കോഴിക്കോട്: നാട്ടിലേക്കുള്ള യാത്രയ്ക്കിടെ കാണാതായ മലയാളി സൈനികന് വിഷ്ണുവിനെ കണ്ടെത്തി. ഇന്നലെ രാത്രി ബെംഗളൂരുവില് നിന്നാണ് വിഷ്ണുവിനെ എലത്തൂര് പൊലീസ് കണ്ടെത്തിയത്. സാമ്പത്തിക പ്രയാസം കാരണം നാട്ടില്നിന്നു മാറി നിന്നതാണെന്നു വിഷ്ണു മൊഴി നല്കി.
വിഷ്ണുവിന്റെ ചില സുഹൃത്തുക്കളില്നിന്നു കിട്ടിയ വിവരത്തെ തുടര്ന്നാണ് പൊലീസ് ബെംഗളൂരുവില് എത്തിയത്. കഴിഞ്ഞ മാസം 17നാണു പുണെ ആര്മി സ്പോര്ട്സ് ഇന്സ്റ്റിറ്റ്യൂട്ടില്നിന്ന് അവധിക്ക് നാട്ടിലേക്കു തിരിച്ച വിഷ്ണുവിനെ കാണാതായത്. വിഷ്ണുവിനെ കാണാനില്ലെന്നു ബന്ധുക്കള് പൊലീസില് പരാതി നല്കിയിരുന്നു. സൈനികരുടെ നേതൃത്വത്തിലും വിഷ്ണുവിനായി അന്വേഷണം നടന്നു.
