അബുദാബി: പ്രവാസികള്‍ ഉള്‍പ്പെടെയുള്ള യുഎഇ നിവാസികള്‍ക്കായി മുന്നറിയിപ്പ് പുറപ്പെടുവിച്ച് യുഎഇ നാഷണല്‍ സെന്റര്‍ ഒഫ് മെറ്റീരോളജി (എന്‍സിഎം). ഇന്ന് രാജ്യത്ത് താപനിലയില്‍ കുറവുണ്ടാകുമെന്നും മഴ ലഭിക്കാന്‍ ഇടയുണ്ടാകുമെന്നുമാണ് കാലാവസ്ഥാ വകുപ്പ് അറിയിക്കുന്നത്.
വടക്കന്‍, കിഴക്കന്‍ പ്രദേശങ്ങളിലും തീരപ്രദേശങ്ങളിലും കാര്‍മേഘം മൂടിയ അന്തരീക്ഷമായിരിക്കും. രാത്രിയോടെ ഈര്‍പ്പമുള്ള കാലാവസ്ഥയിലെത്തും. നാളെ ചിലയിടങ്ങളില്‍ മൂടല്‍മഞ്ഞ് രൂപപ്പെടാന്‍ സാദ്ധ്യതയുണ്ടെന്നും അറിയിപ്പുണ്ട്. അറേബ്യന്‍ ഗള്‍ഫില്‍ ഇന്ന് കടല്‍ രൂക്ഷമാകാന്‍ സാദ്ധ്യതയുള്ളതിനാല്‍ യെല്ലോ അലര്‍ട്ട് പുറപ്പെടുവിച്ചിരിക്കുകയാണ്. ഏഴ് അടി ഉയരത്തില്‍ തിരമാലകള്‍ വീശാനും മണിക്കൂറില്‍ 40 കിലോമീറ്റര്‍ വരെ വേഗതയില്‍ കാറ്റ് വീശാനുമുള്ള സാദ്ധ്യത കണക്കിലെടുത്താണ് അലര്‍ട്ട് പുറപ്പെടുവിച്ചത്. ഇന്ന് രാവിലെ ആറ് മണി മുതല്‍ നാളെ രാവിലെ ആറുമണിവരെയാണ് ജാഗ്രതാ നിര്‍ദേശമുള്ളത്. പുറത്തിറങ്ങുമ്പോള്‍ ജാഗ്രത പാലിക്കണമെന്നാണ് യെല്ലോ അലര്‍ട്ടുകൊണ്ട് ഉദ്ദേശിക്കുന്നത്.
തെക്കുകിഴക്കന്‍ ദിശയില്‍ നിന്ന് നേരിയതോ മിതമായതോ ആയ കാറ്റ് പ്രതീക്ഷിക്കാമെന്ന് നേരത്തെ അറിയിച്ചിരുന്നു. ഇത് വടക്ക് പടിഞ്ഞാറന്‍ ദിശയിലേക്ക് മാറി കടലിന് മുകളിലൂടെ കാറ്റിന്റെ വേഗത മണിക്കൂറില്‍ 10 കിലോമീറ്റര്‍ മുതല്‍ 25 കിലോമീറ്റര്‍ വരെയാകും. തുടര്‍ന്ന് മണിക്കൂറില്‍ 40 കിലോമീറ്റര്‍ വരെ വേഗതയില്‍ വീശുമെന്നുമാണ് കാലാവസ്ഥാ ബുള്ളറ്റിനില്‍ വ്യക്തമാക്കിയിരുന്നത്. രാത്രിയോടെ ഒമാന്‍ കടലും പ്രക്ഷുബ്ധമാകാനിടയുണ്ട്.
അബുദാബിയിലും ദുബായിലും കാലാവസ്ഥാ വ്യതിയാനമുണ്ടാകും. ഉയര്‍ന്ന താപനില 33 ഡിഗ്രിവരെയാകും. 19 ഡിഗ്രിയാണ് ഏറ്റവും കുറഞ്ഞ താപനില പ്രതീക്ഷിക്കുന്നത്. ദുബായില്‍ 33 ഡിഗ്രി ഉയര്‍ന്ന താപനിലയും 20 ഡിഗ്രി കുറഞ്ഞ താപനിലയുമാണ് പ്രതീക്ഷിക്കുന്നത്.
