കോട്ടയം: രണ്ടര വര്‍ഷം കൊണ്ട് സംസ്ഥാനത്ത് 92 പാലങ്ങള്‍ പൂര്‍ത്തിയാക്കിയതായി പൊതുമരാമത്ത് – ടൂറിസം വകുപ്പ് മന്ത്രി അഡ്വ. പി.എ.മുഹമ്മദ് റിയാസ് പറഞ്ഞു. കടുത്തുരുത്തി – പാലാ നിയോജക മണ്ഡലങ്ങളെ ബന്ധിപ്പിച്ച് കൊണ്ട് ചേര്‍പ്പുങ്കല്‍ – കൊഴുവനാല്‍ റോഡില്‍ മീനച്ചിലാറിന് കുറുകെ പുതുതായി നിര്‍മ്മിച്ച ചേര്‍പ്പുങ്കല്‍ പാലത്തിന്റെ ഉദ്ഘാടനം ഓണ്‍ലൈനായി നിര്‍വഹിച്ച് സംസാരിക്കുകയായിരുന്നു അദ്ദേഹം. അഞ്ചുവര്‍ഷം കൊണ്ട് 100 പാലങ്ങള്‍ നിര്‍മ്മിക്കുക എന്നതായിരുന്നു സര്‍ക്കാരിന്റെ ലക്ഷ്യം. എന്നാല്‍ മൂന്ന് വര്‍ഷം കൊണ്ട് തന്നെ ലക്ഷ്യത്തിനടുത്തെത്താന്‍ സര്‍ക്കാരിനായി. കാസര്‍ഗോഡ് മുതല്‍ തിരുവനന്തപുരം വരെയുള്ള ആറുവരി പാത 2025ല്‍ പൂര്‍ത്തീകരിക്കാന്‍ സാധിക്കുമെന്നും മന്ത്രി പറഞ്ഞു.
ചേര്‍പ്പുങ്കല്‍ മാര്‍ സ്ലീവാ പാരിഷ് ഹാളില്‍ നടന്ന ഉദ്ഘാടന സമ്മേളനത്തില്‍ സഹകരണ – തുറമുഖ വകുപ്പ് മന്ത്രി വി.എന്‍. വാസവന്‍ അധ്യക്ഷനായിരുന്നു. പല പ്രതിസന്ധികള്‍ ഉണ്ടായിട്ടും സര്‍ക്കാരിന്റെ ഇച്ഛാശക്തിയിലൂടെയാണ് ചേര്‍പ്പുങ്കല്‍ സമാന്തര പാലം പൂര്‍ത്തിയാക്കാന്‍ സാധിച്ചെതെന്ന് മന്ത്രി പറഞ്ഞു. എം.പിമാരായ തോമസ് ചാഴികാടന്‍, ജോസ് കെ. മാണി, എം.എല്‍.എമാരായ മോന്‍സ് ജോസഫ്, മാണി സി.കാപ്പന്‍ എന്നിവര്‍ ചടങ്ങില്‍ മുഖ്യാതിഥികളായി. പൊതുമരാമത്ത് വകുപ്പ് പാലങ്ങള്‍ വിഭാഗം എക്സിക്യുട്ടീവ് എന്‍ജിനീയര്‍ എം.ടി. ഷാബു റിപ്പോര്‍ട്ട് അവതരിപ്പിച്ചു. പാലം നിര്‍മ്മിച്ച മുളമൂട്ടില്‍ കണ്‍സ്ട്രക്ഷന്‍സ് ഉടമ എം.എം.മാത്യുവിനെ ചടങ്ങില്‍ ആദരിച്ചു.
ളാലം ബ്ലോക്ക് പഞ്ചായത്ത് പ്രസിഡന്റ് റാണി ജോസ്, കിടങ്ങൂര്‍ ഗ്രാമ പഞ്ചായത്ത് പ്രസിഡണ്ട് തോമസ് മാളിയേക്കല്‍, കൊഴുവനാല്‍ ഗ്രാമപഞ്ചായത്ത് പ്രസിഡന്റ് ലീലാമ്മ ബിജു, ജില്ലാ പഞ്ചായത്ത് അംഗം ജോസ് മോന്‍ മുണ്ടക്കല്‍, ബ്ലോക്ക് പഞ്ചായത്ത് അംഗങ്ങളായ ജോസി ജോസഫ് പൊയ്കയില്‍, പ്രൊഫ. മേഴ്സി ജോണ്‍, കെ.ജി. അശോക് കുമാര്‍, കൊഴുവനാല്‍ ഗ്രാമ പഞ്ചായത്ത് വൈസ് പ്രസിഡന്റ് ബി.രാജേഷ്, ഗ്രാമപഞ്ചായത്തംഗങ്ങളായ മിനി ജെറോം, ബോബി മാത്യു കീകോലില്‍, പൊതുമരാമത്ത് വകുപ്പ് പാലങ്ങള്‍ വിഭാഗം ദക്ഷിണ മേഖലാ സൂപ്രണ്ടിംഗ് എന്‍ജിനീയര്‍ ദീപ്തി ഭാനു, അസിസ്റ്റന്റ് എക്സിക്യൂട്ടീവ് എന്‍ജിനീയര്‍ എം.കെ. സന്തോഷ്‌കുമാര്‍, രാഷ്ട്രീയ പാര്‍ട്ടി പ്രതിനിധികളായ പി.എന്‍. ബിനു, ബാബു കെ. ജോര്‍ജ്ജ്, ടോബില്‍ കെ. അലക്സ്, ജോസ് കൊല്ലറാത്ത്, ഇമ്മാനുവല്‍ നെടുമ്പ്രം, പി.കെ.സുരേഷ്, ചേര്‍പ്പുങ്കല്‍ പള്ളി വികാരി ഫാ.ജോസ് പാനാംമ്പുഴ, കല്ലൂര്‍ പള്ളി വികാരി ഫാ. ജിസ്മോന്‍ മരങ്ങാലില്‍, മാര്‍സ്ലീവാ മെഡിസിറ്റി ഡയറക്ടര്‍ ഫാ. ഡോ. ജോസഫ് കണിയോടിക്കല്‍, വ്യാപാരി വ്യവസായി പ്രസിഡന്റ് ടോം മാത്യു വടാന എന്നിവര്‍ ആംശസകള്‍ അര്‍പ്പിച്ചു.
