കൊല്ലത്തിനും തിരുവനന്തപുരത്തിനും ഇടയിലെ സുപ്രധാന സ്റ്റേഷനുകളായ പരവൂര്‍, കടയ്ക്കാവൂര്‍, ചിറയിൻകീഴ് എന്നിവിടങ്ങളില്‍ പാസഞ്ചര്‍ ട്രെയിനിനു പോലും സ്റ്റോപ്പ് കൊടുക്കാതെയാണ് റെയില്‍വേ യാത്രക്കാരുടെ ക്ഷമയെ പരീക്ഷിക്കുന്നത്.
06639-40 പുനലൂര്‍-നാഗര്‍കോവില്‍-പുനലൂര്‍
പൂര്‍ണമായും അണ്‍റിസര്‍വ്ഡ് കോച്ചുകളുള്ള വണ്ടി ഓടുന്നത് പോലും ദിവസേന യാത്രക്കാരുടെ സൗകര്യാര്‍ഥമാണെന്നിരിക്കെ തിരക്കേറിയ രാവിലെയും വൈകുന്നേരവും മേല്‍പ്പറഞ്ഞ സ്റ്റേഷനുകളില്‍ നിര്‍ത്താത്തത് കാരണം അണ്‍റിസര്‍വ്ഡ് കോച്ചുകള്‍ കുറവുള്ള മറ്റ് ട്രെയിനുകളില്‍ തിങ്ങിനിറഞ്ഞ് യാത്ര ചെയ്യേണ്ട ഗതികേടിലാണ് യാത്രക്കാര്‍.
നിന്നുതിരിയാനിടമില്ലാത്ത വിധം തിരക്കുള്ള ജയന്തി ജനത എക്സ്പ്രസില്‍ രണ്ട് അണ്‍റിസര്‍വ്ഡ് കോച്ചുകള്‍ മാത്രമാണുള്ളത്. ജയന്തി കൊല്ലം വിടുന്നത് ഒരു മണിക്കൂര്‍ നേരത്തെയും ആക്കി.ജയന്തി ജനത പോയതിനു ശേഷം ഈസ്റ്റേഷനുകളിലെത്തുന്ന ഇന്‍റര്‍സിറ്റിയിലും വഞ്ചിനാടിലും മറ്റുള്ള യാത്രക്കാരെ കൂടി ബാധിക്കുന്ന വിധം തിരക്കാണ് ഈ സ്റ്റേഷനുകളിലെത്തുമ്ബോള്‍ അനുഭവപ്പെടുന്നത്.
രാവിലത്തെ തിരക്കേറിയ സമയത്ത് ജയന്തിക്കും വഞ്ചിനാടിനും ഇടയില്‍ ഒരു മണിക്കൂറോളം ഈ സ്റ്റേഷനുകളില്‍ നിന്ന് തിരുവനന്തപുരത്തേക്ക് ട്രെയിനില്ലാത്തത് പരിഹരിക്കാൻ ദീര്‍ഘകാലമായുള്ള ആവശ്യമാണ്. ഇതിനിടയിലാണ് പാസഞ്ചർ സ്റ്റോപ്പുകളില്ലാതെ ഓടുന്നതും.
