ഓപ്പറേഷന്‍ സിന്ദൂര്‍ നൂറു ശതമാനം ലക്ഷ്യം നേടി; പാകിസ്താന്‍ പുറത്തുവിട്ടത് വ്യാജ വിവരങ്ങള്‍; റഷ്യന്‍ പ്രതിരോധ ഏജന്‍സിയുടെ റിപ്പോര്‍ട്ട്; ‘അന്താരാഷ്ട്ര മാധ്യമങ്ങള്‍ വ്യാജ റിപ്പോര്‍ട്ടുകള്‍ ഏറ്റുപിടിച്ചു; 1971ലെ യുദ്ധത്തിനു ശേഷം പാകിസ്താനുണ്ടായ വന്‍ തിരിച്ചടി; ദക്ഷിണേഷ്യയില്‍ ഇന്ത്യയുടെ സൈനിക ശേഷി വര്‍ധിപ്പിച്ചു’
കീവ്: ഓപ്പറേഷന്‍ സിന്ദൂറിനെ തുടര്‍ന്നു പാകിസ്താന്റെ നേതൃത്വത്തില്‍ പ്രരിപ്പിച്ച വ്യാജ വിവരങ്ങളുടെ ഉള്ളുകള്ളികള്‍ പുറത്തെത്തിച്ച് റഷ്യന്‍ ഏജന്‍സിയുടെ റിപ്പോര്‍ട്ട്. പ്രമുഖ ആഗോള പ്രതിരോധ ഇന്‍സ്റ്റിറ്റ്യൂട്ടായ റായല്‍ യുണൈറ്റഡ് സര്‍വീസസ് ഇന്‍സ്റ്റിറ്റ്യൂട്ടിന്റെ (ആര്‍എസ്‌യുഐ) റിപ്പോര്‍ട്ടില്‍ ഇന്ത്യയുടെ നിയന്ത്രിത നടപടികള്‍ നൂറു ശതമാനം ലക്ഷ്യം കണ്ടെന്നു വ്യക്തമാക്കുന്നു. പാക് അധിനിവേശ കശ്മീരിലെ (pok) അതിര്‍ത്തിക്കപ്പുറത്തുള്ള ഒമ്പത് തീവ്രവാദ ഒളിത്താവളങ്ങള്‍ ലക്ഷ്യമിട്ട് ഇന്ത്യ കൃത്യമായ ആക്രമണം ആരംഭിച്ചതിന് മണിക്കൂറുകള്‍ക്ക് ശേഷം, അന്താരാഷ്ട്ര മാധ്യമങ്ങള്‍ പാകിസ്ഥാന്റെ സ്ഥിരീകരിക്കാത്ത അവകാശവാദങ്ങള്‍ പ്രചരിപ്പിക്കാന്‍ തുടങ്ങിയെന്ന് റിപ്പോര്‍ട്ട് പറയുന്നു.
മെയ് 7 ന് ഇന്ത്യ നടത്തിയ കൃത്യമായ ആക്രമണത്തിനിടെ, മൂന്ന് ഫ്രഞ്ച് നിര്‍മ്മിത റാഫേല്‍ ഉള്‍പ്പെടെ അഞ്ച് ഇന്ത്യന്‍ യുദ്ധവിമാനങ്ങള്‍ ചൈനീസ് ജെ-10 വിമാനങ്ങള്‍ ഉപയോഗിച്ച് വെടിവച്ചതായി പാകിസ്താന്‍ അവകാശപ്പെട്ടിരുന്നു. സൈനിക നടപടികളില്‍ ഇത്തവം ആഖ്യാനങ്ങള്‍ രൂപപ്പെടുത്തുന്നത് യുദ്ധക്കളത്തില്‍ വിജയം നേടുന്നതുപോലെ നിര്‍ണായകമാണെന്നും ഇന്ത്യ ഇക്കാര്യത്തില്‍ കൃത്യമായ റിപ്പോര്‍ട്ടുകള്‍ പുറത്തുവിടാതിരുന്നത് ആശയക്കുഴപ്പം സൃഷ്ടിച്ചെന്നും റിപ്പോര്‍ട്ടില്‍ പറയുന്നു. റോയിട്ടേഴ്‌സ് അടക്കമുള്ള അന്താരാഷ്ട്ര മാധ്യമങ്ങള്‍ പാക് വാദത്തിന്റെ ചുവടുപിടിച്ചു റിപ്പോര്‍ട്ടുകള്‍ പുറത്തുവിട്ടിരുന്നു.
ALSO READ
ഠ നിശബ്ദമെങ്കിലും വിജയകരം
ഇന്ത്യന്‍ ജെറ്റുകള്‍ തകര്‍ത്തതിനെ ചുറ്റിപ്പറ്റിയുള്ള തെറ്റായ വിവരണം ഓപ്പറേഷന്‍ സിന്ദൂരിന്റെ യഥാര്‍ത്ഥ വിജയത്തെ മറച്ചുവെച്ചു എന്നാണ് റിപ്പോര്‍ട്ട് പറയുന്നത്. വാസ്തവത്തില്‍, ഇന്ത്യ അതിന്റെ പ്രവര്‍ത്തന ലക്ഷ്യങ്ങളുടെ 100 ശതമാനം കൈവരിച്ചു. കൃത്യതയോടെ നിയന്ത്രിത ആയുധങ്ങള്‍ ഉപയോഗിച്ച് ഇന്ത്യന്‍ വ്യോമസേന ആദ്യ ദിവസം തന്നെ പാകിസ്ഥാനിലെയും പിഒകെയിലെയും തീവ്രവാദ കേന്ദ്രങ്ങള്‍ നശിപ്പിച്ചു. തുടര്‍ന്നുള്ള ദിവസങ്ങളില്‍ ഓപ്പറേഷന്റെ വ്യാപ്തി വര്‍ധിച്ചു. 1971 ലെ യുദ്ധത്തിനുശേഷം പാകിസ്ഥാന്‍ വ്യോമ താവളങ്ങളില്‍ നടന്ന ആദ്യത്തെ ആക്രമണമാണിത്. പാകിസ്താനു ഗണ്യമായ നാശമുണ്ടാക്കിയെന്നും റിപ്പോര്‍ട്ടില്‍ പറയുന്നു.
ഠ നിയന്ത്രിത പ്രവര്‍ത്തനം
ഓപ്പറേഷന്‍ സിന്ദൂരത്തിന്റെ ഏറ്റവും പ്രധാനപ്പെട്ട വശം ഇന്ത്യയുടെ നിയന്ത്രിത ഓപ്പറേഷനാണ്. ആദ്യ ദിവസം, ഇന്ത്യന്‍ പൈലറ്റുമാര്‍ക്ക് ഇടപെടാന്‍ കര്‍ശന നിയന്ത്രണങ്ങളുണ്ടായിരുന്നു. പാകിസ്താന്റെ വിമാനങ്ങളെയും വ്യോമ പ്രതിരോധ സംവിധാനങ്ങളെയും എയര്‍ബേസുകളെയും ലക്ഷ്യമിടുന്നതില്‍നിന്നു വിലക്കി. അപകടകരമായ തീരുമാനമായിരുന്നു ഇതെങ്കിലും ഇന്ത്യ ഉദ്ദേശ്യം നിറവേറ്റി. പാകിസ്താനെതിരേ യുദ്ധം ചെയ്യുകയായിരുന്നില്ല, മറിച്ച് അതിര്‍ത്തിക്കപ്പുറത്തുനിന്നുള്ള തീവ്രവാദ ഉറവിടങ്ങള്‍ നശിപ്പിക്കുകയായിരുന്നു ലക്ഷ്യം. ഇന്ത്യ കണക്കുകൂട്ടി നടത്തിയ ആക്രമണ തന്ത്രം പൂര്‍ണതോതിലുള്ള യുദ്ധമാക്കി മാറ്റാന്‍ പാകിസ്താനും അവസരം നല്‍കിയില്ല.
ഠ നിയന്ത്രിത സമ്മര്‍ദ്ദം
ഓപ്പറേഷന്‍ സിന്ദൂരിനിടെ ഉണ്ടാകാന്‍ സാധ്യതയുള്ള ആണവ സംഘര്‍ഷത്തെക്കുറിച്ചുള്ള വ്യാപകമായ ഊഹാപോഹങ്ങളെക്കുറിച്ചും റിപ്പോര്‍ട്ടില്‍ പറയുന്നു. ഓപ്പറേഷന്‍ വര്‍ദ്ധിച്ചാല്‍ അത് വിനാശകരമായ ഫലങ്ങളിലേക്ക് നയിച്ചേക്കാമെന്ന യുഎസ് പ്രസിഡന്റ് ഡൊണാള്‍ഡ് ട്രംപിന്റെ മുന്നറിയിപ്പ് ഉള്‍പ്പെടെ ഇതിലുണ്ട്. എന്നാല്‍, അത്തരം പ്രചാരണങ്ങള്‍ അതിശയോക്തിപരമായിരുന്നു. ഇന്ത്യയോ പാകിസ്ഥാനോ ആണവ ഭീഷണികള്‍ പുറപ്പെടുവിക്കുകയോ വലിയ തോതിലുള്ള സൈനിക സമാഹരണങ്ങള്‍ക്ക് തുടക്കമിടുകയോ ചെയ്തിട്ടില്ല. ഇരു രാജ്യങ്ങളും ഇക്കാര്യത്തില്‍ സംയമനം പാലിച്ചെന്ന് റിപ്പോര്‍ട്ട് പറയുന്നു. ഇന്ത്യ പ്രാരംഭ ഘട്ടത്തില്‍ പാകിസ്ഥാന്‍ വ്യോമ പ്രതിരോധത്തെയോ വിമാനങ്ങളെയോ ലക്ഷ്യമിടുന്നത് ഒഴിവാക്കി. പാകിസ്താന്‍ സൈന്യത്തെ വ്യാപകമായി വിന്യസിക്കുന്നതില്‍ പരാജയപ്പെട്ടു.
ഓപ്പറേഷന്‍ സിന്ദൂറിനെ വ്യോമയുദ്ധമായി പരിഗണിക്കുന്നതിനു പകരം തീവ്രവാദ ശൃംഖലകള്‍ തകര്‍ക്കാനും ഇന്ത്യയുടെ തന്ത്രപരമായ ഉദ്ദേശ്യം ഉറപ്പിക്കാനും സൈനികശേഷി പ്രകടിപ്പിക്കാനുമുള്ള കണക്കുകൂട്ടലോടെയുള്ള നീക്കമായാണു റിപ്പോര്‍ട്ടില്‍ വിശേഷിപ്പിക്കുന്നത്. ദക്ഷിണേഷ്യയിലെ ഇന്ത്യയുടെ പ്രതിരോധ നിലയെ ഓപ്പറേഷന്‍ ഗണ്യമായി പുനര്‍നിര്‍വചിച്ചു. പഹല്‍ഗാം ഭീകരാക്രമണത്തിന് മറുപടിയായി ആരംഭിച്ച ഓപ്പറേഷന്‍ സിന്ദൂര്‍ നാലു ദിവസമാണു നീണ്ടത്. പാകിസ്ഥാന്റെ തിരിച്ചടി ശ്രമത്തിന് ശക്തമായ പ്രത്യാക്രമണങ്ങള്‍ നേരിടേണ്ടി വന്നു. അവരെ പ്രതിരോധത്തിലേക്കു തള്ളിവിടാനും ഇതിടയാക്കിയെന്ന് റിപ്പോര്‍ട്ടില്‍ പറയുന്നു.
India Achieved 100% Of Its Objectives In Operation Sindoor, Says Russian Report
