എന്നാല്‍, നേരത്തേ പേരുയർന്നുകേട്ടവരല്ലാതെ മറ്റൊരാള്‍ വരുമെന്നും താമരചിഹ്നത്തില്‍ തന്നെയായിരിക്കും മത്സരിക്കുകയെന്നുമാണ് ഇപ്പോഴത്തെ സൂചനകൾ.
രാഹുൽ ഗാന്ധിയെയും ആനി രാജയേയും നേരിടാൻ കെൽപ്പുള്ള ഒരു വനിതയായിരിക്കും ഇതെന്നുമാണ് റിപ്പോർട്ടുകൾ. ദേശീയനേതാക്കളായ രാഹുല്‍ഗാന്ധിയും ആനി രാജയും മത്സരിക്കുന്ന മണ്ഡലമാണ് വയനാട്. അവിടെ അതിനനുസരിച്ചുള്ള സ്ഥാനാർഥിയെത്തന്നെ ദേശീയനേതൃത്വം കൊണ്ടുവരുമെന്നാണ് ബി.ജെ.പി. കേരള ഘടകവും പറയുന്നത്.
മണ്ഡലം രൂപവത്കരിച്ചശേഷം ആദ്യ രണ്ടുതവണ ബി.ജെ.പി. സ്ഥാനാർഥി തന്നെയാണ് വയനാട്ടില്‍ മത്സരിച്ചിരുന്നത്. കഴിഞ്ഞതവണ ബി.ഡി.ജെ.എസിന് സീറ്റ് വിട്ടുകൊടുത്തു.തുഷാർ വെള്ളാപ്പള്ളിയാണ് രാഹുല്‍ഗാന്ധിക്കും എല്‍.ഡി.എഫിലെ പി.പി. സുനീറിനുമെതിരേ കഴിഞ്ഞ തവണ മത്സരിച്ചത്. പക്ഷേ, ഇത്തവണ ബി.ഡി.ജെ.എസ്. ബി.ജെ.പി.ക്കുതന്നെ സീറ്റ് കൈമാറുകയായിരുന്നു.
2009-ല്‍ മണ്ഡലം രൂപവത്കരിച്ചപ്പോള്‍ ബി.ജെ.പി.യുടെ സി. വാസുദേവനാണ് മത്സരിച്ചത്. അന്ന് 31,687 വോട്ടാണ് കിട്ടിയത്. 2014-ല്‍ പി.ആർ. രശ്മിനാഥ് വന്നപ്പോള്‍ 80,752 ആയി വോട്ട് ഉയർന്നു. 2019-ല്‍ തുഷാർ വെള്ളാപ്പള്ളിക്ക് 78,816 വോട്ടാണ് ലഭിച്ചത്.
