തൃശൂർ: ബുധനാഴ്ച നറുക്കെടുത്ത ഫിഫ്റ്റി-50 ലോട്ടറിയുടെ ഒന്നാം സമ്മാനമായ ഒരു കോടി രൂപ ലോട്ടറി വില്‍പ്പനക്കാരന് ലഭിച്ചു.കടങ്ങോട് പഞ്ചായത്തിലെ പാഴിയോട്ടുമുറി കുളങ്ങര വീട്ടില്‍ ഫ്രാൻസിസിന് (68) ആണ് ലോട്ടറിയടിച്ചത്.
കഴിഞ്ഞ ദിവസം എരുമപ്പെട്ടിയിലെ വൈരം ലോട്ടറീസില്‍നിന്ന് വില്‍പ്പനക്കായെടുത്ത 75 ടിക്കറ്റിലൊന്നിനാണ് സമ്മാനം.മുപ്പതെണ്ണം വില്‍ക്കാൻ സാധിക്കാതെ വിഷമിച്ചിരിക്കുന്ന സമയത്താണ് ഇദ്ദേഹത്തിന് ഒന്നാം സമ്മാനം ലഭിച്ചത്.എഫ്.എൻ. 619922 നമ്ബറിനാണ് സമ്മാനം.
ലോറി ഡ്രൈവറായിരിക്കെ അസുഖമായി ജോലിക്ക് പോകാൻ കഴിയാതെ വന്നപ്പോഴാണ് ഫ്രാൻസിസ് ലോട്ടറി വില്‍പ്പന തുടങ്ങിയത്. ഇരുപത് വർഷമായി എരുമപ്പെട്ടി മുതല്‍ കുന്നംകുളം വരെയുള്ള സ്ഥലങ്ങളില്‍ കാല്‍നടയായാണ് വില്‍പ്പന.
പൊതുമരാമത്ത് പുറമ്ബോക്കില്‍ ശോചനീയാവസ്ഥയിലുള്ള വീട്ടിലാണ് ഇപ്പോള്‍ കഴിയുന്നത്. ആദ്യം വീടെന്ന സ്വപ്നം പൂർത്തിയാക്കണമെന്നാണ് ആഗ്രഹമെന്ന് ഫ്രാൻസിസ് പറഞ്ഞു. ടിക്കറ്റ് ഫെഡറല്‍ ബാങ്ക് വടക്കേക്കാട് ശാഖയ്ക്ക് കൈമാറി. റീനയാണ് ഭാര്യ. ഫെറീന, ആന്റണി ബ്ലെസൻ എന്നിവരാണ് മക്കള്‍.
