കല്പ്പറ്റ: ബാറിന് പുറത്ത് സുഹൃത്തുക്കളുമായുണ്ടായ വാക്കുതര്ക്കത്തിനിടയില് കുത്തേറ്റ യുവാവ് മരിച്ചു. ഏരിയാപ്പളളി ഗാന്ധിനഗര് സ്വദേശി റിയാസാണ് (24) ചികിത്സയിലിരിക്കെ മരിച്ചത്. ബുധനാഴ്ച രാത്രി പുല്പ്പളളിയിലെ ബാറിന് പുറത്തായിരുന്നു സംഭവം. മീനംകൊല്ലി സ്വദേശികളുമായുളള വാക്കുതര്ക്കത്തിനിടയിലാണ് റിയാസിന് കുത്തേറ്റത്. പ്രതികള് ആരൊക്കെയാണെന്ന് കണ്ടെത്താന് സാധിച്ചിട്ടില്ല.
ശരീരത്തില് നിരവധി തവണ കുത്തേറ്റതിനെ തുടര്ന്ന് ഗുരുതരാവസ്ഥയിലായിരുന്നു റിയാസ്. ആക്രമണത്തിന് ശേഷം പ്രതികള് കടന്നുകളയുകയായിരുന്നു. ഒടുവില് നാട്ടുകാരാണ് യുവാവിനെ സുല്ത്താന് ബത്തേരിയിലെ സ്വകാര്യആശുപത്രിയില് എത്തിച്ചത്. ഇവിടെ നിന്ന് വിദഗ്ദ ചികിത്സയ്ക്കായി കോഴിക്കോട് മെഡിക്കല് കോളേജിലേക്ക് മാറ്റാന് നിര്ദ്ദേശിച്ചിരുന്നു. അതിനിടയിലാണ് മരണം സംഭവിച്ചത്. പൊലീസ് പ്രതികള്ക്കായി തിരച്ചില് ആരംഭിച്ചിട്ടുണ്ട്.
