സിനിമ ഒരു ഗ്ലാമര്‍ ലോകമാണ്. അവിടെ പേരും പ്രശസ്തിയും പണവും എല്ലാം കിട്ടും. അതോടൊപ്പം ചില ദുരനുഭവങ്ങളും ചീത്തപ്പേരും ഉണ്ടാവും. അതെല്ലാം മറ്റെല്ലാം ജോലി സ്ഥലത്തെയും എന്നത് പോലെയാണ്, പക്ഷെ അതിനെ അതിജീവിക്കാന്‍ പഠിക്കണം എന്നാണ് പല മുതിര്‍ന്ന താരങ്ങളും പറഞ്ഞിട്ടുള്ളത്. കരിയറിന്റെ തുടകക്ക കാലത്ത് തനിക്കുണ്ടായ ചില മോശം അനുഭവങ്ങളെ കുറിച്ച് നടി അംബിക തുറന്ന് സംസാരിച്ച ഒരു പഴയ വീഡിയോ ആണ് ഇപ്പോള്‍ വൈറലാവുന്നത്.
നടന്മാരുടെ ഭാഗത്ത് നിന്നൊന്നും തനിക്ക് അത്ര മോശമായ അനുഭവം നേരിടേണ്ടി വന്നിട്ടില്ല, എനിക്ക് മോശം അനുഭവം ഉണ്ടായത് ചില മുതിര്‍ന്ന നടിമാരില്‍ നിന്നാണെന്ന് അംബിക പറയുന്നു. എംജി ശ്രീകുമാര്‍ അവതരിപ്പിയ്ക്കുന്ന പറയാം നേടാം എന്ന ഷോയിലാണ് അംബികയുടെ തുറന്നു പറച്ചില്‍. എംജി എത്ര നിര്‍ബന്ധിച്ചിട്ടും ആ നടിയുടെ പേര് അംബിക വെളിപ്പെടുത്തിയിട്ടില്ല
ഭക്ഷണത്തിന്റെ കാര്യത്തില്‍ പോലും എന്റെ അപമാനിച്ചിട്ടുണ്ട് എന്ന് പറയുമ്പോള്‍ അംബിക കരയുകയായിരുന്നു. എന്റെ കാതില്‍ വീഴുന്ന തരത്തിലാണ് അവര്‍ സംസാരിക്കുന്നത്. ‘പുതിയ ആള്‍ക്കാരല്ലേ, മീനിന്റെ ആവശ്യം എന്താണ്. കരിമീന്‍ കഴിച്ചില്ലെങ്കില്‍ ഇറങ്ങില്ലേ’ എന്നൊക്കെ ചോദിച്ചു. എനിക്ക് വല്ലാത്ത സങ്കടം വന്നു. കരഞ്ഞുപോയിസ അത് കണ്ട അമ്മ എന്നെ വിളിച്ച് മാറ്റിയിരുത്തി. എന്നിട്ട് എറണാകുളത്തെ ഗ്രാന്റ് ഹോട്ടലില്‍ നിന്നും കരിമീന്‍ വറുത്തത് വാങ്ങി കൊണ്ടു വന്നു തന്നു.
അമ്മയെ സംബന്ധിച്ച് ഭക്ഷണക്കാര്യത്തില്‍ ഒക്കെ ആരെങ്കിലും എന്തെങ്കിലും പറഞ്ഞാല്‍ വല്ലാതെ വിഷമം വരും. അതേ നടി വേറെയും ഒന്ന് രണ്ട് ചിത്രങ്ങളില്‍ എന്നെ വേദനിപ്പിച്ചിട്ടുണ്ട്. മറ്റൊരു സിനിമയുടെ ഷൂട്ടിങിനായി ചെയ്തുകൊണ്ടിരിക്കുന്ന സീന്‍ പെട്ടന്ന് ചെയ്തു തീര്‍ത്ത് എനിക്ക് പോകണമായിരുന്നു. വൈകിട്ടാണ് വണ്ടി. ആ നടിക്കൊപ്പമാണ് സീന്‍. എനിക്ക് പോകണം എന്നറിഞ്ഞ് അവര്‍ മനപൂര്‍വ്വം റീ ടേക്കുകള്‍ പോയി. ഒരിക്കലും രണ്ടു വട്ടവും ആയാല്‍ നമ്മള്‍ ശ്രദ്ധിക്കില്ല. എട്ട് തവണയൊക്കെ ആവുമ്പോള്‍ മനസ്സിലാവുമല്ലോ. ‘ആ ചേച്ചിയ്ക്ക് തന്നോട് എന്തെങ്കിലും ദേഷ്യമുണ്ടോ’ എന്ന് സംവിധായകന്‍ എന്നെ മാറ്റി നിര്‍ത്തി ചോദിക്കുകയും ചെയ്തിരുന്നു.
മറ്റൊരു ലൊക്കേഷനില്‍ വച്ച് ഉച്ചയ്ക്ക് ഭക്ഷണം കഴിക്കാന്‍ എല്ലാവരും ഇരിക്കുന്നിടത്ത് ഞാനും ഇരിക്കാന്‍ നോക്കിയപ്പോള്‍, എന്നോട് അവിടെ ഇരിക്കരുത് എന്ന് പറഞ്ഞ് തടഞ്ഞതും വേദനിപ്പിയ്ക്കുന്ന അനുഭവങ്ങളിലൊന്നാണ്. അന്ന് അമ്മയും അച്ഛനും എന്നെ ആശ്വസിപ്പിച്ചു, നിനക്കും ഒരു കാലം വരും, അന്ന് ഇതിനൊക്കെ മധുരമായി പ്രതികാരം ചെയ്യാം എന്ന്. ആ അവസരം പിന്നീട് എനിക്ക് കിട്ടുകയും ചെയ്തു. ആ നടിയോട് ഞാന്‍ എന്റെ മധുരപ്രതികാരം വീട്ടി.
ചെന്നൈയില്‍ അന്ന് എന്റെ സിനിമയുടെ ഷൂട്ടിങ് നടക്കുകയാണ്. അന്ന് അത്യാവശ്യം നല്ല രീതിയില്‍ തിരക്കുള്ള കാലമാണ്. എനിക്ക് അസിസ്റ്റന്റ്സും മേക്കപ്പ് ആര്‍ട്ടിസ്റ്റുമെല്ലാമുണ്ട്. പ്രത്യേകിച്ച് ഒരു റൂമും ഉണ്ട്. ഷോട്ടിന് വേണ്ടി ഞാന്‍ റെഡിയായി പുറത്തേക്ക് വരുമ്പോഴാണ് അവരെ കണ്ടത്. ‘എന്താ ഇവിടെ’ എന്ന് ചോദിച്ചപ്പോള്‍, ‘എനിക്ക് മേക്കപ്പ് ചെയ്യണം, റൂമില്ല’ എന്ന് പറഞ്ഞു. അപ്പോള്‍ എന്റെ മനസ്സിലൂടെ പഴയ കാര്യങ്ങള്‍ എല്ലാം ഫ്ളാഷ് ബാക്കായി പോയി. ഞാന്‍ വേഗം ‘ചേച്ചി വാ’ എന്ന് പറഞ്ഞ് എന്റെ റൂമിലേക്ക് കൊണ്ടുപോയി. എന്റെ അസിസ്റ്റന്റിനോട് അവര്‍ക്ക് വേണ്ടത് ചെയ്തു കൊടുക്കൂ എന്ന് അഹങ്കാരത്തില്‍ പറയുമ്പോള്‍ ഉള്ളില്‍ ഞാന്‍ സന്തോഷിച്ചിരുന്നു- അംബിക പറഞ്ഞു
