തൃശൂര്: തിരുവില്വാമലയില് ഗൂഗിള്മാപ്പ് നോക്കി ഓടിച്ച കാര് പുഴയില് വീണു. യാത്രക്കാരായ അഞ്ചുപേര് അത്ഭുതകരമായി രക്ഷപ്പെട്ടു. മുപ്പത് മീറ്റര് താഴ്ചയിലേയ്ക്കാണ് കാര് വീണത്. തിരുവില്വാമലകൊണ്ടാഴി പഞ്ചായത്തുകളെ ബന്ധിപ്പിക്കുന്ന എഴുന്നള്ളത്ത് കടവ് ചെക്ക് ഡാമിലൂടെ സഞ്ചരിച്ച കാര് ഗായത്രിപ്പുഴയിലാണ് വീണത്.
മലപ്പുറം കോട്ടക്കല് ചേങ്ങോട്ടൂര് മന്താരത്തൊടി വീട്ടില് ബാലകൃഷ്ണന്, സദാനന്ദന്, വിശാലാക്ഷി, രുഗ്മിണി, കൃഷ്ണപ്രസാദ് എന്നിവരായിരുന്നു കാറിലുണ്ടായിരുന്നത്. കുത്താമ്പുള്ളി നെയ്ത്തുഗ്രാമത്തില്നിന്ന് വസ്ത്രങ്ങള് വാങ്ങി മടങ്ങുന്നതിനിടെ ഞായറാഴ്ച രാത്രി ഏഴരയോടെയാണ് അപകടം.
ഗൂഗിള്മാപ്പ് നോക്കിയുള്ള യാത്രയ്ക്കിടെ തിരുവില്വാമല ഭാഗത്തുനിന്ന് ചെക്ക് ഡാമിലേക്കിറങ്ങിയ കാര് ദിശതെറ്റി പുഴയിലേക്ക് മറിയുകയായിരുന്നു. മറ്റൊരു കാറില് ഉണ്ടായിരുന്ന ബന്ധുക്കളും നാട്ടുകാരും ചേര്ന്നാണ് പുഴയിലകപ്പെട്ടവരെ രക്ഷപ്പെടുത്തിയത്. കാര് വീണ ഭാഗത്ത് അഞ്ചടിയോളം വെള്ളം ഉണ്ടായിരുന്നു.
