ന്യൂഡല്ഹി: കൂടിക്കാഴ്ചയ്ക്ക് മന്ത്രി വീണാ ജോര്ജ് സമയം തേടിയത് അറിഞ്ഞില്ലെന്നും മന്ത്രിയുമായി കൂടിക്കാഴ്ച നടത്തുമെന്നും വ്യക്തമാക്കി കേന്ദ്ര ആരോഗ്യമന്ത്രി ജെപി നഡ്ഡ. അടുത്തയാഴ്ച മന്ത്രിയെ കാണുമെന്നും നഡ്ഡ പറഞ്ഞു.
ചൊവ്വാഴ്ചയും, ബുധനാഴ്ചയുമാണ് കേന്ദ്ര ആരോഗ്യമന്ത്രിയുമായി കൂടിക്കാഴ്ചയ്ക്ക് വേണ്ടി അനുമതി തേടിക്കൊണ്ടുള്ള കത്ത് വീണാ ജോര്ജ് നല്കിയത്. ആദ്യത്തെ കത്ത് ചൊവ്വാഴ്ച മന്ത്രിയുടെ ഓഫീസ് വഴിയാണ് നല്കിയത്. കഴിഞ്ഞ ദിവസമാണ് രണ്ടാമത്തെ കത്ത് നല്കിയത്. എന്നാല്, അനുമതി ലഭിക്കുകയുണ്ടായില്ല. അദ്ദേഹത്തിന് എന്തെങ്കിലും തിരക്കായിരിക്കുമെന്നും കൂടിക്കാഴ്ചയ്ക്ക് അനുമതി ലഭിക്കുന്ന ഘട്ടത്തില് വീണ്ടും ഡല്ഹിയിലെത്തുമെന്നും വീണാ ജോര്ജ് പ്രതികരിച്ചിരുന്നു.
അതേസമയം, ആശമാരുടെ സമരവും മന്ത്രി വീണ ജോര്ജും കേന്ദ്ര ആരോഗ്യമന്ത്രിയും തമ്മിലുള്ള കൂടിക്കാഴ്ച സംബന്ധിച്ചുയര്ന്ന വിവാദവും കെ.സി വേണുഗോപാല് എംപി ലോക്സഭയില് ഉന്നയിച്ചിരുന്നു. സഭക്കുള്ളില് വ്യക്തമായ മറുപടി നല്കാതിരുന്ന മന്ത്രി എംപിയെ ചേമ്പറിലേക്ക് ക്ഷണിക്കുകയും വിശദമായി ചര്ച്ച നടത്താമെന്നുമായിരുന്നു മറുപടി നല്കിയത്.
