാനത്തിലാണ് നടപടി. വായ്പയുടെ പ്രധാന ഭാഗം (ഏകദേശം 12,692 കോടി, അല്ലെങ്കില്‍ 41%) ബന്ധിത കക്ഷികള്‍ക്ക് വഴിതിരിച്ചുവിട്ടതായി പറയുന്നു. ലഭിച്ച ഫണ്ടുകള്‍ ദുരുപയോഗം ചെയ്തതായും, ഇടപാടുകള്‍ മറയ്ക്കാന്‍ സബ്സിഡിയറികള്‍ വഴി വഴിതിരിച്ചുവിട്ടതായും, കമ്പനിയുടെ ബൈലോകളില്‍ കൃത്രിമം നടന്നതായും കണ്ടെത്തി.
ലഭിച്ച പണം മ്യൂച്വല്‍ ഫണ്ടുകളിലോ, സ്ഥിര നിക്ഷേപങ്ങളിലോ താല്‍ക്കാലികമായി പിടിച്ചുവയ്ക്കുന്നതും വെളിപ്പെടുത്തല്‍ ഒഴിവാക്കാന്‍ ഇന്‍ട്രാ-ഡേ ഇടപാടുകള്‍ നടത്തിയതിന്റെയും സൂചനകള്‍ ഓഡിറ്റ് റിപ്പോര്‍ട്ട് നല്‍കുന്നു. ദേന ബാങ്കില്‍ നിന്ന് നിയമപരമായ കുടിശികയ്ക്കായി ഉദ്ദേശിച്ചിരുന്ന 250 കോടി വായ്പ ഇന്റര്‍-കോര്‍പ്പറേറ്റ് നിക്ഷേപമായി റിലയന്‍സ് കമ്മ്യൂണിക്കേഷന്‍സ് ഇന്‍ഫ്രാസ്ട്രക്ചര്‍ ലിമിറ്റഡിന് വകമാറ്റിയതും, ഐഐഎഫസിഎല്ലില്‍ നിന്നുള്ള 248 കോടി മൂലധന ചെലവ് വായ്പ ദുരുപയോഗം ചെയ്തതും വഞ്ചനാപരമായി കണക്കാക്കപ്പെടുന്നു.
ഠ ബിസിനസ് ആഘാതം
തിരിച്ചുവരവിനിടെ അനില്‍ അംബാനി നിക്ഷേപകരുടെയും, വിപണികളുടെയും വിശ്വാസം നേടുന്ന സമയമാണിത്. പുതിയ ആരോപണം, അതും എസ്ബിഐ പോലൊരു ബാങ്കില്‍ നിന്ന് വരുന്നത് സല്‍പ്പേരിന് മോശം വരുത്തും. വ്യക്തിപരവും തൊഴില്‍പരവുമായ പ്രശസ്തിക്കേറ്റ കനത്ത പ്രഹരമായി പലരും ഇതിനെ കാണുന്നു. എസ്ബിഐ നിര്‍ദേശം ആര്‍ബിഐ അംഗീകരിക്കപ്പെട്ടാല്‍ അംബാനിക്ക് ബാങ്കുകള്‍, വികസന ധനകാര്യ സ്ഥാപനങ്ങള്‍, സര്‍ക്കാര്‍ ഉടമസ്ഥതയിലുള്ള എന്‍ബിഎഫ്‌സികള്‍ മുതലായവയില്‍ നിന്ന് ധനസഹായങ്ങള്‍ ലഭിക്കില്ല. ഇതു കമ്പനി പ്രവര്‍ത്തനങ്ങളെ ബാധിക്കും.
മുന്‍കാല പെരുമാറ്റത്തിന് ആര്‍കോം ഇന്‍സോള്‍വന്‍സി ആന്‍ഡ് ബാങ്ക്‌റപ്റ്റസി കോഡിന്റെ (ഐബിസി) സെക്ഷന്‍ 32 എ പ്രകാരം സംരക്ഷിക്കപ്പെടും. എന്നാല്‍ മുന്‍ ഡയറക്ടര്‍ എന്ന നിലയില്‍ അനില്‍ അംബാനിക്ക് ക്രിമിനല്‍ നടപടികള്‍ ഉള്‍പ്പെടെയുള്ള വ്യക്തിപരമായ ബാധ്യത നേരിടേണ്ടി വരാം. എസ്ബിഐയും, ആര്‍ബിഐയും മുന്നോട്ടുപോയാല്‍ സിബിഐ അല്ലെങ്കില്‍ ഇഡി പോലുള്ള അന്വേഷണ ഏജന്‍സികളും രംഗത്തിറങ്ങാം.
ഠ നിക്ഷേപകര്‍ അറിയാന്‍
2019 മുതല്‍ ആര്‍കോം പാപ്പരത്ത നടപടികള്‍ നേരിടുന്നു. വര്‍ഷങ്ങളായി അതിന്റെ ഓഹരികള്‍ ഇടിവിലാണ്. പല നിക്ഷേപകരും ഇവിടെ പെട്ടിരിക്കുകയാണ്. നിലവിലെ എസ്ബിഐ നീക്കം സാമ്പത്തിക തകര്‍ച്ചയ്ക്ക് പിന്നിലെ കാരണങ്ങളും, നിക്ഷേപകര്‍ നേരിടുന്ന വെല്ലുവിളികളും വീണ്ടും സ്ഥിരീകരിക്കുന്നു.
റെസല്യൂഷന്‍ അപേക്ഷകര്‍ വ്യാജ പ്രൊമോട്ടര്‍മാരുമായി ബന്ധപ്പെടരുതെന്ന് ഐബിസി നിയമങ്ങള്‍ വ്യക്തമാക്കുന്നു. അങ്ങനെയെങ്കില്‍ ആര്‍കോമിന്റെ പുനരുജ്ജീവനത്തില്‍ നിന്നോ, സമാനമായ കോര്‍പ്പറേറ്റ് സ്ഥാപനങ്ങളില്‍ നിന്നോ അനില്‍ അംബാനിയെ ഭാവിയില്‍ ഒഴിവാക്കിയേക്കാം. വിഷയം ആര്‍കോമുമായി ബന്ധപ്പെട്ടാണെങ്കിലും അനില്‍ അംബാനിക്കെതിരേയുള്ള നീക്കങ്ങള്‍ ഗ്രൂപ്പിന്റെ മറ്റു കമ്പനി, ഓഹരി പ്രവര്‍ത്തനങ്ങളെ ബാധിക്കാം.
ഒരു പാപ്പരത്ത പ്രക്രിയയില്‍ സാധാരണ ഓഹരി ഉടമകള്‍ക്ക് (പ്രത്യേകിച്ച് തട്ടിപ്പ് ആരോപിക്കപ്പെടുമ്പോള്‍) ഏതെങ്കിലും പ്രധാന നിക്ഷേപം വീണ്ടെടുക്കാനുള്ള സാധ്യത വളരെ കുറവാണ്. ആസ്തി വിതരണത്തില്‍ കടക്കാര്‍ക്ക്, പ്രത്യേകിച്ച് എസ്ബിഐ പോലുള്ള സുരക്ഷിത വായ്പക്കാര്‍ക്ക് ആകും മുന്‍ഗണന. (Anil Ambani: From 6th Richest In World To ‘Fraud’ Tag By State Bank)
