ന്യൂഡല്‍ഹി: ഇന്ത്യന്‍ സൈന്യം ആക്രമിച്ച പാക് ഭീകരരുടെ താവളത്തില്‍ ജെയ്ഷെ മുഹമ്മദ്, ലഷ്‌കര്‍-ഇ-തൊയ്ബ എന്നിവരുടെ ആസ്ഥാനമായ മസ്ജിദ് വാ മര്‍കസ് തൈബയും ഉള്‍പ്പെടുന്നു. പാകിസ്ഥാനില്‍ ഭീകരവാദത്തിന്റെ സര്‍വകലാശാല എന്നാണ് മസ്ജിദ് വാ മര്‍കസ് തൈബ അറിയപ്പെടുന്നത്. ജെയ്ഷെ മുഹമ്മദ്, ലഷ്‌കര്‍-ഇ-തൊയ്ബയും ഭീകരവാദം വളര്‍ത്തുകയും റിക്രൂട്ട് ചെയ്യുകയും ചെയ്യുന്ന പ്രധാന കേന്ദ്രമാണ് മസ്ജിദ് വാ മര്‍കസ് തൈബ.
പാകിസ്ഥാനിലെ പഞ്ചാബ് പ്രവിശ്യയിലെ ലാഹോറിനടുത്തുള്ള മുരിദ്‌കെ എന്ന പട്ടണത്തിലാണ് ഇവരുടെ കെട്ടിട സമുച്ചയം സ്ഥിതി ചെയ്യുന്നത്. ഭീകര സംഘടനയായ ലഷ്‌കര്‍-ഇ-തൊയ്ബയുടെ പ്രത്യയശാസ്ത്രപരവും പ്രവര്‍ത്തനപരവുമായ കേന്ദ്രമായി മസ്ജിദ് വാ മര്‍കസ് തൈബ കണക്കാക്കപ്പെടുന്നു. പാകിസ്ഥാന്റെ ‘ഭീകര നഴ്സറി’ എന്നറിയപ്പെടുന്ന 82 ഏക്കര്‍ വിസ്തൃതിയുള്ള ഈ വിശാലമായ സമുച്ചയം, ഇന്ത്യന്‍ മണ്ണില്‍ ആക്രമണങ്ങള്‍ ആസൂത്രണം ചെയ്യുന്നതിലും സുഗമമാക്കുന്നതിലും ഉള്ള പങ്കിന്റെ പേരില്‍ വളരെക്കാലമായി ഇന്ത്യന്‍ ഇന്റലിജന്‍സിന്റെ നിരീക്ഷണത്തിലായിരുന്നു. 2000-ലാണ് മസ്ജിദ് വാ മര്‍കസ് തൈബ സ്ഥാപിക്കപ്പെടുന്നത്.
അല്‍-ഖ്വയ്ദ നേതാവ് ഒസാമ ബിന്‍ ലാദന്‍ ഒരുകോടി രൂപ സംഭാവന നല്‍കിയെന്നും ആരോപണമുണ്ടായിരുന്നു. ഹാഫിസ് സയീദിന്റെ നേതൃത്വത്തിലുള്ള ഭീകര സംഘടനയുടെ പ്രവര്‍ത്തനങ്ങളുടെ കേന്ദ്രബിന്ദുവാണ് മസ്ജിദ് വാ മര്‍കസ് തൈബ. മദ്‌റസ വിദ്യാഭ്യാസ സ്ഥാപനങ്ങള്‍, റെസിഡന്‍ഷ്യല്‍ ക്വാര്‍ട്ടേഴ്‌സുകള്‍, മത പ്രബോധനം, ആയുധ പരിശീലനം, റിക്രൂട്ട്‌മെന്റ് എന്നിവയ്ക്കുള്ള സൗകര്യങ്ങള്‍ ഇവിടെയുണ്ട്. ഇന്ത്യന്‍ ഇന്റലിജന്‍സ് റിപ്പോര്‍ട്ടുകള്‍, സ്വദേശികളും വിദേശികളുമായ യുവാക്കളെ തീവ്രവാദികളാക്കുന്നതില്‍ മസ്ജിദ് വാ മര്‍കസ് തൈബയുടെ പങ്ക് ആവര്‍ത്തിച്ച് പറഞ്ഞിരുന്നു. ഇവിടെ പ്രതിവര്‍ഷം 1,000 വിദ്യാര്‍ത്ഥികള്‍ ചേരുന്നുണ്ടെന്ന് കണക്കാക്കപ്പെടുന്നു.
ഇന്ത്യന്‍ തിരിച്ചടിയില്‍ ഞെട്ടി പാകിസ്ഥാന്‍; തട്ടിപ്പോയത് 80 എണ്ണം, ഭീകരരുടെ ‘നഴ്സറി’ തവിടുപൊടി
പുരുഷ റിക്രൂട്ട്മെന്റുകള്‍ക്കായി സുഫ അക്കാദമിയും സ്ത്രീകള്‍ക്കായി ഒരു പ്രത്യേക ഇന്‍ഡോക്ട്രിനേഷന്‍ സെന്ററും പ്രവര്‍ത്തിക്കുന്നു. ലഷ്‌കര്‍ ഇ തൊയ്ബയുടെ പരിശീലന കേന്ദ്രമായും പ്രവര്‍ത്തിക്കുന്നു. 2008 ലെ മുംബൈ ആക്രമണത്തില്‍ ഉള്‍പ്പെട്ട തീവ്രവാദ പ്രവര്‍ത്തകര്‍ക്ക് പരിശീലനം നല്‍കുന്നതിനാണ് മര്‍കസ് ഉപയോഗിച്ചിരുന്നത്. പാക്കിസ്ഥാന്‍ രഹസ്യാന്വേഷണ ഏജന്‍സിയായ ഐഎസ്ഐയുടെ മാര്‍ഗനിര്‍ദേശപ്രകാരം ഇന്റലിജന്‍സ് പരിശീലനം (ദൗറ-ഇ-റിബ്ബാഫ്) നേടിയ അജ്മല്‍ കസബ് ഉള്‍പ്പെടെയുള്ളവരാണ് പരിശീലനത്തില്‍ പങ്കെടുത്തത്.
